ਹਰੀਪੁਰ ਚੋਅ: ਪੁਲ ਤੋਂ ਉਡਦੀ ਧੂੜ ਕਾਰਨ ਲੋਕ ਪ੍ਰੇਸ਼ਾਨ

ਜਗਮੋਹਨ ਸਿੰਘ
ਰੂਪਨਗਰ, 22 ਨਵੰਬਰ
ਘਨੌਲੀ-ਚੰਡੀਗੜ੍ਹ ਮਾਰਗ ’ਤੇ ਕਸਬਾ ਪੁਰਖਾਲੀ ਅਤੇ ਬਿੰਦਰਖ ਦੇ ਵਿਚਕਾਰ ਪੈਂਦੇ ਹਰੀਪੁਰ ਚੋਅ ’ਤੇ ਬਣਾਏ ਜਾ ਰਹੇ ਨਵੇਂ ਪੁਲ ਤੇ ਉੱਡਦੀ ਧੂੜ ਤੋਂ ਇਲਾਕੇ ਦੇ ਲੋਕ ਡਾਢੇ ਪਰੇਸ਼ਾਨ ਹਨ। ਅੱਜ ਪਿੰਡ ਪੁਰਖਾਲੀ ਦੇ ਸਰਪੰਚ ਦਿਲਬਰ ਸਿੰਘ, ਕਾਂਗਰਸੀ ਆਗੂ ਲਖਵੰਤ ਸਿੰਘ ਹਿਰਦਾਪੁਰ, ਸਤਪ੍ਰੀਤ ਸਿੰਘ ਹਿਰਦਾਪੁਰ, ਜਗਤਾਰ ਸਿੰਘ, ਹਰਿੰਦਰ ਸਿੰਘ, ਅਮਰਜੀਤ ਸਿੰਘ, ਅਜੈਬ ਸਿੰਘ, ਹੈਪੀ, ਗੁਰਜੀਤ ਸਿੰਘ, ਦਲਬੀਰ ਸਿੰਘ ਪੰਚ, ਲਖਵੀਰ ਸਿੰਘ, ਸਾਧੂ ਸਿੰਘ, ਪਰਮਜੀਤ ਸਿੰਘ ਆਦਿ ਨੇ ਦੱਸਿਆ ਕਿ ਪੁਲ ਦੇ ਠੇਕੇਦਾਰ ਨੇ ਪੁਲ ਦੀ ਉਸਾਰੀ ਤਾਂ ਕਰ ਦਿੱਤੀ ਹੈ, ਪਰ ਪੁਲ ਉੱਤੇ ਅਤੇ ਆਲੇ-ਦੁਆਲੇ ਲੁੱਕ ਪਾ ਕੇ ਸੜਕ ਨਹੀਂ ਬਣਾਈ ਅਤੇ ਮਿੱਟੀ ਪਾ ਕੇ ਕੰਮ ਅਧੂਰਾ ਛੱ‌ਡਿਆ ਹੋਇਆ ਹੈ, ਜਿਸ ਕਰਕੇ ਪੁਲ ’ਤੇ ਹਰ ਸਮੇਂ ਧੂੜ ਉੱਡਦੀ ਰਹਿੰਦੀ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਧੂੜ ਕਾਰਨ ਜਿੱਥੇ ਲੋਕਾਂ ਦੇ ਕੱਪੜੇ ਖ਼ਰਾਬ ਹੁੰਦੇ ਹਨ, ਉੱਥੇ ਹੀ ਅਕਸਰ ਹਾਦਸੇ ਵਾਪਰਦੇ ਰਹਿੰਦੇ ਹਨ। ਉਨ੍ਹਾਂ ਸਬੰਧਤ ਵਿਭਾਗ ਤੋਂ ਮੰਗ ਕੀਤੀ ਕਿ ਇਸ ਸਮੱਸਿਆ ਦਾ ਜਲਦੀ ਤੋਂ ਜਲਦੀ ਹੱਲ ਕੀਤਾ ਜਾਵੇ। ਇਸ ਸਬੰਤੀ ਠੇਕੇਦਾਰ ਅਤੇ ਲੋਕ ਨਿਰਮਾਣ ਵਿਭਾਗ ਦੇ ਐਕਸੀਅਨ ਦਵਿੰਦਰ ਕੁਮਾਰ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਉਨ੍ਹਾਂ ਫੋਨ ਨਹੀਂ ਚੁੱਕਿਆ।