ਨੀਰਜ ਚੋਪਡ਼ਾ ਨੇ ਦੂਜੀ ਵਾਰ ਜਿੱਤਿਆ ਡਾਇਮੰਡ ਲੀਗ ਖਿ਼ਤਾਬ
ਲੁਸਾਨੇ, 1 ਜੁਲਾਈ
ਓਲੰਪਿਕ ਚੈਂਪੀਅਨ ਅਥਲੀਟ ਨੀਰਜ ਚੋਪਡ਼ਾ ਨੇ ਲੁਸਾਨੇ ਵਿੱਚ 87.66 ਮੀਟਰ ਦੀ ਦੂਰੀ ’ਤੇ ਨੇਜਾ ਸੁੱਟ ਕੇ ਲਗਾਤਾਰ ਦੂਜੀ ਵਾਰ ਡਾਇਮੰਡ ਲੀਗ ਦਾ ਖ਼ਿਤਾਬ ਜਿੱਤਿਆ ਹੈ। ਹਾਲਾਂਕਿ, ਸੱਟ ਕਾਰਨ ਲਗਪਗ ਇੱਕ ਮਹੀਨੇ ਖੇਡ ਤੋਂ ਦੂਰ ਰਿਹਾ ਨੀਰਜ 90 ਮੀਟਰ ਦੇ ਅਾਪਣੇ ਵਿਅਕਤੀਗਤ ਟੀਚੇ ਨੂੰ ਹਾਸਲ ਕਰਨ ਤੋਂ ਖੁੰਝ ਗਿਆ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਕੇਂਦਰੀ ਖੇਡ ਮੰਤਰੀ ਅਨੁਰਾਗ ਠਾਕੁਰ ਅਤੇ ਓਲੰਪਿਕ ਸੋਨ ਤਗ਼ਮਾ ਜੇਤੂ ਨਿਸ਼ਾਨੇਬਾਜ਼ ਅਭਿਨਵ ਬਿੰਦਰਾ ਨੇ ਨੀਰਜ ਚੋਪਡ਼ਾ ਨੂੰ ਇਸ ਪ੍ਰਾਪਤੀ ਲਈ ਵਧਾਈ ਦਿੱਤੀ ਹੈ।
25 ਸਾਲ ਦੇ ਚੋਪਡ਼ਾ ਨੇ ਮਾਸਪੇਸ਼ੀਆਂ ਵਿੱਚ ਖਿਚਾਅ ਕਾਰਨ ਪਿਛਲੇ ਮਹੀਨੇ ਤਿੰਨ ਵੱਡੇ ਮੁਕਾਬਲਿਆਂ ਵਿੱਚ ਹਿੱਸਾ ਨਹੀਂ ਲਿਆ ਸੀ। ਉਸ ਨੇ 5 ਮਈ ਨੂੰ ਦੋਹਾ ਵਿੱਚ 88.67 ਮੀਟਰ ਦੀ ਦੂਰੀ ਤੱਕ ਨੇਜਾ ਸੁੱਟ ਕੇ ਡਾਇਮੰਡ ਲੀਗ ਜਿੱਤੀ ਸੀ। ਇਹ ਉਸ ਦੇ ਕਰੀਅਰ ਦਾ ਚੌਥਾ ਸਰਵੋਤਮ ਪ੍ਰਦਰਸ਼ਨ ਸੀ। ਚੋਪਡ਼ਾ ਆਮ ਤੌਰ ’ਤੇ ਸ਼ੁਰੂਆਤੀ ਗੇਡ਼ ਵਿੱਚ ਸਰਵੋਤਮ ਪ੍ਰਦਰਸ਼ਨ ਕਰਦਾ ਹੈ, ਪਰ ਇੱਥੇ ਸਿਖਰਲਾ ਸਥਾਨ ਹਾਸਲ ਕਰਨ ਲਈ ਉਸ ਨੂੰ ਪੰਜਵੇਂ ਯਤਨ ਦੀ ਉਡੀਕ ਕਰਨੀ ਪਈ। ਚੌਥੇ ਗੇਡ਼ ਦੀ ਸਮਾਪਤੀ ਤੱਕ ਉਹ ਦੂਸਰੇ ਸਥਾਨ ’ਤੇ ਸੀ।
ਨੀਰਜ ਨੇ ਖ਼ਿਤਾਬ ਜਿੱਤਣ ਮਗਰੋਂ ਕਿਹਾ, ‘‘ਸੱਟ ਮਗਰੋਂ ਵਾਪਸੀ ਕਰਨ ਕਾਰਨ ਮੈਂ ਥੋਡ਼੍ਹਾ ਘਬਰਾਇਆ ਹੋਇਆ ਸੀ। ਇੱਥੇ ਥੋਡ਼੍ਹੀ ਠੰਢ ਵੀ ਸੀ। ਮੈਂ ਹੁਣ ਵੀ ਆਪਣੇ ਸਰਵੋਤਮ ਤੋਂ ਦੂਰ ਹਾਂ, ਪਰ ਮੈਨੂੰ ਲਗਦਾ ਹੈ ਕਿ ਇਸ ਵਿੱਚ ਸੁਧਾਰ ਜਾਰੀ ਹੈ।’’ -ਪੀਟੀਆਈ