ਵਿਕਾਸ ਬੋਰਡ ਦੇ ਵਾਈਸ ਚੇਅਰਮੈਨ ਵੱਲੋਂ ਸਰਸਵਤੀ ਸਰੋਵਰ ਦਾ ਨਿਰੀਖਣ

ਪੱਤਰ ਪ੍ਰੇਰਕ
ਸ਼ਾਹਬਾਦ ਮਾਰਕੰਡਾ, 22 ਅਗਸਤ
ਹਰਿਆਣਾ ਸਰਸਵਤੀ ਧਰੋਹਰ ਵਿਕਾਸ ਬੋਰਡ ਦੇ ਵਾਈਸ ਚੇਅਰਮੈਨ ਘੁੰਮਣ ਸਿੰਘ ਕਿਰਮਚ ਨੇ ਅੱਜ ਮਰਚੇਹੜੀ ’ਚ ਬਣਾਏ ਗਏ ਸਰਸਵਤੀ ਸਰੋਵਰ ਦਾ ਨਿਰੀਖਣ ਕੀਤਾ। ਉਨ੍ਹਾਂ ਕਿਹਾ ਕਿ ਮਰਚੇਹੜੀ ਦੇ ਸਰਸਵਤੀ ਸਰੋਵਰ ਨਾਲ ਇਸ ਸਾਲ 3 ਕਰੋੜ ਲਿਟਰ ਪਾਣੀ ਰਿਚਾਰਜ ਹੋਇਆ ਹੈ। ਪਾਣੀ ਦੇ ਰਿਚਾਰਜ ਹੋਣ ਨਾਲ ਇਸ ਖੇਤਰ ਦਾ ਧਰਤੀ ਹੇਠਲੇ ਪਾਣੀ ਦਾ ਪੱਧਰ ਵਿਚ ਕਾਫੀ ਸੁਧਾਰ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਬਾਬੈਨ ਖੇਤਰ ਨੂੰ ਡਾਰਕ ਜ਼ੋਨ ਤੋਂ ਬਾਹਰ ਕੱਢਣ ਲਈ ਸਰਸਵਤੀ ਨਦੀ ਦੇ ਕੰਢਿਆਂ ਦੇ ਨਾਲ ਨਾਲ ਪਿੰਡਾਂ ਵਿਚ ਅਜਿਹੇ ਹੋਰ ਸਰਸਵਤੀ ਸਰੋਵਰਾਂ ਦਾ ਨਿਰਮਾਣ ਕਰੇਗੀ ਜਿਸ ਨਾਲ ਧਰਤੀ ਹੇਠਲੇ ਪਾਣੀ ਦਾ ਪੱਧਰ ਹੋਰ ਉਪਰ ਕੀਤਾ ਜਾ ਸਕੇ। ਕਿਰਮਚ ਨੇ ਅੱਜ ਪਿੰਡ ਮਰਚੇਹੜੀ ਦਾ ਦੌਰਾ ਕਰਨ ਤੋਂ ਬਾਅਦ ਪਿੰਡ ਵਾਸੀਆਂ ਨਾਲ ਗੱਲਬਾਤ ਕੀਤੀ ਤੇ ਉਨ੍ਹਾਂ ਦੀਆਂ ਸਮੱਸਿਆਵਾਂ ਸੁਣੀਆਂ।