ਜੇਜੋਂ ਹਾਦਸਾ: ਪੋਸਟਮਾਰਟਮ ਮਗਰੋਂ ਨੌਂ ਲਾਸ਼ਾਂ ਵਾਰਸਾਂ ਨੂੰ ਸੌਂਪੀਆਂ

ਪੱਤਰ ਪ੍ਰੇਰਕ
ਹੁਸ਼ਿਆਰਪੁਰ/ਗੜ੍ਹਸ਼ੰਕਰ, 12 ਅਗਸਤ
ਜੇਜੋਂ ਵਿੱਚ ਕੱਲ੍ਹ ਆਏ ਹੜ੍ਹ ਕਾਰਨ ਇੱਕ ਇਨੋਵਾ ਗੱਡੀ ਦੇ ਰੁੜ੍ਹ ਜਾਣ ਕਾਰਨ ਜਾਨ ਗੁਆਉਣ ਵਾਲੇ 9 ਜਣਿਆਂ ਦਾ ਅੱਜ ਇੱਥੋਂ ਦੇ ਸਿਵਲ ਹਸਪਤਾਲ ਵਿੱਚ ਪੋਸਟ ਮਾਰਟਮ ਹੋਇਆ। ਮ੍ਰਿਤਕਾਂ ਵਿੱਚ ਚਾਰ ਨਾਬਾਲਗ ਤੇ ਤਿੰਨ ਔਰਤਾਂ ਸ਼ਾਮਲ ਹਨ। ਹੜ੍ਹ ’ਚ ਲਾਪਤਾ ਹੋਏ ਇੱਕ ਵਿਅਕਤੀ ਅਤੇ ਇੱਕ ਔਰਤ ਦੀ ਅਜੇ ਕੋਈ ਉੱਘ-ਸੁੱਘ ਨਹੀਂ ਮਿਲੀ। ਲਗਾਤਾਰ ਦੂਜੇ ਦਿਨ ਵੀ ਕੌਮੀ ਆਫ਼ਤ ਪ੍ਰਬੰਧਨ ਬਲ ਵੱਲੋਂ ਉਨ੍ਹਾਂ ਦੀ ਭਾਲ ਕੀਤੀ ਜਾ ਰਹੀ ਹੈ। ਮ੍ਰਿਤਕ ਹਿਮਾਚਲ ਪ੍ਰਦੇਸ਼ ਦੇ ਜ਼ਿਲ੍ਹਾ ਊਨਾ ਦੇ ਪਿੰਡ ਦੇਹਲਾਂ ਅਤੇ ਭਟੋਲੀ ਦੇ ਰਹਿਣ ਵਾਲੇ ਸਨ। ਉਹ ਇਨੋਵਾ ਗੱਡੀ ’ਚ ਸਵਾਰ ਹੋ ਕੇ ਪਿੰਡ ਮਹਿਰੋਵਾਲ ਵਿੱਚ ਇਕ ਵਿਆਹ ਸਮਾਗਮ ’ਚ ਸ਼ਾਮਲ ਹੋਣ ਜਾ ਰਹੇ ਸਨ ਪਰ ਚੋਅ ’ਚ ਆਏ ਹੜ੍ਹ ਕਾਰਨ ਗੱਡੀ ਰੁੜ੍ਹ ਗਈ। ਟੀਮ ਨੇ ਬੜੀ ਮੁਸ਼ੱਕਤ ਮਗਰੋਂ ਵਿੱਚੋਂ ਲਾਸ਼ਾਂ ਕੱਢੀਆਂ। ਪੋਸਟਮਾਰਟਮ ਮਗਰੋਂ ਲਾਸ਼ਾਂ ਰਿਸ਼ਤੇਦਾਰਾਂ ਤੇ ਪਿੰਡ ਵਾਸੀਆਂ ਦੇ ਹਵਾਲੇ ਕਰ ਦਿੱਤੀਆਂ ਗਈਆਂ।