ਮਸੀਂਗਣ ਦਾ ਕਬੱਡੀ ਕੱਪ ਬਲਬੇੜਾ ਕਲੱਬ ਦੇ ਗੱਭਰੂਆਂ ਨੇ ਜਿੱਤਿਆ

ਪੱਤਰ ਪ੍ਰੇਰਕ

ਦੇਵੀਗੜ੍ਹ, 13 ਜੂਨ

ਇਥੋਂ ਨੇੜਲੇ ਪਿੰਡ ਮਸੀਂਗਣ ਵਿੱਚ ਪੀਰ ਯੋਗੀ ਸ਼ਾਹ ਦੀ ਦਰਗਾਹ ‘ਤੇ ਜੋੜ ਮੇਲਾ ਮਨਾਇਆ ਗਿਆ। ਇਸ ਮੌਕੇ ਦੁਪਹਿਰ ਤੱਕ ਧਾਰਮਿਕ ਸਮਾਗਮ ਕਰਵਾਇਆ ਗਿਆ ਅਤੇ ਦੁਪਹਿਰ ਬਾਅਦ ਖੇਡ ਮੇਲਾ ਕਮੇਟੀ ਵਲੋਂ ਇਲਾਕੇ ਦੇ ਸਹਿਯੋਗ ਨਾਲ ਪ੍ਰਧਾਨ ਗੁਰਨਾਮ ਸਿੰਘ ਸਰਪੰਚ ਦੀ ਅਗਵਾਈ ਹੇਠ ਕਬੱਡੀ ਟੂਰਨਾਮੈਂਟ ਕਰਵਾਇਆ ਗਿਆ। ਇਸ ਵਿੱਚ ਡੇਢ ਦਰਜਨ ਦੇ ਕਰੀਬ ਕਬੱਡੀ ਦੀਆਂ ਟੀਮਾਂ ਨੇ ਹਿੱਸਾ ਲਿਆ। ਲੜਕੀਆਂ ਦੀਆਂ ਦੋ ਟੀਮਾਂ ਨੇ ਵਧੀਆ ਕਬੱਡੀ ਦੇ ਜੋਹਰ ਦਿਖਾਏ। ਇਸ ਮੌਕੇ ਕਬੱਡੀ ਖਿਡਾਰੀ ਵੀਰੂ ਘਨੌਰ ਦਾ ਵੀ ਸਨਮਾਨ ਕੀਤਾ ਗਿਆ। ਲੜਕਿਆਂ ਦੀ ਬਲਬੇੜਾ ਕਲੱਬ ਦੀ ਜੇਤੂ ਟੀਮ ਨੂੰ 70 ਹਜ਼ਾਰ ਰੁਪਏ ਦਾ ਇਨਾਮ ਅਤੇ ਦੂਜੇ ਸਥਾਨ ਤੇ ਅਵਤਾਰ ਕਲੱਬ ਕੌਰਜੀਵਾਲਾ ਦੀ ਆਉਣ ਵਾਲੀ ਟੀਮ ਨੂੰ 50 ਹਜ਼ਾਰ ਰੁਪਏ ਦਾ ਇਨਾਮ ਦਿੱਤਾ ਗਿਆ। ਲੜਕੀਆਂ ਦੀ ਕਬੱਡੀ ਦੀ ਜੇਤੂ ਟੀਮ ਨੂੰ 21 ਹਜ਼ਾਰ ਰੁਪਏ ਅਤੇ ਦੂਜੇ ਸਥਾਨ ਤੇ ਆਉਣ ਵਾਲੀ ਟੀਮ ਨੂੰ 15 ਹਜ਼ਾਰ ਰੁਪਏ ਦੇ ਇਨਾਮ ਦਿੱਤੇ ਗਏ। ਜੇਤੂ ਟੀਮਾਂ ਨੂੰ ਇਨਾਮ ਵੰਡਣ ਦੀ ਰਸਮ ਹਲਕਾ ਸਨੌਰ ਦੇ ਵਿਧਾਇਕ ਹਰਮੀਤ ਸਿੰਘ ਪਠਾਣਮਾਜਰਾ ਦੇ ਭਰਾ ਅਮਨ ਪਠਾਣਮਾਜਰਾ ਤੇ ਪਰਦੀਪ ਪਠਾਣਮਾਜਰਾ ਨੇ ਨਿਭਾਈ।