ਪੁਲੀਸ ਮੁਕਾਬਲੇ ’ਚ ਜ਼ਖ਼ਮੀ

ਪੀਪੀ ਵਰਮਾ
ਪੰਚਕੂਲਾ, 13 ਨਵੰਬਰ
ਪੰਚਕੂਲਾ ਵਿੱਚ ਪੁਲੀਸ ਅਤੇ ਕਾਰ ਸਵਾਰਾਂ ’ਚ ਹੋਏ ਮੁਕਾਬਲੇ ’ਚ ਇਕ ਜਣਾ ਜ਼ਖ਼ਮੀ ਹੋ ਗਿਆ। ਮੌਲੀ ਪੁਲੀਸ ਤੇ ਡਿਟੈਕਟਿਵ ਸਟਾਫ ਦੀ ਟੀਮ ਨੇ ਪੰਚਕੂਲਾ ਦੇ ਬਰਵਾਲਾ ਨੇੜੇ ਨਾਕਾਬੰਦੀ ਕੀਤੀ ਹੋਈ ਸੀ। ਇਸ ਦੌਰਾਨ ਰਾਏਪੁਰਾਨੀ ਵਾਲੇ ਪਾਸੇ ਤੋਂ ਆ ਰਹੀਆਂ ਦੋ ਗੱਡੀਆਂ ਦੇ ਚਾਲਕ ਪੁਲੀਸ ਨੂੰ ਦੇਖ ਕੇ ਭੱਜਣ ਦੀ ਕੋਸ਼ਿਸ਼ ਕਰਨ ਲੱਗੇ। ਇਨ੍ਹਾਂ ’ਚੋਂ ਇਕ ਗੱਡੀ ਵਿੱਚ ਬੈਠੇ ਨੌਜਵਾਨ ਨੇ ਪੁਲੀਸ ’ਤੇ ਗੋਲੀਆਂ ਚਲਾ ਦਿੱਤੀਆਂ। ਜਵਾਬ ’ਚ ਡਿਟੈਕਟਿਵ ਸਟਾਫ ਦੀ ਟੀਮ ਨੇ ਵੀ ਗੋਲੀ ਚਲਾਈ। ਇਸ ਤੋਂ ਬਾਅਦ ਦੋ ਨੌਜਵਾਨ ਫਾਰਚਿਊਨਰ ਕਾਰ ਨੂੰ ਛੱਡ ਕੇ ਭੱਜ ਗਏ ਜਦੋਂਕਿ ਸਕਾਰਪੀਓ ਸਕਾਰ ਨੌਜਵਾਨ ਨੂੰ ਗੋਲੀ ਲੱਗ ਗਈ। ਉਸ ਦੀ ਪਛਾਣ ਮਨੋਜ ਵਜੋਂ ਹੋਈ। ਉਸ ਕੋਲੋਂ ਪਿਸਤੌਲ ਵੀ ਬਰਾਮਦ ਹੋਇਆ ਹੈ। ਪੁਲੀਸ ਅਨੁਸਾਰ ਦੋਵੇਂ ਵਾਹਨ ਚੋਰੀ ਦੇ ਹਨ। ਮੁਲਜ਼ਮ ਇੱਥੋਂ ਫਾਰਚਿਊਨਰ ਕਾਰ ਚੋਰੀ ਕਰ ਕੇ ਭੱਜਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਮੁਲਜ਼ਮਾਂ ਕੋਲੋਂ ਜੈਮਰ, ਨੰਬਰ ਪਲੇਟਾਂ ਅਤੇ ਅਸਲਾ ਬਰਾਮਦ ਹੋਇਆ।