ਹਾਕੀ ਖਿਡਾਰੀ ਅਕਾਸ਼ਦੀਪ ਤੇ ਮੋਨਿਕਾ ਵਿਆਹ ਦੇ ਬੰਧਨ ’ਚ ਬੱਝੇ

ਕਰਮਜੀਤ ਸਿੰਘ ਚਿੱਲਾ
ਐੱਸਏਐੱਸ ਨਗਰ(ਮੁਹਾਲੀ), 15 ਨਵੰਬਰ
ਰਾਸ਼ਟਰਮੰਡਲ ਖੇਡਾਂ ਵਿੱਚ ਚਾਂਦੀ ਦਾ ਤਗ਼ਮਾ ਜੇਤੂ ਟੀਮ ਦੇ ਮੈਂਬਰ ਰਹੇ ਹਾਕੀ ਓਲੰਪੀਅਨ ਅਕਾਸ਼ਦੀਪ ਸਿੰਘ ਦਾ ਵਿਆਹ ਅੱਜ ਹਰਿਆਣਾ ਦੀ ਹਾਕੀ ਖਿਡਾਰਨ ਮੋਨਿਕਾ ਮਲਿਕ ਨਾਲ ਹੋਇਆ। ਦੋਹਾਂ ਦਾ ਵਿਆਹ ਸਮਾਗਮ ਲਾਂਡਰਾਂ ਨੇੜੇ ਅਤੇ ਆਨੰਦ ਕਾਰਜ ਗੁਰਦੁਆਰਾ ਸਿੰਘ ਸ਼ਹੀਦਾਂ ਵਿਖੇ ਹੋਏ। ਇਸ ਮੌਕੇ ਓਲੰਪੀਅਨ ਰਾਜਪਾਲ ਸਿੰਘ ਤੇ ਰਮਨਦੀਪ ਵੀ ਹਾਜ਼ਰ ਸਨ।
ਅਕਾਸ਼ਦੀਪ ਸਿੰਘ ਖਡੂਰ ਸਾਹਿਬ ਨੇੜਲੇ ਪਿੰਡ ਵੈਰੋਵਾਲ ਦਾ ਵਸਨੀਕ ਹੈ। ਉਹ ਇਨ੍ਹੀਂ ਦਿਨੀਂ ਪੰਜਾਬ ਪੁਲੀਸ ਵਿੱਚ ਡੀਐੱਸਪੀ ਹੈ। ਇਸੇ ਤਰ੍ਹਾਂ ਮੋਨਿਕਾ ਮਲਿਕ ਹਰਿਆਣਾ ਦੇ ਗੋਹਾਨਾ ਨੇੜਲੇ ਪਿੰਡ ਗਮਰੀ ਦੀ ਰਹਿਣ ਵਾਲੀ ਹੈ। ਮੋਨਿਕਾ ਟੋਕੀਓ ਓਲੰਪਿਕ ਵਿੱਚ ਚੌਥੇ ਸਥਾਨ ’ਤੇ ਰਹੀ ਭਾਰਤੀ ਮਹਿਲਾ ਹਾਕੀ ਟੀਮ ਦਾ ਹਿੱਸਾ ਸੀ। ਅਕਾਸ਼ਦੀਪ 2014 ਦੀਆਂ ਏਸ਼ਿਆਈ ਖੇਡਾਂ ’ਚ ਸੋਨ ਤਗ਼ਮਾ ਜੇਤੂ ਅਤੇ 2018 ’ਚ ਕਾਂਸੇ ਦਾ ਤਗ਼ਮਾ ਜੇਤੂ ਭਾਰਤੀ ਟੀਮ ਵਿਚ ਸ਼ੁਮਾਰ ਸੀ।