ਸਿਆਸਤ ’ਚ ਰਿਸ਼ਤੇ ਟੁੱਟਦਿਆਂ ਦੇਰ ਨਹੀਂ ਲੱਗਦੀ

ਸੁਰਜੀਤ ਮਜਾਰੀ
ਬੰਗਾ, 1 ਮਈ
ਪਿਛਲੀਆਂ ਵਿਧਾਨ ਸਭਾ ਚੋਣਾਂ ’ਚ ਸ਼੍ਰੋਮਣੀ ਅਕਾਲੀ ਦਲ ਅਤੇ ਬਸਪਾ ਗੱਠਜੋੜ ਦਾ ਭਾਵੇਂ ਸਫ਼ਾਇਆ ਹੋ ਗਿਆ ਸੀ ਪਰ ਦੋਆਬੇ ਦੇ ਬੰਗਾ ਅਤੇ ਨਵਾਂ ਸ਼ਹਿਰ ਦੋਵਾਂ ਹਲਕਿਆਂ ਨੇ ਇਸ ਸਿਆਸੀ ਸਾਂਝ ਦੀ ਲਾਜ ਰੱਖ ਲਈ ਸੀ। ਨਵਾਂ ਸ਼ਹਿਰ ਤੋਂ ਬਸਪਾ ਦੇ ਨਛੱਤਰ ਪਾਲ ਅਤੇ ਬੰਗਾ ਤੋਂ ਸ਼੍ਰੋਮਣੀ ਅਕਾਲੀ ਦਲ ਦੇ ਸੁਖਵਿੰਦਰ ਕੁਮਾਰ ਸੁੱਖੀ ਨੇ ਜਿੱਤ ਹਾਸਲ ਕੀਤੀ ਸੀ।
ਦੋਵਾਂ ਹਲਕਿਆਂ ਦੀ ਹੱਦ ਸਾਂਝੀ ਹੋਣ ਕਰਕੇ ਵੀ ਦੋਵੇਂ ਜਣੇ ਇੱਕ-ਦੂਜੇ ਦੇ ਹਲਕੇ ’ਚ ਵੱਡਾ ਰਸੂਖ ਰੱਖਦੇ ਸਨ ਅਤੇ ਦੋਵਾਂ ਨੇ ਆਪੋ-ਆਪਣੀ ਜਿੱਤ ਦੇ ਨਾਲ ਇੱਕ-ਦੂਜੇ ਲਈ ਵੀ ਬਰਾਬਰ ਦਾ ਜ਼ੋਰ ਲਾਇਆ ਸੀ। ਹੁਣ ਜਦੋਂ ਇਸ ਵਾਰ ਦੀਆਂ ਲੋਕ ਸਭਾ ਚੋਣਾਂ ’ਚ ਸ਼੍ਰੋਮਣੀ ਅਕਾਲੀ ਦਲ ਅਤੇ ਬਸਪਾ ਦਾ ਗੱਠਜੋੜ ਟੁੱਟ ਗਿਆ ਹੈ ਤਾਂ ਵਿਧਾਇਕਾਂ ਦੀ ਇਸ ਜੋੜੀ ਦੇ ਰਿਸ਼ਤੇ ’ਚ ਵੀ ਫਿੱਕ ਪੈ ਗਈ ਹੈ। ਆਪੋ-ਆਪਣੀ ਪਾਰਟੀ ਦਾ ਚੋਣ ਪ੍ਰਚਾਰ ਕਰਦਿਆਂ ਉਹ ਸਿਆਸੀ ਤੌਰ ’ਤੇ ਇੱਕ ਦੂਜੇ ਦੇ ਵਿਚਾਰਾਂ ਦੀ ਕਾਟ ਕਰ ਰਹੇ ਹਨ। ‘ਸਿਆਸਤ ’ਚ ਰਿਸ਼ਤੇ ਟੁੱਟਣ ਲੱਗਿਆਂ ਚਿਰ ਨਹੀਂ ਲੱਗਦਾ’ ਵਾਲੀ ਕਹਾਵਤ ਅਨੁਸਾਰ ਇਨ੍ਹਾਂ ਵਿਧਾਇਕਾਂ ਦਾ ਵਿਧਾਨ ਸਭਾ ਚੋਣਾਂ ਦੇ ਮੁਕਾਬਲੇ ਲੋਕ ਸਭਾ ਦੇ ਚੋਣ ਪ੍ਰਚਾਰ ’ਚ ਸਾਰਾ ਰੰਗ-ਢੰਗ ਬਦਲ ਗਿਆ ਹੈ। ਸ਼੍ਰੋਮਣੀ ਅਕਾਲੀ ਦਲ ਦੇ ਵਿਧਾਇਕ ਡਾ. ਸੁਖਵਿੰਦਰ ਕੁਮਾਰ ਸੁੱਖੀ ਨੇ ਕਿਹਾ ਕਿ ਸਿਆਸੀ ਸਫ਼ਰ ’ਚ ਦੂਜੀਆਂ ਪਾਰਟੀਆਂ ਨਾਲ ਨਾਤੇ ਜੁੜਦੇ-ਟੁੱਟਦੇ ਰਹਿੰਦੇ ਹਨ। ਇਵੇਂ ਵਿਧਾਇਕ ਨਛੱਤਰ ਪਾਲ ਨੇ ਕਿਹਾ ਕਿ ਸਿਆਸੀ ਸਾਂਝ ਆਪਣੀ ਥਾਂ ਮਹੱਤਤਾ ਰੱਖਦੀ ਹੈ ਅਤੇ ਸਮਾਜਿਕ ਸਾਂਝ ਆਪਣੀ ਥਾਂ ਅਹਿਮ ਹੁੰਦੀ ਹੈ।

