ਮਨਜੀਤ ਸਿੰਘ ਕੰਗ ਨਮਿਤ ਪਾਠ ਦਾ ਭੋਗ ਤੇ ਐਵਾਰਡ ਦਾ ਐਲਾਨ
ਖੇਤਰੀ ਪ੍ਰਤੀਨਿਧ
ਲੁਧਿਆਣਾ, 7 ਜੁਲਾਈ
ਪੀਏਯੂ ਦੇ ਸਾਬਕਾ ਉਪ ਕੁਲਪਤੀ ਡਾ. ਮਨਜੀਤ ਸਿੰਘ ਕੰਗ ਜੋ ਪਿਛਲੇ ਦਿਨਾਂ ਦੌਰਾਨ ਅਕਾਲ ਚਲਾਣਾ ਕਰ ਗਏ ਸਨ, ਦੀ ਯਾਦ ਵਿੱਚ ਗਿਆਨ ਅੰਜਨ ਅਕਾਦਮੀ ਸਕੂਲ ਵਿੱਚ ਸਮਾਗਮ ਕਰਵਾਇਆ ਗਿਆ। ਅਕਾਡਮੀ ਦੀ ਪ੍ਰਧਾਨ ਡਾ. ਕੁਲਵਿੰਦਰ ਕੌਰ ਮਿਨਹਾਸ ਨੇ ਦੱਸਿਆ ਕਿ ਡਾ. ਕੰਗ ਨੇ ਆਪਣੇ ਪਿਤਾ ਗੁਰਦਿੱਤਾ ਸਿੰਘ ਕੰਗ ਦੀ ਯਾਦ ਵਿੱਚ ਸੰਸਥਾ ਬਣਾਈ ਹੋਈ ਸੀ ਜੋ ਗ਼ਰੀਬ ਅਤੇ ਲੋੜਵੰਦ ਬੱਚਿਆਂ ਦੀ ਮਦਦ ਕਰਦੀ ਹੈ।
ਇਸ ਸੰਸਥਾ ਤਹਿਤ ਡਾ. ਕੰਗ ਨੇ ਗਿਆਨ ਅੰਜਨ ਅਕਾਡਮੀ ਵਿੱਚ ਪੜ੍ਹਦੇ ਝੁੱਗੀਆਂ-ਝੌਂਪੜੀਆਂ ਵਾਲਿਆਂ ਦੇ ਬੱਚਿਆਂ ਦੀ ਮਦਦ ਕੀਤੀ ਸੀ। ਇਸ ਲਈ ਡਾ. ਕੰਗ ਦੀ ਯਾਦ ਵਿੱਚ ਸਮਾਗਮ ਕਰਵਾ ਕੇ ਸ਼ਰਧਾਂਜਲੀਆਂ ਦਿੱਤੀਆਂ ਗਈਆਂ। ਇਸ ਤੋਂ ਪਹਿਲਾਂ ਡਾ. ਕੰਗ ਦੀ ਯਾਦ ਵਿੱਚ ਰੱਖੇ ਸਹਿਜ ਪਾਠ ਦੇ ਭੋਗ ਪਾਏ ਗਏ ਅਤੇ ਅਰਦਾਸ ਕੀਤੀ ਗਈ।
ਡਾ. ਮਿਨਹਾਸ ਨੇ ਐਲਾਨ ਕੀਤਾ ਕਿ ਅਕਾਡਮੀ ਵੱਲੋਂ ਡਾ. ਕੰਗ ਦੀ ਯਾਦ ਵਿੱਚ ‘ਡਾ. ਮਨਜੀਤ ਸਿੰਘ ਕੰਗ ਯਾਦਗਾਰੀ ਐਵਾਰਡ’ ਸ਼ੁਰੂ ਕੀਤਾ ਜਾਵੇਗਾ। ਇਹ ਐਵਾਰਡ ਹਰ ਸਾਲ ਡਾ. ਕੰਗ ਦੇ ਜਨਮ ਦਿਨ ’ਤੇ 3 ਮਾਰਚ ਨੂੰ ਅਕਾਡਮੀ ਦੇ ਹੋਣਹਾਰ ਬੱਚੇ ਨੂੰ ਦਿੱਤਾ ਜਾਇਆ ਕਰੇਗਾ।