ਇਨਡੋਰ ਸਟੇਡੀਅਮ ’ਚ ਬਣੇ ਬੈਡਮਿੰਟਨ ਕੋਰਟ ਦਾ ਉਦਘਾਟਨ

ਨਿੱਜੀ ਪੱਤਰ ਪ੍ਰੇਰਕ
ਮੰਡੀ ਗੋਬਿੰਦਗੜ੍ਹ, 8 ਫਰਵਰੀ
ਨਗਰ ਕੌਂਸਲ ਗੋਬਿੰਦਗੜ੍ਹ ਵੱਲੋਂ ਸ਼ਹਿਰ ਵਾਸੀਆਂ ਲਈ ਕਈ ਤਰ੍ਹਾਂ ਦੇ ਵਿਕਾਸ ਕਾਰਜ ਕੀਤੇ ਗਏ ਹਨ। ਇਨ੍ਹਾਂ ਵਿੱਚੋਂ ਇਨਡੋਰ ਸਟੇਡੀਅਮ ਵਿੱਚ ਨਵੇਂ ਬੈਡਮਿੰਟਨ ਕੋਰਟ, ਸਥਾਨਕ ਦਸਹਿਰਾ ਗਰਾਊਂਡ ਵਿੱਚ ਬਣ ਰਹੇ ਲਾਅਨ ਟੈਨਿਸ ਗਰਾਊਂਡ, ਰੋਜ਼ ਗਾਰਡਨ ਵਿੱਚ ਨਵੇਂ ਲੱਗ ਰਹੇ ਫੁਹਾਰੇ ਆਦਿ ਸ਼ਾਮਲ ਹਨ। ਇਨ੍ਹਾਂ ਵਿੱਚੋਂ ਕਰੀਬ 42 ਲੱਖ ਰੁਪਏ ਦੀ ਲਾਗਤ ਨਾਲ ਤਿਆਰ ਕੀਤੇ ਬੈਡਮਿੰਟਨ ਕੋਰਟ ਦਾ ਉਦਘਾਟਨ ਹਲਕਾ ਵਿਧਾਇਕ ਗੁਰਿੰਦਰ ਸਿੰਘ ਗੈਰੀ ਬੜਿੰਗ ਅਤੇ ਕੌਂਸਲ ਪ੍ਰਧਾਨ ਹਰਪ੍ਰੀਤ ਸਿੰਘ ਪ੍ਰਿੰਸ ਵੱਲੋਂ ਕੀਤਾ ਗਿਆ। ਸ੍ਰੀ ਗੈਰੀ ਨੇ ਦੱਸਿਆ ਕਿ ਸ਼ਹਿਰ ਦੇ ਬੈਡਮਿੰਟਨ ਖਿਡਾਰੀਆਂ ਲਈ ਨਵਾਂ ਖੇਡ ਕੋਰਟ ਮਾਹਿਰ ਖਿਡਾਰੀਆਂ ਤੇ ਕੌਮੀ ਪੱਧਰ ਦੇ ਖੇਡ ਕੋਚ ਵੱਲੋਂ ਦਿੱਤੀ ਜਾਣਕਾਰੀ ਅਨੁਸਾਰ ਤਿਆਰ ਕਰਵਾਇਆ ਗਿਆ ਹੈ। ਕੌਂਸਲ ਪ੍ਰਧਾਨ ਹਰਪ੍ਰੀਤ ਸਿੰਘ ਪ੍ਰਿੰਸ ਨੇ ਕਿਹਾ ਕਿ ਸ਼ਹਿਰ ਦੇ ਨੌਜਵਾਨਾਂ ਅਤੇ ਬੱਚਿਆਂ ਦੇ ਬਿਹਤਰ ਭਵਿੱਖ ਲਈ ਕੌਂਸਲ ਵੱਲੋਂ ਲਗਾਤਾਰ ਯਤਨ ਜਾਰੀ ਹਨ। ਉਨ੍ਹਾਂ ਦੱਸਿਆ ਕਿ ਜਲਦੀ ਹੀ ਖੇਡਾਂ ਦੇ ਪ੍ਰਤੀ ਉਤਸ਼ਾਹ ਰੱਖਣ ਵਾਲੇ ਬੱਚਿਆਂ ਦੇ ਲਈ ਸ਼ਹਿਰ ਵਿੱਚ ਵਿਸ਼ਵ ਪੱਧਰ ਦੀ ਗੰਨ ਸ਼ੂਟਿੰਗ ਰੇਂਜ, ਅਥਲੀਟਾਂ ਲਈ ਉੱਚ ਪੱਧਰੀ ਟਰੈਕ ਤੇ ਹੋਰ ਖੇਡ ਮੈਦਾਨ ਬਣਵਾਏ ਜਾਣਗੇ।
ਇਸ ਮੌਕੇ ਕਾਰਜਸਾਧਕ ਅਫ਼ਸਰ ਕੁਲਬੀਰ ਸਿੰਘ ਬਰਾੜ, ਐਮਈ ਗੁਰਪ੍ਰੀਤ ਸਿੰਘ, ਜੇਈ ਮਨਜੀਤ ਸਿੰਘ, ਕੌਂਸਲ ਮੀਤ ਪ੍ਰਧਾਨ ਅਸ਼ੋਕ ਸ਼ਰਮਾ, ਕੌਂਸਲਰ ਰਾਜਿੰਦਰ ਸਿੰਘ ਬਿੱਟੂ, ਪੁਨੀਤ ਗੋਇਲ, ਵਿਨੀਤ ਬਿੱਟੂ, ਰਣਧੀਰ ਸਿੰਘ ਹੈਪੀ, ਪਰਮਜੀਤ ਵਾਲੀਆ, ‘ਆਪ’ ਆਗੂ ਕ੍ਰਿਸ਼ਨ ਵਰਮਾ ਬੌਬੀ, ਬਲਦੇਵ ਸ਼ਰਮਾ, ਸੱਤਿਆਪਾਲ ਲੋਧੀ, ਕਿਸ਼ੋਰ ਚੰਦ ਖੰਨਾ, ਉਦਯੋਗਪਤੀ ਪ੍ਰਕਾਸ਼ ਚੰਦ ਗਰਗ, ਸੰਜੇ ਬਾਂਸਲ, ਯੁਵਾ ਆਗੂ ਰੋਹਿਤ ਸ਼ਰਮਾ, ਦੀਪਕ ਘਈ, ਬਲਾਕ ਪ੍ਰਧਾਨ ਦਲਜੀਤ ਵਿਰਕ, ਜ਼ਿਲ੍ਹਾ ਯੂਥ ਪ੍ਰਧਾਨ ਹਰਪ੍ਰੀਤ ਵਿੱਕੀ ਚਹਿਲ ਅਤੇ ਰਮੇਸ਼ ਸ਼ਰਮਾ ਆਦਿ ਮੌਜੂਦ ਸਨ।