ਪਰਬਤਰੋਹੀ ਤੇਗਬੀਰ ਸਿੰਘ ਘਰ ਪਰਤਿਆ

ਰੂਪਨਗਰ (ਪੱਤਰ ਪ੍ਰੇਰਕ): ਸਥਾਨਕ ਸ਼ਿਵਾਲਿਕ ਪਬਲਿਕ ਸਕੂਲ ਰੂਪਨਗਰ ਦਾ ਪਹਿਲੀ ਜਮਾਤ ਦਾ ਪੰਜ ਸਾਲਾ ਵਿਦਿਆਰਥੀ ਅਫਰੀਕਾ ਮਹਾਂਦੀਪ ਦੀ ਸਭ ਤੋਂ ਉੱਚੀ ਚੋਟੀ ਕਿਲੀਮੰਜਾਰੋ ਨੂੰ ਸਰ ਕਰ ਕੇ ਆਪਣੇ ਪਿਤਾ ਸੁਖਿੰਦਰਦੀਪ ਸਿੰਘ ਸਣੇ ਘਰ ਪਰਤ ਆਇਆ ਹੈ। ਅੱਜ ਬੇਲਾ ਚੌਕ ਵਿੱਚ ਵਿਧਾਇਕ ਦਿਨੇਸ਼ ਚੱਢਾ ਤੇ ਸਰਜਨ ਡਾ. ਆਰਐਸ ਪਰਮਾਰ ਦੀ ਅਗਵਾਈ ਅਧੀਨ ਸ਼ਹਿਰ ਵਾਸੀਆਂ ਨੇ ਨੰਨ੍ਹੇ ਪਰਬਤਰੋਹੀ ਦਾ ਸ਼ਾਨਦਾਰ ਸਵਾਗਤ ਕੀਤਾ। ਇਸ ਦੌਰਾਨ ਕੁਲਵੰਤ ਸਿੰਘ, ਡਾ. ਐਚਐਨ ਸ਼ਰਮਾ, ਭਾਜਪਾ ਆਗੂ ਹਰਮਿੰਦਰਪਾਲ ਸਿੰਘ ਆਹਲੂਵਾਲੀਆ, ਪਰਬਤਰੋਹੀ ਸਾਨਵੀ ਸੂਦ, ਡਾ. ਪਵਨ ਸ਼ਰਮਾ, ਪ੍ਰਿੰਸੀਪਲ ਬਲਜੀਤ ਸਿੰਘ ਅੱਤਰੀ, ਕੋਚ ਬਿਕਰਜੀਤ ਸਿੰਘ ਘੁੰਮਣ ਆਦਿ ਹਾਜ਼ਰ ਸਨ।