ਆਂਧਰਾ ਪ੍ਰਦੇਸ਼ ਤੋਂ ਮੇਅਰ ਤੇ 45 ਕੌਂਸਲਰ ਨਿਗਮ ਦਫਤਰ ਪੁੱਜੇ

ਖੇਤਰੀ ਪ੍ਰਤੀਨਿਧ

ਅੰਮ੍ਰਿਤਸਰ, 11 ਜੂਨ

ਅੰਮ੍ਰਿਤਸਰ ਦੇ ਦੌਰੇ ਦੌਰਾਨ ਆਂਧਰਾ ਪ੍ਰਦੇਸ਼ ਦੇ ਓਂਗਲ ਸ਼ਹਿਰ ਤੋਂ ਮੇਅਰ ਸੁਜਾਤਾ, ਡਿਪਟੀ ਮੇਅਰ ਵੀ.ਸੂਰਿਆਨਰਾਇਣ ਤੇ 45 ਕੌਂਸਲਰ ਨਗਰ ਨਿਗਮ ਦੇ ਮੁੱਖ ਦਫਤਰ ਰਣਜੀਤ ਐਵੇਨਿਊ ਪਹੁੰਚੇ ਜਿਥੇ ਨਿਗਮ ਕਮਿਸ਼ਨਰ ਸੰਦੀਪ ਰਿਸ਼ੀ ਨੇ ਭਰਵਾਂ ਸਵਾਗਤ ਕੀਤਾ। ਮੀਟਿੰਗ ਹਾਲ ਵਿੱਚ ਦੋਨਾਂ ਨਿਗਮਾਂ ਦੀਆਂ ਟੀਮਾਂ ਨੇ ਵਿਚਾਰ ਚਰਚਾ ਕੀਤੀ। ਓਂਗਲ ਦੀ ਮੇਅਰ ਤੇ ਟੀਮ ਵਲੋਂ ਅੰਮ੍ਰਿਤਸਰ ਨਗਰ ਨਿਗਮ ਦੀ ਕਾਰਜਸ਼ੈਲੀ ਦਾ ਅਧਿਐਨ ਕੀਤਾ ਅਤੇ ਵਿਚਾਰ ਸਾਂਝੇ ਕੀਤੇ ਗਏ। ਕਮਿਸ਼ਨਰ ਨੇ ਅੰਮ੍ਰਿਤਸਰ ਵਿੱਚ ਚੱਲ ਰਹੇ ਵਿਕਾਸ ਕਾਰਜਾਂ ਖਾਸਕਰ ਸਮਾਰਟ ਸਿਟੀ ਅਤੇ ਕੇਂਦਰ ਤੇ ਪੰਜਾਬ ਸਰਕਾਰ ਵਲੋਂ ਮਿਲ ਰਹੀਆਂ ਗਰਾਂਟਾਂ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਨੇ ਗੁਰੂ ਨਗਰੀ ਵਾਸੀਆਂ ਨੂੰ ਦਿੱਤੀਆਂ ਜਾ ਰਹੀਆਂ ਮੁੱਢਲੀਆਂ ਸਹੁਲਤਾਂ ਬਾਰੇ ਵਿਸਥਾਰ ਸਹਿਤ ਦੱਸਿਆ। ਰਿਸ਼ੀ ਨੇ ਨਗਰ ਨਿਗਮ ਦੇ ਵੱਖ-ਵੱਖ ਹੈਡਾਂ ਤੋਂ ਆਉਂਦੇ ਟੈਕਸ ਬਾਰੇ ਵੀ ਜਾਣਕਾਰੀ ਦਿੱਤੀ। ਓਂਗਲ ਦੀ ਮੇਅਰ ਨੇ ਅੰਮ੍ਰਿਤਸਰ ਵਾਸੀਆਂ ਦੀ ਮਹਿਮਾਨਨਿਵਾਜ਼ੀ ਦੀ ਸ਼ਲ਼ਾਘਾ ਕੀਤੀ।