ਨਸ਼ੀਲੇ ਪਦਾਰਥਾਂ ਤੇ ਅਸਲੇ ਸਣੇ ਨੌਂ ਕਾਬੂ

ਨਿੱਜੀ ਪੱਤਰ ਪ੍ਰੇਰਕ

ਬਠਿੰਡਾ, 25 ਜੂਨ

ਬਠਿੰਡਾ ਪੁਲੀਸ ਨੇ 6 ਵੱਖ-ਵੱਖ ਮਾਮਲਿਆਂ ‘ਚ ਅਫੀਮ, ਭੁੱਕੀ, ਹੈਰੋਇਨ ਅਤੇ ਅਸਲਾ ਕਾਬੂ ਕਰਕੇ ਇਕ ਔਰਤ ਸਮੇਤ 9 ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਕੀਤੇ ਹਨ। ਜਾਣਕਾਰੀ ਅਨੁਸਾਰ ਤਲਵੰਡੀ ਸਾਬੋ ਪੁਲੀਸ ਨੇ ਪਿੰਡ ਜੰਡਾਂ ਵਾਲਾ ਦੇ ਸੁਖਦੇਵ ਸਿੰਘ ਉਰਫ਼ ਸੋਨਾ ਕੋਲੋਂ 40 ਗ੍ਰਾਮ ਹੈਰੋਇਨ ਤੋਂ ਇਲਾਵਾ ਇਕ ਪਿਸਤੌਲ 32 ਬੋਰ, ਇਕ ਰਿਵਾਲਵਰ 32 ਬੋਰ ਅਤੇ 3 ਜ਼ਿੰਦਾ ਰੌਂਦ ਬਰਾਮਦ ਕਰਕੇ ਉਸ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ। ਇਸੇ ਤਰ੍ਹਾਂ ਥਾਣਾ ਦਿਆਲਪੁਰਾ ਦੀ ਪੁਲੀਸ ਨੇ ਦਿਆਲਪੁਰਾ ਭਾਈਕਾ ਦੇ ਰਹਿਣ ਵਾਲੇ ਗੁਰਦੀਪ ਸਿੰਘ ਅਤੇ ਕੋਠਾ ਗੁਰੂ ਵਾਸੀ ਹਰਿੰਦਰ ਕੁਮਾਰ ਕੋਲੋਂ 3 ਕਿਲੋ ਅਫੀਮ ਸਮੇਤ ਆਈ-20 ਕਾਰ ਕਾਬੂ ਕਰਕੇ ਦੋਵਾਂ ਖ਼ਿਲਾਫ਼ ਪਰਚਾ ਦਰਜ ਕੀਤਾ ਹੈ। ਥਾਣਾ ਸਦਰ ਰਾਮਪੁਰਾ ਦੀ ਪੁਲੀਸ ਨੇ ਜੇਠੂ ਕੇ ਪਿੰਡ ਦੇ ਮਨਜੀਤ ਸਿੰਘ ਤੋਂ 10 ਗ੍ਰਾਮ ਹੈਰੋਇਨ ਅਤੇ ਇਕ ਮੋਟਰਸਾਈਕਲ ਕਾਬੂ ਕਰਕੇ ਉਸ ਖ਼ਿਲਾਫ਼ ਐਨਡੀਪੀਐਸ ਐਕਟ ਅਧੀਨ ਮਾਮਲਾ ਦਰਜ ਕੀਤਾ ਹੈ।

ਥਾਣਾ ਕੈਨਾਲ ਕਲੋਨੀ ਬਠਿੰਡਾ ਦੀ ਪੁਲੀਸ ਨੇ ਜੋਗੀ ਨਗਰ ਬਠਿੰਡਾ ਦੀ ਮਹਿਲਾ ਬਬੀਤਾ ਪਾਸੋਂ 6 ਗ੍ਰਾਮ ਹੈਰੋਇਨ ਬਰਾਮਦ ਕਰਕੇ ਉਸ ਖ਼ਿਲਾਫ਼ ਐਨਡੀਪੀਐਸ ਐਕਟ ਤਹਿਤ ਕੇਸ ਦਰਜ ਕੀਤਾ ਹੈ। ਥਾਣਾ ਕੈਂਟ ਬਠਿੰਡਾ ਦੀ ਪੁਲੀਸ ਨੇ ਸੰਗੂਆਣਾ ਬਸਤੀ ਦੇ ਰਹਿਣ ਵਾਲੇ ਸੂਰਜ ਅਤੇ ਕਾਂਗੜਾ ਜ਼ਿਲ੍ਹਾ ਦੇ ਪਿੰਡ ਨੰਗਲ ਦੇ ਪਵਨ ਕੁਮਾਰ ਕੋਲੋਂ 5 ਹੁੱਕੇ, 15 ਤੰਬਾਕੂ ਦੀਆਂ ਡੱਬੀਆਂ ਅਤੇ 3 ਕੋਲਿਆਂ ਦੀਆਂ ਡੱਬੀਆਂ ਬਰਾਮਦ ਕਰ ਕੇ ਦੋਵਾਂ ਖ਼ਿਲਾਫ਼ ਧਾਰਾ 21ਏ ਦਿ ਸਿਗਰੇਟ ਐਂਡ ਅਦਰ ਤੰਬਾਕੂ ਪ੍ਰੋਡਕਟਸ ਐਕਟ-2023 ਕਾਨੂੰਨ ਅਧੀਨ ਪਰਚਾ ਦਰਜ ਕੀਤਾ ਹੈ। ਥਾਣਾ ਨੰਦਗੜ੍ਹ ਪੁਲੀਸ ਨੇ ਜੰਗੀਰਾਣਾ ਵਾਸੀ ਸ਼ਿੰਦਰ ਸਿੰਘ ਅਤੇ ਘੁੱਦਾ ਨਿਵਾਸੀ ਦੌਲਤ ਰਾਮ ਕੋਲੋਂ 7 ਕਿਲੋ ਭੁੱਕੀ ਡੋਡੇ ਪੋਸਤ ਸਮੇਤ ਆਈ-20 ਕਾਰ ਕਾਬੂ ਕਰਕੇ ਦੋਵਾਂ ਖ਼ਿਲਾਫ਼ ਐਨਡੀਪੀਐਸ ਐਕਟ ਤਹਿਤ ਪਰਚਾ ਦਰਜ ਕੀਤਾ ਹੈ।