ਪ੍ਰਜਵਲ ਦੀ ਇਤਰਾਜ਼ਯੋਗ ਵੀਡੀਓ ਜਾਰੀ ਕਰਨ ਪਿੱਛੇ ਕੁਮਾਰਸਵਾਮੀ ਦਾ ਹੱਥ: ਸ਼ਿਵਕੁਮਾਰ
ਚਿੱਕਮਗਲੂਰੂ, 8 ਮਈ
ਕਰਨਾਟਕ ਦੇ ਉਪ ਮੁੱਖ ਮੰਤਰੀ ਡੀਕੇ ਸ਼ਿਵਕੁਮਾਰ ਨੇ ਅੱਜ ਦੋਸ਼ ਲਾਇਆ ਕਿ ਸੰਸਦ ਮੈਂਬਰ ਪ੍ਰਜਵਲ ਰੇਵੰਨਾ ਨਾਲ ਸਬੰਧਤ ਇਤਰਾਜ਼ਯੋਗ ਵੀਡੀਓ ਜਾਰੀ ਕਰਨ ਪਿੱਛੇ ਜੇਡੀ(ਐੱਸ) ਆਗੂ ਐੱਚਡੀ ਕੁਮਾਰਸਵਾਮੀ ਦਾ ਹੱਥ ਹੈ। ਉਨ੍ਹਾਂ ਕਿਹਾ ਕਿ ਕੁਮਾਰਸਵਾਮੀ ‘ਬਲੈਕਮੇਲਿੰਗ ਵਿੱਚ ਮਾਹਿਰ’ ਹਨ ਅਤੇ ‘ਕਹਾਣੀ ਦੇ ਮੁੱਖ ਪਾਤਰ, ਨਿਰਦੇਸ਼ਕ ਅਤੇ ਨਿਰਮਾਤਾ’ ਹਨ। ਸ਼ਿਵਕੁਮਾਰ ਉਨ੍ਹਾਂ ਨੂੰ ਮੰਤਰੀ ਮੰਡਲ ਤੋਂ ਬਰਖਾਸਤ ਕਰਨ ਦੀ ਕੁਮਾਰਸਵਾਮੀ ਦੀ ਮੰਗ ’ਤੇ ਪ੍ਰਤੀਕਿਰਿਆ ਦੇ ਰਹੇ ਸਨ। ਕੁਮਾਰਸਵਾਮੀ ਨੇ ਸ਼ਿਵਕੁਮਾਰ ਨੂੰ ਕਥਿਤ ‘ਸੈਕਸ ਸਕੈਂਡਲ’ ਜਾਰੀ ਕਰਨ ਦਾ ਮੁੱਖ ਸਾਜ਼ਿਸ਼ਕਰਤਾ ਦੱਸਿਆ ਸੀ।
ਕੁਮਾਰਸਵਾਮੀ ਦਾ ਭਤੀਜਾ ਅਤੇ ਜਨਤਾ ਦਲ (ਐੱਸ) ਦਾ ਸੰਸਦ ਮੈਂਬਰ ਪ੍ਰਜਵਲ (33) ਜਿਨਸੀ ਸ਼ੋਸ਼ਣ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਿਹਾ ਹੈ। ਇਸ ਮੁੱਦੇ ਨੂੰ ਲੈ ਕੇ ਸੱਤਾਧਾਰੀ ਕਾਂਗਰਸ ਅਤੇ ਭਾਜਪਾ-ਜੇਡੀ(ਐੱਸ) ਵਿਚਾਲੇ ਸ਼ਬਦੀ ਜੰਗ ਚੱਲ ਰਹੀ ਹੈ।
ਸ਼ਿਵਕੁਮਾਰ ਨੇ ਕਿਹਾ, ‘‘ਕੁਮਾਰਸਵਾਮੀ ਨੂੰ (ਅਸ਼ਲੀਲ ਵੀਡੀਓ ਕਲਿੱਪ ਵਾਲੀ) ਪੈਨ ਡਰਾਈਵ ਮਾਮਲੇ ਦੀ ਪੂਰੀ ਜਾਣਕਾਰੀ ਸੀ। ਇੱਕ ਵਕੀਲ (ਦੇਵਰਾਜੇ ਗੌੜਾ) ਅਤੇ ਹੋਰ ਅਜਿਹਾ ਕਹਿ ਰਹੇ ਹਨ। ਕੁਮਾਰਸਵਾਮੀ ਮੇਰਾ ਅਸਤੀਫਾ ਚਾਹੁੰਦੇ ਹਨ। ਅਜਿਹਾ ਲੱਗਦਾ ਹੈ ਕਿ ਵੋਕਾਲਿਗਾ (ਭਾਈਚਾਰੇ) ਦੀ ਅਗਵਾਈ ਲਈ ਮੁਕਾਬਲਾ ਚੱਲ ਰਿਹਾ ਹੈ। ਉਹ ਚਾਹੁੰਦੇ ਹਨ ਕਿ ਮੈਂ ਉਨ੍ਹਾਂ ਦੇ ਕਹਿਣ ’ਤੇ ਅਸਤੀਫਾ ਦੇ ਦਿਆਂ।’’ -ਪੀਟੀਆਈ