ਬੰਗਲੂਰੂ ’ਚ ਕੌਮੀ ਜੂਨੀਅਰ ਹਾਕੀ ਕੈਂਪ ਐਤਵਾਰ ਤੋਂ

ਬੰਗਲੂਰੂ, 15 ਜੂਨ

ਹਾਕੀ ਇੰਡੀਆ ਨੇ ਇੱਥੇ ਭਾਰਤੀ ਖੇਡ ਅਥਾਰਟੀ (ਸਾਈ) ਸੈਂਟਰ ’ਚ 16 ਜੂਨ ਤੋਂ ਸ਼ੁਰੂ ਹੋਣ ਵਾਲੇ ਪੁਰਸ਼ਾਂ ਦੇ 63 ਰੋਜ਼ਾ ਕੌਮੀ ਜੂਨੀਅਰ ਹਾਕੀ ਕੋਚਿੰਗ ਕੈਂਪ ਲਈ ਅੱਜ 40 ਖਿਡਾਰੀਆਂ ਦੇ ਸੰਭਾਵੀ ਕੋਰ ਗਰੁੱਪ ਦਾ ਐਲਾਨ ਕੀਤਾ ਹੈ। ਇਹ ਕੈਂਪ ਭਾਰਤੀ ਜੂਨੀਅਰ ਹਾਕੀ ਟੀਮ ਦੇ ਪਿਛਲੇ ਮਹੀਨੇ ਯੂਰੋਪ ਦੇ ਦੌਰੇ ਦੌਰਾਨ ਨਿਰਾਸ਼ਾਜਨਕ ਪ੍ਰਦਰਸ਼ਨ ਤੋਂ ਬਾਅਦ ਲਾਇਆ ਜਾ ਰਿਹਾ ਹੈ। ਦੌਰੇ ਦੌਰਾਨ ਭਾਰਤੀ ਟੀਮ ਨੇ ਬੈਲਜੀਅਮ, ਜਰਮਨੀ ਤੇ ਨੈਦਰਲੈਂਡਸ ਦੇ ਖ਼ਿਲਾਫ਼ ਮੈਚ ਖੇਡੇ ਸਨ। ਇਹ ਕੈਂਪ 18 ਅਗਸਤ ਤੱਕ ਚੱਲੇਗਾ ਜਿਸ ਦੀ ਨਿਗਰਾਨੀ ਕੋਚ ਜਨਾਰਦਨ ਸੀ.ਬੀ. ਅਤੇ ਹਾਕੀ ਇੰਡੀਆ ਦੇ ਹਾਈ ਪ੍ਰਫਾਰਮੈਂਸ ਡਾਇਰੈਕਟਰ ਹਰਮਨ ਕਰੂਇਸ ਕਰਨਗੇ। -ਪੀਟੀਆਈ