ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਦੇ ਫਾਈਨਲ ਵਿਚ ਸੁਸਤੀ ਨਾਲ ਓਵਰ ਸੁੱਟਣ ਲਈ ਭਾਰਤੀ ਕ੍ਰਿਕਟ ਟੀਮ ਨੂੰ ਜੁਰਮਾਨਾ

ਦੁਬਈ, 12 ਜੂਨ

ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਦੇ ਫਾਈਨਲ ਵਿਚ ਸੁਸਤੀ ਨਾਲ ਓਵਰ ਸੁੱਟਣ ਲਈ ਭਾਰਤੀ ਕ੍ਰਿਕਟ ਖਿਡਾਰੀਆਂ ਨੂੰ ਪੂਰੀ ਮੈਚ ਫੀਸ ਦੇ ਰੂਪ ਵਿਚ ਜੁਰਮਾਨਾ ਲਾਇਆ ਗਿਆ ਹੈ ਜਦਕਿ ਸਲਾਮੀ ਬੱਲੇਬਾਜ਼ ਸ਼ੁਭਮਨ ਗਿੱਲ ਨੂੰ ਅੰਪਾਇਰ ਦੇ ਫ਼ੈਸਲੇ ਦੀ ਆਲੋਚਨਾ ਕਰਨ ਲਈ ਵਾਧੂ 15 ਫੀਸਦ ਜੁਰਮਾਨਾ ਲਾਇਆ ਗਿਆ ਹੈ। ਇਸੇ ਤਰ੍ਹਾਂ ਆਸਟਰੇਲੀਆ ਦੇ ਖਿਡਾਰੀਆਂ ਨੂੰ ਵੀ ਸੁਸਤ ਓਵਰ ਦਰ ਲਈ ਮੈਚ ਫੀਸ ਦਾ 80 ਪ੍ਰਤੀਸ਼ਤ ਜੁਰਮਾਨਾ ਲਾਇਆ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਲੰਡਨ ਵਿਚ ਹੋਇਆ ਮੁਕਾਬਲਾ ਆਸਟਰੇਲੀਆ ਨੇ 209 ਦੌੜਾਂ ਨਾਲ ਜਿੱਤਿਆ ਸੀ। ਦੱਸਣਯੋਗ ਹੈ ਕਿ ਆਈਸੀਸੀ ਦੇ ਜ਼ਾਬਤੇ ਮੁਤਾਬਕ ਆਰਟੀਕਲ 2.22 ਤਹਿਤ ਅਲਾਟ ਸਮੇਂ ਵਿਚ ਓਵਰ ਸੁੱਟਣ ‘ਚ ਨਾਕਾਮ ਰਹਿਣ ‘ਤੇ ਖਿਡਾਰੀਆਂ ਨੂੰ ਜੁਰਮਾਨਾ ਲਾਇਆ ਜਾਂਦਾ ਹੈ। ਵੇਰਵਿਆਂ ਮੁਤਾਬਕ ਭਾਰਤੀ ਟੀਮ ਤੈਅ ਸਮੇਂ ਵਿਚ ਪੰਜ ਓਵਰ ਪਿੱਛੇ ਸੀ। -ਪੀਟੀਆਈ