ਹਾਕੀ: ਭਾਰਤ ਤੇ ਫਰਾਂਸ ਵਿਚਾਲੇ ਮੈਚ ਡਰਾਅ

ਕੇਪਟਾਊਨ, 24 ਜਨਵਰੀ
ਭਾਰਤੀ ਪੁਰਸ਼ ਹਾਕੀ ਟੀਮ ਅੱਜ ਇੱਥੇ ਚਾਰ ਮੁਲਕੀ ਟੂਰਨਾਮੈਂਟ ਦੇ ਦੂਜੇ ਮੈਚ ਵਿੱਚ ਉਮੀਦਾਂ ’ਤੇ ਖਰਾ ਨਹੀਂ ਉਤਰ ਸਕੀ ਅਤੇ ਉਸ ਨੂੰ ਫਰਾਂਸ ਨਾਲ 2-2 ਨਾਲ ਡਰਾਅ ਖੇਡ ਕੇ ਅੰਕ ਸਾਂਝੇ ਕਰਨੇ ਪਏ। ਭਾਰਤ ਲਈ ਮਨਦੀਪ ਸਿੰਘ ਨੇ ਅੱਠਵੇਂ ਮਿੰਟ ਵਿੱਚ ਅਤੇ ਅਮਿਤ ਰੋਹੀਦਾਸ ਨੇ 19ਵੇਂ ਮਿੰਟ ਵਿੱਚ ਗੋਲ ਕੀਤੇ ਜਦਕਿ ਫਰਾਂਸ ਵੱਲੋਂ ਟਿਮੋਥੀ ਕਲੇਮੈਂਟ ਨੇ 37ਵੇਂ ਮਿੰਟ ਅਤੇ ਬੀ ਗੈਸਪਾਰਡ ਨੇ 59ਵੇਂ ਮਿੰਟ ਵਿੱਚ ਗੋਲ ਕੀਤੇ। ਭਾਰਤੀ ਨੇ ਸੋਮਵਾਰ ਨੂੰ ਟੂਰਨਾਮੈਂਟ ਦੇ ਸ਼ੁਰੂਆਤੀ ਮੈਚ ’ਚ ਫਰਾਂਸ ਨੂੰ 4-0 ਨਾਲ ਹਰਾਇਆ ਸੀ।
ਅੱਜ ਮੈਚ ਵਿੱਚ ਮਨਦੀਪ ਨੇ ਅੱਠਵੇਂ ਮਿੰਟ ਵਿੱਚ ਹੀ ਗੋਲ ਕਰ ਕੇ ਭਾਰਤ ਨੂੰ ਲੀਡ ਦਿਵਾਈ। ਰੋਹੀਦਾਸ ਨੇ ਦੂਜੇ ਕੁਆਰਟਰ ਵਿੱਚ ਇਹ ਲੀਡ ਦੁੱਗਣੀ ਕਰ ਦਿੱਤੀ ਪਰ ਕਲੇਮੈਂਟ ਨੇ 37ਵੇਂ ਮਿੰਟ ਵਿੱਚ ਗੋਲ ਕਰ ਕੇ ਲੀਡ ਘਟਾ ਦਿੱਤੀ। ਆਖਰੀ ਕੁਆਰਟਰ ਵਿੱਚ ਦੋਵੇਂ ਟੀਮਾਂ ਗੋਲ ਕਰਨ ਦੀ ਕੋਸ਼ਿਸ਼ ਕਰ ਰਹੀਆਂ ਸਨ ਪਰ ਹੂਟਰ ਵੱਜਣ ਤੋਂ ਇੱਕ ਮਿੰਟ ਪਹਿਲਾਂ ਭਾਰਤ ਨੂੰ ਉਸ ਵੇਲੇ ਵੱਡਾ ਝਟਕਾ ਲੱਗਾ ਜਦੋਂ ਫਰਾਂਸ ਲਈ ਗੈਸਪਾਰਡ ਨੇ ਗੋਲ ਕਰ ਕੇ ਸਕੋਰ 2-2 ਨਾਲ ਬਰਾਬਰ ਕਰ ਦਿੱਤਾ। ਭਾਰਤ ਸ਼ੁੱਕਰਵਾਰ ਨੂੰ ਤੀਜੇ ਮੈਚ ’ਚ ਦੱਖਣੀ ਅਫਰੀਕਾ ਨਾਲ ਭਿੜੇਗਾ। -ਪੀਟੀਆਈ