ਸੁਨਾਮ ਵਿੱਚ ਕਬਾੜ ਦੇ ਗੁਦਾਮ ’ਚ ਅੱਗ ਲੱਗਣ ਕਾਰਨ ਲੱਖਾਂ ਦਾ ਨੁਕਸਾਨ

ਬੀਰ ਇੰਦਰ ਸਿੰਘ ਬਨਭੌਰੀ
ਸੁਨਾਮ ਊਧਮ ਸਿੰਘ ਵਾਲਾ, 3 ਨਵੰਬਰ
ਇੱਥੇ ਸੁਨਾਮ-ਬਠਿੰਡਾ ਰੋਡ ’ਤੇ ਸਥਾਨ ਕਬਾੜ ਦੇ ਇਕ ਓਪਨ ਗੁਦਾਮ ਵਿੱਚ ਬੀਤੀ ਰਾਤ ਅੱਗ ਲੱਗਣ ਕਾਰਨ ਲੱਖਾਂ ਰੁਪਏ ਦਾ ਨੁਕਸਾਨ ਹੋ ਗਿਆ। ਕਬਾੜ ਦਾ ਇਹ ਗੁਦਾਮ ਸੁਨਾਮ-ਬਠਿੰਡਾ ਮਾਰਗ ’ਤੇ ਗੁੱਝਾਪੀਰ ਬਸਤੀ ਨੇੜੇ ਸੀ। ਓਪਨ ਗੁਦਾਮ ਵਿੱਚ ਅੱਗ ਕਿਵੇਂ ਲੱਗੀ, ਇਸ ਬਾਰੇ ਪਤਾ ਨਹੀਂ ਲੱਗ ਸਕਿਆ ਹੈ ਪ੍ਰੰਤੂ ਮੌਕੇ ’ਤੇ ਮੌਜੂਦ ਲੋਕਾਂ ਨੂੰ ਖ਼ਦਸ਼ਾ ਸੀ ਕਿ ਕਬਾੜ ਨੂੰ ਅੱਗ ਦੀਵਾਲੀ ਮੌਕੇ ਚੱਲ ਰਹੇ ਪਟਾਕਿਆਂ ਦੀ ਚੰਗਿਆੜੀ ਤੋਂ ਲੱਗੀ। ਦੇਖਦੇ ਹੀ ਦੇਖਦੇ ਅੱਗ ਨੇ ਭਿਆਨਕ ਰੂਪ ਧਾਰ ਲਿਆ। ਸੂਚਨਾ ਮਿਲਣ ’ਤੇ ਅੱਗ ਬਝਾਊ ਗੱਡੀ ਮੌਕੇ ’ਤੇ ਪਹੁੰਚ ਗਈ ਪਰ ਅੱਗ ਐਨੀ ਜ਼ਿਆਦਾ ਫੈਲ ਚੁੱਕੀ ਸੀ ਕਿ ਅੱਗ ’ਤੇ ਕਾਬੂ ਪਾਉਣਾ ਮੁਸ਼ਕਲ ਹੋ ਗਿਆ। ਪ੍ਰਸ਼ਾਸਨ ਵੱਲੋਂ ਨੇੜਲੇ ਸ਼ਹਿਰਾਂ ਤੋਂ ਕਈ ਹੋਰ ਅੱਗ ਬਝਾਊ ਗੱਡੀਆਂ ਮੰਗਵਾਈਆਂ ਗਈਆਂ। ਕਈ ਅੱਗ ਬਝਾਊ ਗੱਡੀਆਂ ਵੱਲੋਂ ਕਾਫੀ ਜੱਦੋ-ਜਹਿਦ ਤੋਂ ਬਾਅਦ ਅੱਗ ’ਤੇ ਕਾਬੂ ਪਾਇਆ ਜਾ ਸਕਿਆ, ਪਰ ਉਦੋਂ ਤੱਕ ਕਬਾੜ ਦਾ ਪੂਰਾ ਗੁਦਾਮ ਸੜ ਕੇ ਸੁਆਹ ਹੋ ਚੁੱਕਾ ਸੀ।