ਮੋਟਰਸਾਈਕਲ ਸਵਾਰਾਂ ਨੇ ਚੇਨ ਝਪਟੀ

ਲੁਧਿਆਣਾ: ਅਣਪਛਾਤੇ ਮੋਟਰਸਾਈਕਲ ਸਵਾਰ ਦੋ ਵਿਅਕਤੀ ਥਾਣਾ ਟਿੱਬਾ ਦੇ ਇਲਾਕੇ ਵਿੱਚ ਸ਼ਰਮਾ ਕਲੈਕਸ਼ਨ ਮੇਨ ਟਾਵਰ ਲਾਈਨ ਨੰਬਰ 5, ਨਿਊ ਸੁਭਾਸ਼ ਨਗਰ ਦੇ ਮਾਲਕ ਦੀ ਸੋਨੇ ਦੀ ਚੇਨ ਝਪਟ ਕੇ ਲੈ ਗਏ ਹਨ। ਇਸ ਸਬੰਧੀ ਨਿਊ ਸ਼ਿਵਾ ਜੀ ਨਗਰ ਵਾਸੀ ਪਾਰਸ ਸ਼ਰਮਾ ਨੇ ਦੱਸਿਆ ਕਿ ਉਹ ਆਪਣੀ ਸ਼ਰਮਾ ਕਲੈਕਸ਼ਨ ਰੈਡੀਮੇਡ ਗਾਰਮੈਂਟ ਦੀ ਦੁਕਾਨ ’ਤੇ ਬੈਠਾ ਸੀ ਕਿ ਇਸ ਦੌਰਾਨ ਦੋ ਅਣਪਛਾਤੇ ਲੜਕੇ ਇੱਕ ਮੋਟਰਸਾਈਕਲ ’ਤੇ ਆਏ। ਇਸ ਦੌਰਾਨ ਇੱਕ ਲੜਕਾ ਦੁਕਾਨ ਅੰਦਰ ਕੁੱਝ ਖਰੀਦਣ ਦੇ ਬਹਾਨੇ ਦਾਖਲ ਹੋਇਆ ਜੋ ਮੋਬਾਈਲ ’ਤੇ ਕਿਸੇ ਨਾਲ ਗੱਲ ਕਰ ਰਿਹਾ ਸੀ। ਉਸਨੇ ਇੱਕਦਮ ਝਪਟ ਮਾਰ ਕੇ ਉਸਦੇ ਗਲ ਵਿੱਚ ਪਾਈ ਸੋਨੇ ਦੀ ਚੇਨ ਲਾਹੀ ਅਤੇ ਮੋਟਰਸਾਈਕਲ ’ਤੇ ਫ਼ਰਾਰ ਹੋ ਗਏ। -ਨਿੱਜੀ ਪੱਤਰ ਪ੍ਰੇਰਕ