ਜੂਆ ਖੇਡਦੇ ਨੌਂ ਮੁਲਜ਼ਮ ਨਗਦੀ ਸਣੇ ਗ੍ਰਿਫ਼ਤਾਰ

ਪੱਤਰ ਪ੍ਰੇਰਕ
ਕਾਲਾਂਵਾਲੀ, 2 ਨਵੰਬਰ
ਸੀਆਈਏ ਕਾਲਾਂਵਾਲੀ ਪੁਲੀਸ ਨੇ ਗੁਪਤ ਸੂਚਨਾ ਦੇ ਆਧਾਰ ’ਤੇ ਹੁੱਡਾ ਸੈਕਟਰ ਦੇ ਨਜ਼ਦੀਕ ਸਥਿਤ ਰੇਲਵੇ ਲਾਈਨ ਕੋਲ ਪੀਰ ਦਰਗਾਹ ’ਤੇ ਜਨਤਕ ਥਾਂ ’ਤੇ ਜੂਆ ਖੇਡ ਰਹੇ 9 ਵਿਅਕਤੀਆਂ ਨੂੰ 4,76,100 ਰੁਪਏ ਦੇ ਜੂਏ ਦੀ ਰਾਸ਼ੀ ਅਤੇ ਤਾਸ਼ ਸਮੇਤ ਗ੍ਰਿਫ਼ਤਾਰ ਕੀਤਾ ਹੈ। ਸੀਆਈਏ ਕਾਲਾਂਵਾਲੀ ਦੇ ਇੰਚਾਰਜ ਵਰਿੰਦਰ ਸਿੰਘ ਨੇ ਦੱਸਿਆ ਕਿ ਮੁੱਖ ਕਾਂਸਟੇਬਲ ਰਜਿੰਦਰ ਕੁਮਾਰ ਪੁਲੀਸ ਪਾਰਟੀ ਨਾਲ ਹੁੱਡਾ ਸੈਕਟਰ ਰੇਲਵੇ ਓਵਰ ਬ੍ਰਿਜ ਕਾਲਾਂਵਾਲੀ ’ਤੇ ਰਾਤ ਦੀ ਗਸ਼ਤ ਦੌਰਾਨ ਮੌਜੂਦ ਸੀ। ਇਸ ਦੌਰਾਨ ਮੁੱਖ ਕਾਂਸਟੇਬਲ ਨੂੰ ਅਹਿਮ ਸੂਚਨਾ ਮਿਲੀ ਕਿ ਹੁੱਡਾ ਸੈਕਟਰ ਨੇੜੇ ਰੇਲਵੇ ਲਾਈਨ ’ਤੇ ਬਣੀ ਪੀਰ ਦੀ ਦਰਗਾਹ ਕੋਲ ਜਨਤਕ ਥਾਂ ’ਤੇ ਲੋਕ ਵੱਡੇ ਪੱਧਰ ’ਤੇ ਜੂਆ ਖੇਡ ਰਹੇ ਹਨ। ਇਹ ਕਾਰਵਾਈ ਸੂਚਨਾ ਦੇ ਆਧਾਰ ’ਤੇ ਕੀਤੀ ਗਈ।