ਵਿਧਾਇਕ ਵੱਲੋਂ ਸੌਲਿਡ ਵੇਸਟ ਮੈਨੇਜਮੈਂਟ ਪਲਾਂਟ ਦਾ ਉਦਘਾਟਨ

ਗੁਰਨਾਮ ਸਿੰਘ ਚੌਹਾਨ
ਪਾਤੜਾਂ, 8 ਅਗਸਤ
ਹਲਕਾ ਵਿਧਾਇਕ ਕੁਲਵੰਤ ਸਿੰਘ ਬਾਜ਼ੀਗਰ ਨੇ ਕਿਹਾ ਕਿ ਪੰਜਾਬ ਸਰਕਾਰ ਪਿੰਡ-ਪਿੰਡ ਨਵੇਂ ਪ੍ਰਾਜੈਕਟ ਅਤੇ ਪਲਾਂਟ ਲਗਾ ਕੇ ਚੋਣਾਂ ਦੌਰਾਨ ਕੀਤੇ ਵਾਅਦੇ ਪੂਰੇ ਕਰ ਰਹੀ ਹੈ। ਹਲਕਾ ਵਿਧਾਇਕ ਅੱਜ ਪਿੰਡ ਦੇਧਨਾ ’ਚ ਜਲ ਸਪਲਾਈ ਅਤੇ ਸੈਨੀਟੇਸ਼ਨ ਵਿਭਾਗ ਪੰਜਾਬ ਅਧੀਨ ਸੌਲਿਡ ਵੇਸਟ ਮੈਨੇਜਮੈਂਟ ਪਲਾਂਟ ਦੇ ਉਦਘਾਟਨ ਮੌਕੇ ਸੰਬੋਧਨ ਕਰ ਰਹੇ ਸਨ। ਇਸ ਮੌਕੇ ਉਨ੍ਹਾਂ ਕਿਹਾ ਕਿ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਅਗਵਾਈ ਹੇਠ ਸਰਕਾਰ ਹਰ ਘਰ ਪਾਣੀ ਤੇ ਸਫ਼ਾਈ ਮਿਸ਼ਨ ਤਹਿਤ ਵੱਡੇ ਪੱਧਰ ’ਤੇ ਸੌਲਿਡ ਵੇਸਟ ਮੈਨੇਜਮੈਂਟ ਪਲਾਂਟ ਸਥਾਪਤ ਕਰਨ ਜਾ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਪਲਾਂਟ ਰਾਹੀਂ ਗਿੱਲੇ ਕੂੜੇ ਤੋਂ ਬਣਨ ਵਾਲੀ ਖਾਦ ਪਿੰਡ ਦੇ ਹੀ ਕਿਸਾਨ ਭਰਾਵਾਂ ਦੇ ਖੇਤਾਂ ’ਚ ਵਰਤੋਂ ਲਈ ਮੁਫ਼ਤ ਦਿੱਤੀ ਜਾਵੇਗੀ। ਜਲ ਸਪਲਾਈ ਅਤੇ ਸੈਨੀਟੇਸ਼ਨ ਵਿਭਾਗ ਤੋਂ ਆਈਈਸੀ ਬੀਰਪਾਲ ਦੀਕਸ਼ਿਤ ਤੇ ਸੀਡੀਐਸ ਆਕਾਸ਼ਦੀਪ ਕੌਰ ਨੇ ਕਿਹਾ ਕਿ ਘਰਾਂ ਤੇ ਪਿੰਡ ਦੀ ਸਫ਼ਾਈ ਆਪਣੇ ਹੱਥ ਹੈ। ਪਿੰਡ ਵਾਸੀਆਂ ਨੂੰ ਜਾਗਰੂਕ ਹੋ ਕੇ ਮਿਸ਼ਨ ’ਚ ਬਣਦਾ ਯੋਗਦਾਨ ਪਾਉਣ ਲਈ ਅੱਗੇ ਆਉਣ ਚਾਹੀਦਾ ਹੈ। ਰਾਊਂਡ ਗਲਾਸ ਫਾਊਂਡੇਸ਼ਨ ਵੱਲੋਂ ਅਰਸ਼ਦੀਪ ਸਿੰਘ ਨੇ ਸੌਲਿਡ ਵੇਸਟ ਮੈਨੇਜਮੈਂਟ ਪਲਾਂਟ, ਪਾਣੀ ਵਾਤਾਵਰਨ ਅਤੇ ਮਿੱਟੀ ਦੇ ਪ੍ਰਦੂਸ਼ਣ ਤੋਂ ਜਾਣੂ ਕਰਵਾਇਆ। ਇਸ ਮੌਕੇ ਐੱਸਡੀਐੱਮ ਪਾਤੜਾਂ ਰਵਿੰਦਰ ਕੁਮਾਰ, ਬੀਡੀਪੀਓ ਪਾਤੜਾਂ ਬਲਜੀਤ ਕੌਰ, ਪ੍ਰਬੰਧਕ ਸੌਰਵ ਗੋਇਲ, ਜੇਈ ਅਸ਼ੋਕ ਭਾਰਦਵਾਜ, ਸਕੱਤਰ ਜਸਪਾਲ ਬਾਂਸਲ, ਸੰਦੀਪ ਸਾਂਵਰਾ, ਬਲਦੇਵ ਚੌਧਰੀ, ਮੇਜਰ ਨਿੱਕਾ, ਚਮਕੌਰ ਸਿੰਘ ਕੁਲਵਾਣੂ ਅਤੇ ਪਰਮਿੰਦਰ ਮੌਦਗਿਲ ਆਦਿ ਹਾਜ਼ਰ ਸਨ।