ਖੇਲੋ ਇੰਡੀਆ ਪੈਰਾ ਖੇਡਾਂ: ਪਾਵਰਲਿਫਟਿੰਗ ’ਚ ਜਸਪ੍ਰੀਤ ਕੌਰ ਨੇ ਕੌਮੀ ਰਿਕਾਰਡ ਤੋੜਿਆ

* ਸ਼ੀਤਲ ਨੇ ਪਾਇਲ ਨੂੰ ਹਰਾ ਕੇ ਜਿੱਤਿਆ ਸੋਨ ਤਗ਼ਮਾ
* ਤਾਮਿਲ ਨਾਡੂ 22 ਸੋਨ ਤਗ਼ਮਿਆਂ ਨਾਲ ਸਿਖਰ ’ਤੇ

ਨਵੀਂ ਦਿੱਲੀ, 23 ਮਾਰਚ
ਪੰਜਾਬ ਦੀ ਪਾਵਰਲਿਫਟਰ ਜਸਪ੍ਰੀਤ ਕੌਰ ਨੇ ਅੱਜ ਇੱਥੇ ਖੇਲੋ ਇੰਡੀਆ ਪੈਰਾ ਖੇਡਾਂ (ਕੇਆਈਪੀਜੀ) ਦੇ ਚੌਥੇ ਦਿਨ 45 ਕਿਲੋ ਭਾਰ ਵਰਗ ਵਿੱਚ ਆਪਣਾ ਹੀ ਕੌਮੀ ਰਿਕਾਰਡ ਤੋੜ ਕੇ ਸੋਨ ਤਗ਼ਮਾ ਜਿੱਤਿਆ। ਚੌਥੇ ਦਿਨ ਤਾਮਿਲ ਨਾਡੂ 22 ਸੋਨ ਤਗ਼ਮਿਆਂ ਨਾਲ ਤਗ਼ਮਾ ਸੂਚੀ ਵਿੱਚ ਸਿਖਰ ’ਤੇ ਹੈ। ਹਰਿਆਣਾ 18 ਸੋਨ ਤਗ਼ਮਿਆਂ ਨਾਲ ਦੂਜੇ, ਜਦਕਿ ਉੱਤਰ ਪ੍ਰਦੇਸ਼ ਤੇ ਰਾਜਸਥਾਨ ਦੇ 13-13 ਤਗ਼ਮੇ ਹਨ। ਇਸ ਦੌਰਾਨ ਦੋ ‘ਵਿਸ਼ੇਸ਼’ ਤੀਰਅੰਦਾਜ਼ਾਂ ਸ਼ੀਤਲ ਦੇਵੀ ਅਤੇ ਪਾਇਲ ਨਾਗ ਦਾ ਵੀ ਪ੍ਰਦਰਸ਼ਨ ਸ਼ਾਨਦਾਰ ਰਿਹਾ। ਸ਼ੀਤਲ ਨੇ ਪਾਇਲ ਨੂੰ ਹਰਾ ਕੇ ਸੋਨ ਤਗ਼ਮਾ ਜਿੱਤਿਆ। ਜਸਪ੍ਰੀਤ ਕੌਰ (31 ਸਾਲ) 101 ਕਿਲੋਗ੍ਰਾਮ ਭਾਰ ਚੁੱਕ ਕੇ ਖੇਲੋ ਇੰਡੀਆ ਪੈਰਾ ਖੇਡਾਂ-2025 ਵਿੱਚ ਕੌਮੀ ਰਿਕਾਰਡ ਤੋੜਨ ਵਾਲੀ ਪਹਿਲੀ ਅਥਲੀਟ ਬਣ ਗਈ। ਉਸ ਨੇ 2023 ਗੇੜ ਵਿੱਚ ਵੀ ਇਸੇ ਮੁਕਾਬਲੇ ਵਿੱਚ ਸੋਨ ਤਗ਼ਮਾ ਜਿੱਤਿਆ ਸੀ। ਉਸ ਨੇ ਆਪਣਾ ਹੀ ਪਿਛਲਾ 100 ਕਿਲੋਗ੍ਰਾਮ ਦਾ ਕੌਮੀ ਰਿਕਾਰਡ ਤੋੜਿਆ। ਜਸਪ੍ਰੀਤ ਨੂੰ ਤਿੰਨ ਸਾਲ ਦੀ ਉਮਰ ਵਿੱਚ ਪੋਲੀਓ ਹੋ ਗਿਆ ਸੀ। ਉਧਰ, ਜੰਮੂ ਕਸ਼ਮੀਰ ਦੀ ਤੀਰਅੰਦਾਜ਼ ਤੇ ਪੈਰਾਲੰਪਿਕ ਤਗ਼ਮਾ ਜੇਤੂ ਸ਼ੀਤਲ ਦੇਵੀ ਨੇ ਮੁਕਾਬਲੇ ਵਿੱਚ ਉੜੀਸਾ ਦੀ ਪਾਇਲ ਨੂੰ ਹਰਾ ਕੇ ਸੋਨ ਤਗ਼ਮਾ ਆਪਣੇ ਨਾਮ ਕੀਤਾ। ਜਵਾਹਰਲਾਲ ਨਹਿਰੂ ਸਟੇਡੀਅਮ ਵਿੱਚ ਦੋਵਾਂ ਮੁਟਿਆਰਾਂ ਦਰਮਿਆਨ ਮੁਕਾਬਲੇ ਵਿੱਚ ਮੌਜੂਦਾ ਚੈਂਪੀਅਨ ਸ਼ੀਤਲ ਨੇ ਵਾਪਸੀ ਕਰਦਿਆਂ ਖੇਡਾਂ ਦਾ ਆਪਣਾ ਦੂਜਾ ਤਗ਼ਮਾ ਜਿੱਤਿਆ। 18 ਸਾਲਾ ਸ਼ੀਤਲ ਨੇ ਕੰਪਾਊਂਡਰੀ ਓਪਨ ਫਾਈਨਲ ਮੈਚ ਵਿੱਚ 17 ਸਾਲਾ ਪਾਇਲ ਖ਼ਿਲਾਫ਼ 109-103 ਨਾਲ ਜਿੱਤ ਦਰਜ ਕੀਤੀ। ਪਾਇਲ ਦੇ ਦੋਵੇਂ ਹੱਥ ਅਤੇ ਦੋਵੇਂ ਪੈਰ ਨਹੀਂ ਹਨ। -ਪੀਟੀਆਈ