ਸੁਨਿਆਰੇ ਨੂੰ ਪਿਸਤੌਲ ਵਿਖਾ ਕੇ ਗਹਿਣੇ ਲੁੱਟੇ

ਗੁਰਦੀਪ ਸਿੰਘ ਭੱਟੀ
ਟੋਹਾਣਾ, 29 ਨਵੰਬਰ
ਇੱਥੇ ਦੁਪਹਿਰ ਵੇਲੇ ਸ਼ਾਸਤਰੀ ਬਾਜ਼ਾਰ ਵਿੱਚ ਸੁਨਿਆਰੇ ਦੇ ਸ਼ੋਅਰੂਮ ’ਤੇ ਹੱਥਿਆਰਬੰਦ ਲੁਟੇਰਿਆਂ ਨੇ ਦੁਕਾਨ ਵਿੱਚ ਦਾਖਲ ਹੋ ਕੇ ਲੁੱਟਮਾਰ ਕੀਤੀ ਤੇ ਸ਼ੋਅਕੇਸ ਵਿੱਚ ਰੱਖੇ ਗਹਿਣੇ ਲੁੱਟ ਕੇ ਫਰਾਰ ਹੋ ਗਏ। ਸ਼ਿਵ ਸ਼ੰਕਰ ਨੇ ਦੱਸਿਆ ਕਿ ਸਵੇਰੇ ਤੋਂ ਉਹ ਦੁਕਾਨ ’ਤੇ ਸਨ। ਇਕ ਵਜੇ ਉਸ ਦੇ ਪਿਤਾ ਘਰ ਖਾਣਾ ਖਾਣ ਲਈ ਗਏ ਤੇ ਉਹ ਦੁਕਾਨ ’ਤੇ ਇਕੱਲਾ ਸੀ ਕਿ ਦੋ ਲੁਟੇਰੇ ਜਿਸ ਵਿੱਚੋਂ ਇਕ ਲੁਟੇਰੇ ਨੇ ਹੈਲਮੇਟ ਤੇ ਦੂਜੇ ਨੇ ਸਾਫ਼ੇ ਨਾਲ ਮੂੰਹ ਬੰਨ੍ਹਿਆ ਹੋਇਆ ਸੀ, ਇਕਦਮ ਦੁਕਾਨ ਵਿੱਚ ਦਾਖਲ ਹੋਏ। ਉਨ੍ਹਾਂ ਪਿਸਤੌਲ ਵਿਖਾ ਕੇ ਸਾਰਾ ਸਮਾਨ ਦੇਣ ਲਈ ਧਮਕੀ ਦਿੱਤੀ। ਲੁਟੇਰਿਆਂ ਨੇ ਕਾਉਂਟਰ ਵਿੱਚੋਂ ਕਰੀਬ ਢਾਈ–ਤਿੰਨ ਕਿੱਲੋ ਚਾਂਦੀ ਦੇ ਗਹਿਣੇ ਥੈਲੇ ਵਿੱਚ ਪਾਏ ਤੇ ਪਿਸਤੌਲ ਲਹਿਰਾਉਂਦੇ ਹੋਏ ਬਾਹਰ ਜਾ ਕੇ ਤੀਜੇ ਸਾਥੀ ਨਾਲ ਮੋਟਰਸਾਈਕਲ ’ਤੇ ਫ਼ਰਾਰ ਹੋ ਗਏ। ਸੁਚਨਾ ਦੇਣ ’ਤੇ ਡੀਐਸਪੀ ਸ਼ਮਸ਼ੇਰ ਸਿੰਘ, ਐਸਐਚਓ ਪ੍ਰਲਾਦ ਸਿੰਘ ਪੁੱਜੇ ਤੇ ਕੈਮਰਿਆਂ ਦੀ ਪੜਤਾਲ ਕੀਤੀ। ਡੀਐਸਪੀ ਸ਼ਮਸੇਰ ਸਿੰਘ ਨੇ ਦੱਸਿਆ ਕਿ ਲੁਟੇਰਿਆ ਨੂੰ ਇਕ ਦੋ ਦਿਨ ਵਿੱਚ ਹੀ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ। ਦੁਕਾਨ ਮਾਲਿਕ ਰਤਨ ਕੁਮਾਰ ਨੇ ਦੱਸਿਆ ਕਿ ਲੁੱਟ ਦਾ ਜਾਇਜ਼ਾ ਲਿਆ ਜਾ ਰਿਹਾ ਹੈ। ਕਰੀਬ ਤਿੰਨ ਲੱਖ ਦੀ ਲੁੱਟ ਦਾ ਖਦਸ਼ਾ ਹੈ।