ਦੁਕਾਨਦਾਰਾਂ ਨੂੰ ਮਾਲਵਾ ਰੋਡ ਤੋਂ ਕਬਜ਼ੇ ਹਟਾਉਣ ਦੀਆਂ ਹਦਾਇਤਾਂ

ਪੱਤਰ ਪ੍ਰੇਰਕ

ਲੰਬੀ, 5 ਜੂਨ

ਮੰਡੀ ਕਿੱਲਿਆਂਵਾਲੀ ‘ਚ ਮਾਲਵਾ ਰੋਡ ‘ਤੇ ਵੱਡੇ ਪੱਧਰ ‘ਤੇ ਨਾਜਾਇਜ਼ ਕਬਜ਼ਿਆਂ ਖਿਲਾਫ਼ ‘ਸਰਕਾਰੀ’ ਕਾਰਵਾਈ ਮੁੜ ਸਰਗਰਮ ਹੋ ਗਈ ਹੈ। ਅੱਜ ਪੰਚਾਇਤ ਵਿਭਾਗ, ਪੀ.ਡਬਿਲਿਊ.ਡੀ ਅਤੇ ਪੁਲੀਸ ਅਮਲੇ ਨੇ ਸਾਂਝੀ ਕਾਰਵਾਈ ਤਹਿਤ ਦੁਕਾਨਦਾਰਾਂ ਨੂੰ ਸੜਕ ਦੇ ਰਕਬੇ ਤੋਂ ਕਬਜ਼ੇ ਹਟਾਉਣ ਲਈ ਕੱਲ੍ਹ ਮੰਗਲਵਾਰ ਸ਼ਾਮ ਚਾਰ ਵਜੇ ਤੱਕ ਦਾ ਸਮਾਂ ਦਿੱਤਾ ਹੈ। ਅੱਜ ਨਾਜਾਇਜ਼ ਕਬਜ਼ਿਆਂ ਖ਼ਿਲਾਫ਼ ਕਾਰਵਾਈ ਲਈ ਪੰਚਾਇਤ ਅਫ਼ਸਰ ਜਸਵਿੰਦਰ ਸਿੰਘ, ਪੰਚਾਇਤ ਸਕੱਤਰ ਬਲਜੀਤ ਸਿੰਘ ਤੇ ਥਾਣਾ ਕਿੱਲਿਆਂਵਾਲੀ ਦੇ ਮੁਲਾਜ਼ਮਾਂ ਨੇ ਦੁਕਾਨਦਾਰਾਂ ਨੂੰ ਸੜਕ ਕੰਢਿਓਂ ਸਾਮਾਨ ਚੁੱਕਣ ਦੀਆਂ ਹਦਾਇਤਾਂ ਦਿੱਤੀਆਂ। ਪੰਚਾਇਤ ਅਫ਼ਸਰ ਨੇ ਕਿਹਾ ਕਿ ਜੇਕਰ ਦੁਕਾਨਦਾਰਾਂ ਨੇ ਅਲਟੀਮੇਟਮ ਸਮੇਂ ਅੰਦਰ ਖੁਦ ਸਾਮਾਨ ਨਾ ਚੁੱਕਿਆ ਤਾਂ ਫ਼ਿਰ ਬੁਲਡੋਜ਼ਰ ਕਾਰਵਾਈ ਕੀਤੀ ਜਾਵੇਗੀ।