ਜੰਮੂ-ਕਸ਼ਮੀਰ: ਘੁਸਪੈਠ ਕਰਦੇ ਤਿੰਨ ਅਤਿਵਾਦੀ ਢੇਰ

ਭਾਰਤੀ ਫੌਜ ਨੇ ਜੰਮੂ ਕਸ਼ਮੀਰ ਦੇ ਕੁੱਪਵਾੜਾ ਸੈਕਟਰ ਵਿਚ ਅਸਲ ਕੰਟਰੋਲ ਰੇਖਾ ਦੇ ਪਾਰ ਘੁਸਪੈਠ ਦੀ ਕੋਸ਼ਿਸ਼ ਕਰਦੇ ਤਿੰਨ ਅਤਿਵਾਦੀਆਂ ਨੂੰ ਢੇਰ ਕੀਤਾ ਹੈ। ਜਾਣਕਾਰੀ ਦਿੰਦਿਆਂ ਬ੍ਰਿਗੇਡੀਅਰ ਐੱਨਆਰ ਕੁਲਕਰਨੀ ਨੇ ਕਿਹਾ ਕਿ ਉਨ੍ਹਾਂ ਨੂੰ ਖੁਫ਼ੀਆ ਏਜੰਸੀਆਂ ਰਾਹੀਂ ਅਤਿਵਾਦੀਆਂ ਦੇ ਘੁਸਪੈਠ ਕਰਨ, ਅਮਰਨਾਥ ਯਾਤਰਾ ਨੂੰ ਪ੍ਰਭਾਵਿਤ ਅਤੇ ਹੋਰ ਖਤਰਨਾਕ ਗਤੀਵਿਧੀਆਂ ਕਰਨ ਬਾਰੇ ਸੂਚਨਾ ਪ੍ਰਾਪਤ ਹੋਈ ਸੀ। ਉਨ੍ਹਾਂ ਦੱਸਿਆ ਕਿ ਆਰਮੀ, ਬੀਐੱਸਐੱਫ਼ ਅਤੇ ਜੰਮੂ ਕਸ਼ਮੀਰ ਪੁਲੀਸ ਵੱਲੋਂ ਸਾਂਝੇ ਤੌਰ ਤੇ ਪੂਰੇ ਖੇਤਰ ਵਿਚ ਚੌਕਸੀ ਵਧਾਉਦਿਆਂ ਵਿਸ਼ੇਸ਼ ਨਿਗਰਾਨੀ ਰੱਖੀ ਗਈ। ਇਸ ਦੌਰਾਨ ਐੱਲਓਸੀ ਪਾਰ ਕਰਨ ਮੌਕੇ ਵਾੜ ਵੱਲ ਵਧਦੇ ਹੋਏ ਤਿੰਨ ਵਿਦੇਸ਼ੀ ਅਤਿਵਾਦੀਆਂ ਨੂੰ ਢੇਰ ਕਰ ਦਿੱਤਾ ਗਿਆ। ਬ੍ਰਿਗੇਡਿਅਰ ਕੁਲਕਰਨੀ ਨੇ ਦੱਸਿਆ ਕਿ ਚੰਗੀ ਸਿਖਾਲਈ ਪ੍ਰਾਪਤ ਅਤਿਵਾਦੀ ਆਧੁਨਿਕ ਹਥਿਆਰਾਂ ਨਾਲ ਲੈਸ ਸਨ। -ਏਐੱਨਆਈ