ਪੀਯੂ ਵਿੱਚ ਮੁੜ ਖੁੱਲ੍ਹਿਆ ਇੰਡੀਅਨ ਕੌਫ਼ੀ ਹਾਊਸ

ਪੱਤਰ ਪ੍ਰੇਰਕ
ਚੰਡੀਗੜ੍ਹ, 26 ਜੁਲਾਈ
ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਦੇ ਵਿਦਿਆਰਥੀ ਕੇਂਦਰ ਵਿੱਚ ਅੱਜ ਚਾਰ ਸਾਲ ਬਾਅਦ ਇੰਡੀਅਨ ਕੌਫ਼ੀ ਹਾਊਸ ਮੁੜ ਚਾਲੂ ਹੋ ਗਿਆ, ਜਿਸ ਨਾਲ ਵਿਦਿਆਰਥੀਆਂ ਨੇ ਕਾਫ਼ੀ ਰਾਹਤ ਮਹਿਸੂਸ ਕੀਤੀ ਹੈ। ਵਿਦਿਆਰਥੀ ਕੇਂਦਰ ਦੀ ਸਿਖਰਲੀ ਮੰਜ਼ਲ ’ਤੇ ਸਥਿਤ ਕੌਫ਼ੀ ਹਾਊਸ ਦਾ ਉਦਘਾਟਨ ਅੱਜ ਵਾਈਸ ਚਾਂਸਲਰ ਪ੍ਰੋ. ਰੇਣੂ ਵਿੱਗ ਵੱਲੋਂ ਕੀਤਾ ਗਿਆ। ਉਨ੍ਹਾਂ ਨੇ ਪੰਜਾਬ ਯੂਨੀਵਰਸਿਟੀ ਵੱਲੋਂ ਸੈਸ਼ਨ 2023-24 ਲਈ ਹੋਸਟਲ ਰੂਲ ਦੀ ਹੈਂਡਬੁੱਕ ਵੀ ਜਾਰੀ ਕੀਤੀ। ਇਸ ਦੇ ਨਾਲ ਹੀ ਵਾਈਸ ਚਾਂਸਲਰ ਵੱਲੋਂ ਇੱਕ ਸੈਲਫ਼ੀ ਪੁਆਇੰਟ ‘ਆਈ ਲਵ ਪੀ.ਯੂ.’ ਦਾ ਉਦਘਾਟਨ ਵੀ ਕੀਤਾ ਗਿਆ। ਇਸ ਮੌਕੇ ਪ੍ਰੋ. ਜਤਿੰਦਰ ਗਰੋਵਰ, ਪ੍ਰੋ. ਸਿਮਰਤ ਕਾਹਲੋਂ, ਪ੍ਰੋ. ਨਰੇਸ਼ ਕੁਮਾਰ, ਜਤਿੰਦਰ ਮੌਦਗਿਲ ਸਮੇਤ ਹੋਰ ਹਾਜ਼ਰ ਸਨ।