‘ਕਾਬੁਲੀਵਾਲਾ’ ਦਾ ਪੋਸਟਰ ਜਾਰੀ; ਅਫਗਾਨੀ ਦਾ ਕਿਰਦਾਰ ਨਿਭਾਏਗਾ ਮਿਥੁਨ ਚੱਕਰਵਰਤੀ

ਮੁੰਬਈ: ਉੱਘੇ ਬੌਲੀਵੁਡ ਅਦਾਕਾਰ ਮਿਥੁਨ ਚੱਕਰਵਰਤੀ ਦੀ ਆਉਣ ਵਾਲੀ ਫਿਲਮ ‘ਕਾਬੁਲੀਵਾਲਾ’ ਦਾ ਪੋਸਟਰ ਅੱਜ ਬਾਲ ਦਿਵਸ ਮੌਕੇ ਰਿਲੀਜ਼ ਕੀਤਾ ਗਿਆ। ਇਸ ਪੋਸਟਰ ਵਿਚ ਮਿਥੁਨ ਅਫਗਾਨੀ ਦੇ ਕਿਰਦਾਰ ਵਿਚ ਇਕ ਪਿਆਰੀ ਜਿਹੀ ਬੱਚੀ ਨਾਲ ਸੜਕ ’ਤੇ ਚਲਦਾ ਨਜ਼ਰ ਆ ਰਿਹਾ ਹੈ ਜਿਸ ਦੇ ਪਿੱਛੇ ਸ਼ਹਿਰ ਦੀ ਪੁਰਾਣੀ ਵਾਸਤੂ ਕਲਾ ਅਤੇ ਬੰਗਲਾ ਭਾਸ਼ਾ ਵਾਲੇ ਬੈਨਰ ਦਿਖਾਈ ਦੇ ਰਹੇ ਹਨ ਤੇ ਉਨ੍ਹਾਂ ਦੇ ਪਿਛੋਕੜ ਵਿੱਚ ਕੁਝ ਲੋਕ ਵੀ ਬੈਠੇ ਹੋਏ ਹਨ। ਇਹ ਫਿਲਮ ਰਾਬਿੰਦਰਨਾਥ ਟੈਗੋਰ ਦੀ ਛੋਟੀ ਕਹਾਣੀ ’ਤੇ ਆਧਾਰਿਤ ਹੈ ਜਿਸ ਦੀ 60 ਫੀਸਦੀ ਕਹਾਣੀ ਕੋਲਕਾਤਾ ਵਿੱਚ ਅਤੇ ਬਾਕੀ ਅਫਗਾਨਿਸਤਾਨ ਵਿੱਚ ਫਿਲਮਾਈ ਗਈ ਹੈ। ਇਸ ਫਿਲਮ ਵਿਚ ਮਿਥੁਨ ਰਹਿਮਤ ਦਾ ਕਿਰਦਾਰ ਨਿਭਾ ਰਿਹਾ ਹੈ ਜਦਕਿ ਅਨੁਮੇਘਾ ਪਿਆਰੀ ਬੱਚੀ ਮਿਨੀ ਦਾ ਕਿਰਦਾਰ ਨਿਭਾ ਰਹੀ ਹੈ। ਉਨ੍ਹਾਂ ਦੇ ਨਾਲ ਅਬੀਰ ਚੈਟਰਜੀ ਅਤੇ ਸੋਹਿਨੀ ਸਰਕਾਰ ਹਨ ਜੋ ਮਿਨੀ ਦੇ ਮਾਪਿਆਂ ਦੀ ਭੂਮਿਕਾ ਵਿਚ ਹਨ। ਇਸ ਫਿਲਮ ਵਿਚ ਮਿਥੁਨ ਅਧਖੜ ਉਮਰ ਦੇ ਅਫਗਾਨ ਦੇ ਕਿਰਦਾਰ ਵਿਚ ਹੈ। ਇਹ ਫਿਲਮ ਇਸ ਸਾਲ ਕ੍ਰਿਸਮਸ ਮੌਕੇ ਰਿਲੀਜ਼ ਹੋਵੇਗੀ। -ਆਈਏਐੱਨਐੱਸ