ਮਨੋਜ ਬਾਜਪਾਈ ਵੱਲੋਂ ਫ਼ਿਲਮ ‘ਭਈਆਜੀ’ ਬਣਾਉਣ ਦਾ ਐਲਾਨ

ਮੁੰਬਈ: ਅਦਾਕਾਰ ਮਨੋਜ ਬਾਜਪਾਈ ਨੇ ਆਖਿਆ ਕਿ ਉਸ ਦੀ ਆਉਣ ਵਾਲੀ ਨਵੀਂ ਫ਼ਿਲਮ ਦਾ ਨਾਮ ‘ਭਈਆਜੀ’ ਹੋਵੇਗਾ। ਜਾਣਕਾਰੀ ਮੁਤਾਬਕ ‘ਭਈਆਜੀ’ ਐਕਸ਼ਨ ਭਰਪੂਰ ਫ਼ਿਲਮ ਹੈ ਜੋ ਪਰਿਵਾਰਕ ਮੋਹ ਦੀਆਂ ਤੰਦਾਂ ਦੀ ਬਾਤ ਵੀ ਪਾਉਂਦੀ ਹੈ। ਇਹ ਫ਼ਿਲਮ ਸਤੰਬਰ ਮਹੀਨੇ ਦੇ ਅੱਧ ਤੱਕ ਯੂੁਪੀ ਦੇ ਸਿਨੇਮਾ ਘਰਾਂ ਵਿੱਚ ਰਿਲੀਜ਼ ਹੋਣ ਦੀ ਸੰਭਾਵਨਾ ਹੈ। ਮਨੋਜ ਬਾਜਪਾਈ ਨੇ ਆਖਿਆ ਕਿ ,‘ਮੈਂ ‘ਭਈਆਜੀ’ ਦੇ ਕਿਰਦਾਰ ਨੂੰ ਨਿਭਾਉਣ ਲਈ ਖੁਸ਼ ਹਾਂ, ਕਿਉਂਕਿ ਇਹ ਅਜਿਹਾ ਗੰਭੀਰ ਕਿਰਦਾਰ ਹੋਵੇਗਾ , ਜਿਸ ਰਾਹੀਂ ਮੈਂ ਜ਼ਿੰਦਗੀ ਦੇ ਪੱਖਾਂ ’ਤੇ ਚਾਨਣਾ ਪਾਉਣਾ ਚਾਹੁੰਦਾ ਹਾਂ। ਇਹ ਫ਼ਿਲਮ ਮੈਂ ਇਸ ਲਈ ਵੀ ਕਰ ਰਿਹਾ ਹਾਂ ਕਿਉਂਕਿ ਫ਼ਿਲਮ ‘ਸਿਰਫ ਏਕ ਬੰਦਾ ਕਾਫੀ ਹੈ’ ਦਾ ਨਿਰਦੇਸ਼ਨ ਕਰਨ ਵਾਲੇ ਅਪੂਰਵ ਸਿੰਘ ਕਰਕੀ ‘ਭਈਆਜੀ’ ਦੇ ਪ੍ਰੋਡਿਊਸਰ ਹਨ।’’ ਅਪੂਰਵ ਨੇ ਕਿਹਾ,‘ਭਈਆਜੀ’ ਫ਼ਿਲਮ ਰਾਹੀਂ ਹੁਣ ਮੈਂ ਸਿਨੇਮਾ ਦਾ ਵੱਖਰਾ ਰੂਪ ਦਿਖਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹਾਂ। ਇਸ ਲਈ ‘ਭਈਆਜੀ’ ਫ਼ਿਲਮ ਤੇ ਮਨੋਜ ਬਾਜਾਪਈ ਦਾ ਕਿਰਦਾਰ ਨਿਭਾਉਣਾ ਬਿਲਕੁਲ ਢੁਕਵਾਂ ਸੁਮੇਲ ਹਨ।’’ ਇਸ ਫ਼ਿਲਮ ਦੇ ਹੋਰ ਕਿਰਦਾਰਾਂ ਬਾਰੇ ਅਜੇ ਜਾਣਕਾਰੀ ਨਸ਼ਰ ਨਹੀਂ ਕੀਤੀ ਗਈ। ‘ਭਈਆਜੀ’ ਦਾ ਨਿਰਮਾਣ ਵਿਨੋਦ ਭਾਨੂਸ਼ਾਲੀ, ਕਮਲੇਸ਼ ਭਾਨੂਸ਼ਾਲੀ, ਸਮੀਕਸ਼ਾ ਓਸਵਾਲ, ਸ਼ੈਲ ਓਸਵਾਲ, ਸ਼ਬਾਨਾ ਰਜ਼ਾ ਬਾਜਪਈ ਵੱਲੋਂ ਕੀਤਾ ਜਾ ਰਿਹਾ ਹੈ। -ਏਐੱਨਆਈ