ਨਿਤੀਸ਼ ਕੁਮਾਰ ਕੋਲ 1.64 ਕਰੋੜ ਰੁਪਏ ਦੀ ਜਾਇਦਾਦ

ਪਟਨਾ, 1 ਜਨਵਰੀ
ਬਿਹਾਰ ਦੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ 1.64 ਕਰੋੜ ਰੁਪਏ ਦੀ ਜਾਇਦਾਦ ਦੇ ਮਾਲਕ ਹਨ। ਕੈਬਨਿਟ ਸਕੱਤਰੇਤ ਵਿਭਾਗ ਦੀ ਵੈੱਬਸਾਈਟ ’ਤੇ ਸਾਂਝੇ ਕੀਤੇ ਗਏ ਮੁੱਖ ਮੰਤਰੀ ਅਤੇ ਉਨ੍ਹਾਂ ਦੇ ਕੈਬਨਿਟ ਮੰਤਰੀਆਂ ਦੀ ਜਾਇਦਾਦ ਦੇ ਵੇਰਵਿਆਂ ਅਨੁਸਾਰ ਨਿਤੀਸ਼ ਕੋਲ 22,552 ਰੁਪਏ ਨਗਦੀ ਹੈ ਅਤੇ ਵੱਖ-ਵੱਖ ਬੈਂਕ ਖਾਤਿਆਂ ਵਿੱਚ 49,202 ਰੁਪਏ ਜਮ੍ਹਾਂ ਹਨ। ਉਨ੍ਹਾਂ ਕੋਲ 11.32 ਲੱਖ ਰੁਪਏ ਦੀ ਇੱਕ ਫੋਰਡ ਈਕੋਸਪੋਰਟ ਕਾਰ, 1.28 ਲੱਖ ਰੁਪਏ ਦੀਆਂ ਦੋ ਸੋਨੇ ਦੀਆਂ ਤੇ ਇੱਕ ਚਾਂਦੀ ਦੀ ਮੁੰਦਰੀ ਤੋਂ ਇਲਾਵਾ 1.45 ਲੱਖ ਰੁਪਏ ਦੀਆਂ ਚੱਲ ਜਾਇਦਾਦਾਂ ਹਨ। ਉਨ੍ਹਾਂ ਕੋਲ ਇੱਕੋ-ਇੱਕ ਅਚੱਲ ਜਾਇਦਾਦ ਦਿੱਲੀ ਦੇ ਦਵਾਰਕਾ ਵਿਚਲਾ ਅਪਾਰਟਮੈਂਟ ਹੈ। 2004 ਵਿੱਚ ਇਹ 13.78 ਲੱਖ ਰੁਪਏ ਦਾ ਸੀ ਅਤੇ ਹੁਣ ਇਸ ਦੀ ਕੀਮਤ 1.48 ਕਰੋੜ ਰੁਪਏ ਹੈ। ਨਿਤੀਸ਼ ਦੀ ਸਰਕਾਰ ਨੇ ਸਾਰੇ ਕੈਬਨਿਟ ਮੰਤਰੀਆਂ ਲਈ ਹਰ ਕੈਲੰਡਰ ਸਾਲ ਦੇ ਆਖਰੀ ਦਿਨ ਆਪਣੀ ਜਾਇਦਾਦ ਅਤੇ ਦੇਣਦਾਰੀਆਂ ਦੇ ਅੰਕੜੇ ਜਨਤਕ ਕਰਨਾ ਲਾਜ਼ਮੀ ਕੀਤਾ ਹੈ। -ਪੀਟੀਆਈ