ਦੋਵੇਂ ਇੱਕੋ ਪਿਛੋਕੜ ਤੇ ਕਿੱਤੇ ਵਾਲੇ

ਨਵਾਂ ਸ਼ਹਿਰ ਦੇ ਵਿਧਾਇਕ ਨੱਛਤਰ ਪਾਲ ਅਤੇ ਬੰਗਾ ਦੇ ਵਿਧਾਇਕ ਸੁਖਵਿੰਦਰ ਕੁਮਾਰ ਸੁੱਖੀ ਦਾ ਸਿਆਸੀ ਪਿਛੋਕੜ ਇੱਕ ਹੀ ਹੈ। ਦੋਵਾਂ ਆਗੂਆਂ ਨੂੰ ਸਿਆਸੀ ਚਿਣਗ ਬਸਪਾ ਬਾਨੀ ਬਾਬੂ ਕਾਂਸ਼ੀ ਰਾਮ ਦੇ ਸਮਾਜਿਕ ਪਰਿਵਰਤਨ ਅਤੇ ਆਰਥਿਕ ਮੁਕਤੀ ਦੇ ਅੰਦੋਲਨ ਤੋਂ ਲੱਗੀ। ਦੋਵਾਂ ਨੇ ਪਾਰਟੀ ਦੀ ਮਜ਼ਬੂਤੀ ਲਈ ਇਕੱਠਿਆਂ ਕੰਮ ਕੀਤਾ। ਇੱਥੋਂ ਤੱਕ ਆਰਥਿਕ ਵਸੀਲੇ ਵਜੋਂ ਦੋਵਾਂ ਦਾ ਖੇਤਰ ਵੀ ਇੱਕ ਹੈ। ਡਾ. ਸੁਖਵਿੰਦਰ ਕੁਮਾਰ ਸੁੱਖੀ ਈਐੱਨਟੀ ਸਪੈਸ਼ਲਿਸਟ ਹਨ ਜਦੋਂ ਕਿ ਨਛੱਤਰ ਪਾਲ ਦਾ ਮੈਡੀਕਲ ਸਟੋਰ ਹੈ।