ਕਮਲ ਹਾਸਨ ਨੇ ਜਨਮ ਦਿਨ ’ਤੇ ਫ਼ਿਲਮ ‘ਠੱਗ ਲਾਈਫ’ ਦਾ ਪੋਸਟਰ ਜਾਰੀ ਕੀਤਾ

ਮੁੰਬਈ: ਅਦਾਕਾਰ ਕਮਲ ਹਾਸਨ ਨੇ ਅੱਜ ਆਪਣੇ 70ਵੇਂ ਜਨਮ ਦਿਨ ਮੌਕੇ ਐਲਾਨ ਕੀਤਾ ਕਿ ਮਣੀ ਰਤਨਮ ਦੇ ਨਿਰਦੇਸ਼ਨ ਵਾਲੀ ਉਸ ਦੀ ਫ਼ਿਲਮ ‘ਠੱਗ ਲਾਈਫ’ ਅਗਲੇ ਸਾਲ 5 ਜੂਨ ਨੂੰ ਰਿਲੀਜ਼ ਹੋਵੇਗੀ। ਕਮਲ ਨੇ ਇੰਸਟਾਗ੍ਰਾਮ ’ਤੇ ਫ਼ਿਲਮ ਦਾ ਪੋਸਟਰ ਸਾਂਝਾ ਕੀਤਾ ਹੈ, ਜਿਸ ਵਿੱਚ ਆਉਣ ਵਾਲੀ ਫ਼ਿਲਮ ’ਚ ਉਸ ਵੱਲੋਂ ਨਿਭਾਏ ਕਿਰਦਾਰ ਦੀ ਪਹਿਲੀ ਝਲਕ ਦਿਖਾਈ ਗਈ ਹੈ। ਪੋਸਟਰ ’ਚ ਕਮਲ ਹਾਸਨ ਦੇ ਲੰਮੇ ਵਾਲ ਅਤੇ ਦਾੜ੍ਹੀ ਦਿਖਾਈ ਦੇ ਰਹੀ ਹੈ। ਇਸ ਵਿੱਚ ਸਿਲਾਮਬਾਰਸਨ ਟੀਆਰ ਵੀ ਨਜ਼ਰ ਆ ਰਿਹਾ ਹੈ। ਕਮਲ ਹਾਸਨ ਨੇ ਪੋਸਟਰ ਦੀ ਕੈਪਸ਼ਨ ’ਚ ਲਿਖਿਆ, ‘‘ਹਰੇਕ ਰੋਲ ਇੱਕ ਵਿਕਾਸ ਹੈ, ਹਰ ਫ਼ਿਲਮ ਇੱਕ ਸਫ਼ਰ ਹੈ। ਮਣੀ ਰਤਨਮ ਦੀ ਫ਼ਿਲਮ ‘ਠੱਗ ਲਾਈਫ’ 5 ਜੂਨ ਨੂੰ ਰਿਲੀਜ਼ ਹੋਵੇਗੀ।’’ ਠੱਗ ਲਾਈਫ ਕਮਲ ਹਾਸਨ ਦੀ 234ਵੀਂ ਫ਼ਿਲਮ ਹੈ, ਜਿਸ ਵਿੱਚ ਉਸ ਨੇ ਰੰਗਰਾਏ ਸ਼ਕਤੀਵੇਲ ਨਯਾਕਰ ਦਾ ਰੋਲ ਨਿਭਾਇਆ ਹੈ। ਉੱਘੇ ਅਦਾਕਾਰ ਕਮਲ ਹਾਸਨ ਦੇ ਨਾਲ ਇਸ ਫ਼ਿਲਮ ’ਚ ਸਿਲਾਮਬਾਰਸਨ ਟੀਆਰ, ਅਦਾਕਾਰਾ ਤ੍ਰਿਸ਼ਾ, ਅਭੀਰਾਮੀ ਅਤੇ ਨਾਸਰ ਨੇ ਵੀ ਕੰਮ ਕੀਤਾ ਹੈ। ਮਣੀ ਰਤਨਮ ਤੇ ਕਮਲ ਹਾਸਨ ਪਹਿਲਾਂ ਇਕੱਠੇ ਦੋ ਫ਼ਿਲਮਾਂ ‘ਨਯਾਕਨ’ ਅਤੇ ‘ਪੋਨੀਯਿਨ ਸੇਲਵਨ’ ਲਈ ਕੰਮ ਕਰ ਚੁੱਕੇ ਹਨ। ‘ਠੱਗ ਲਾਈਫ’ ਫ਼ਿਲਮ ਦਾ ਪ੍ਰਡਿਊੁਸਰ ਖ਼ੁਦ ਕਮਲ ਹਾਸਨ ਹੈ ਅਤੇ ਇਸ ਦਾ ਸੰਗੀਤ ਏ.ਆਰ. ਰਹਿਮਾਨ ਨੇ ਦਿੱਤਾ ਹੈ। ਇਹ ਫ਼ਿਲਮ 5 ਜੂਨ 2025 ਨੂੰ ਸਿਨੇਮਾ ਘਰਾਂ ’ਚ ਰਿਲੀਜ਼ ਹੋਣ ਲਈ ਤਿਆਰ ਹੈ। -ਆਈਏਐੱਨਐੱਸ