ਕੰਗਨਾ ਰਣੌਤ ਦੀ ‘ਚੰਦਰਮੁਖੀ 2’ ਦਾ ਪੋਸਟਰ ਜਾਰੀ

ਮੁੰਬਈ: ਬੌਲੀਵੁਡ ਅਦਾਕਾਰਾ ਕੰਗਨਾ ਰਣੌਤ ਦੀ ਆਉਣ ਵਾਲੀ ਫਿਲਮ ‘ਚੰਦਰਮੁਖੀ 2’ ਦਾ ਅੱਜ ਪੋਸਟਰ ਜਾਰੀ ਹੋ ਗਿਆ ਹੈ। ਪੋਸਟਰ ’ਚ ਕੰਗਨਾ ਸ਼ਾਹੀ ਅੰਦਾਜ਼ ਵਿਚ ਖਾਸੀ ਫੱਬ ਰਹੀ ਹੈ। ਲਾਇਕਾ ਪ੍ਰੋਡਕਸ਼ਨਜ਼ ਨੇ ਇੰਸਟਾਗ੍ਰਾਮ ’ਤੇ ਇਹ ਪੋਸਟਰ ਕਈ ਭਾਸ਼ਾਵਾਂ ਵਿੱਚ ਜਾਰੀ ਕੀਤਾ। ਇਸ ਪੋਸਟਰ ਦੀ ਕੈਪਸ਼ਨ ਵਿਚ ਲਿਖਿਆ ਹੈ, ‘ਖੂਬਸੂਰਤੀ ਤੇ ਅੰਦਾਜ਼ ਆਸਾਨੀ ਨਾਲ ਸਾਡਾ ਧਿਆਨ ਖਿੱਚ ਲੈਂਦੇ ਹਨ! ਪੇਸ਼ ਹੈ # ਚੰਦਰਮੁਖੀ 2 ਤੋਂ ਚੰਦਰਮੁਖੀ ਦੇ ਰੂਪ ਵਿੱਚ # ਕੰਗਣਾ ਰਣੌਤ ਦੀ ਮੋਹਰੀ ਅਤੇ ਸ਼ਾਨਦਾਰ ਪਹਿਲੀ ਦਿੱਖ।’ ਇਹ ਪੋਸਟਰ ਤਾਮਿਲ, ਹਿੰਦੀ, ਤੇਲਗੂ, ਮਲਿਆਲਮ ਅਤੇ ਕੰਨੜ ਵਿੱਚ ਰਿਲੀਜ਼ ਕੀਤਾ ਗਿਆ, ਜਿਸ ਵਿਚ ਕੰਗਨਾ ਹਰੇ ਰੰਗ ਦੀ ਸਾੜ੍ਹੀ ਤੇ ਕਾਫੀ ਗਹਿਣੇ ਪਹਿਨੀ ਮਹਿਲ ਅੰਦਰ ਖੜ੍ਹੀ ਹੈ। ਇਸ ਫਿਲਮ ਦੇ ਨਿਰਦੇਸ਼ਕ ਪੀ ਵਾਸੂ ਹਨ। ਇਹ ਡਰਾਉਣੀ ਤੇ ਕਾਮੇਡੀ ਭਰਪੂਰ ਫਿਲਮ ‘ਚੰਦਰਮੁਖੀ’ ਦਾ ਅਗਲਾ ਭਾਗ ਹੈ ਜਿਸ ਵਿੱਚ ਰਜਨੀਕਾਂਤ ਅਤੇ ਜਯੋਤਿਕਾ ਨੇ ਮੁੱਖ ਭੂਮਿਕਾਵਾਂ ਨਿਭਾਈਆਂ ਸਨ। ‘ਚੰਦਰਮੁਖੀ 2’ ਵਿੱਚ ਕੰਗਨਾ ਰਾਜੇ ਦੇ ਦਰਬਾਰ ਵਿੱਚ ਨਰਤਕੀ ਦੀ ਭੂਮਿਕਾ ਨਿਭਾਏਗੀ ਜੋ ਆਪਣੀ ਸੁੰਦਰਤਾ ਅਤੇ ਨਾਚ ਲਈ ਜਾਣੀ ਜਾਂਦੀ ਸੀ। ਇਸ ਫਿਲਮ ’ਚ ਕੰਗਨਾ ਨਾਲ ਤਾਮਿਲ ਅਦਾਕਾਰ ਰਾਘਵ ਲਾਰੈਂਸ ਮੁੱਖ ਭੂਮਿਕਾ ਨਿਭਾਉਣਗੇ। ਇਹ ਫਿਲਮ ਗਣੇਸ਼ ਚਤੁਰਥੀ ਦੇ ਮੌਕੇ ’ਤੇ ਤਾਮਿਲ, ਤੇਲਗੂ, ਹਿੰਦੀ, ਮਲਿਆਲਮ ਅਤੇ ਕੰਨੜ ਵਿੱਚ ਰਿਲੀਜ਼ ਹੋਵੇਗੀ। -ਏਐੱਨਆਈ