ਸਿਨੇ ਜਗਤ ਦੀਆਂ ਉੱਘੀਆਂ ਹਸਤੀਆਂ ਵੱਲੋਂ ਆਯੂਸ਼ਮਾਨ ਨੂੰ ਜਨਮ ਦਿਨ ਦੀ ਵਧਾਈ

ਮੁੰਬਈ: ਅਦਾਕਾਰ ਆਯੂਸ਼ਮਾਨ ਖੁਰਾਣਾ ਦਾ ਅੱਜ ਜਨਮ ਦਿਨ ਹੈ ਤੇ ਬੌਲੀਵੁਡ ਦੀਆਂ ਉੱਘੀਆਂ ਹਸਤੀਆਂ ਨੇ ਉਸ ਨੂੰ ਸੋਸ਼ਲ ਮੀਡੀਆ ’ਤੇ ਜਨਮ ਦਿਨ ਦੀਆਂ ਸ਼ੁਭਕਾਮਨਾਵਾਂ ਦਿੱਤੀਆਂ। ਅਦਾਕਾਰਾ ਅਨੁਸ਼ਕਾ ਸ਼ਰਮਾ ਨੇ ਇੰਸਟਾਗ੍ਰਾਮ ’ਤੇ ਆਖਿਆ, ‘ਜਨਮ ਦਿਨ ਮੁਬਾਰਕ ਆਯੂਸ਼ਮਾਨ। ਤੁਹਾਨੂੰ ਬਹੁਤ ਪਿਆਰ ਅਤੇ ਤੁਹਾਡੀ ਤਰੱਕੀ ਦੀ ਕਾਮਨਾ ਕਰਦੀ ਹਾਂ।’ ਅਦਾਕਾਰਾ ਅਨੰਨਿਆ ਪਾਂਡੇ ਨੇ ‘ਡਰੀਮ ਗਰਲ 2’ ਦੇ ਪ੍ਰਮੋਸ਼ਨ ਦਾ ਇੱਕ ਵੀਡੀਓ ਆਪਣੀ ਇੰਸਟਾਗ੍ਰਾਮ ਸਟੋਰੀਜ਼ ’ਤੇ ਸਾਂਝਾ ਕਰਦਿਆਂ ਆਯੂਸ਼ਮਾਨ ਨੂੰ ਜਨਮ ਦਿਨ ਦੀਆਂ ਮੁਬਾਰਕਾਂ ਦਿੱਤੀਆਂ। ਵਿੱਕੀ ਕੌਸ਼ਲ ਨੇ ਆਪਣੀ ਇੰਸਟਾਗ੍ਰਾਮ ਸਟੋਰੀਜ਼ ’ਤੇ ਇੱਕ ਤਸਵੀਰ ਸਾਂਝੀ ਕਰਦਿਆਂ ਲਿਖਿਆ, ‘ਜਨਮ ਦਿਨ ਮੁਬਾਰਕ ਵੀਰੇ ਅਤੇ ‘ਡਰੀਮ ਗਰਲ 2’ ਦੀ ਵੱਡੀ ਸਫਲਤਾ ’ਤੇ ਬਹੁਤ-ਬਹੁਤ ਵਧਾਈਆਂ। -ਏਐੱਨਆਈ

ਪਤਨੀ ਤਾਹਿਰਾ ਨੇ ਲਿਖੀਆਂ ਪਿਆਰ ਭਰੀਆਂ ਸਤਰਾਂ

ਤਾਹਿਰਾ ਕਸ਼ਯਪ ਨੇ ਆਪਣੇ ਪਤੀ ਅਤੇ ਅਦਾਕਾਰ ਆਯੂਸ਼ਮਾਨ ਨੂੰ ਜਨਮ ਦਿਨ ਦੀਆਂ ਸ਼ੁਭਕਾਮਨਾਵਾਂ ਦਿੱਤੀਆਂ। ਤਾਹਿਰਾ ਨੇ ਇੰਸਟਾਗ੍ਰਾਮ ’ਤੇ ਤਸਵੀਰਾਂ ਸਾਂਝੀਆਂ ਕਰਦਿਆਂ ਕਿਹਾ, ‘ਜਨਮ ਦਿਨ ਮੁਬਾਰਕ ਰੂਹ ਦੇ ਹਾਣੀ... ਆਯੂਸ਼ਮਾਨ ਤੁਹਾਨੂੰ ਢੇਰ ਸਾਰਾ ਪਿਆਰ! ਤੁਸੀਂ ਇਕੱਲੇ ਹੋ ਜਿਸ ਲਈ ਮੈਂ ਸਵੇਰੇ ਚਾਰ ਵਜੇ ਤੱਕ ਨੱਚ ਸਕਦੀ ਹਾਂ ਅਤੇ ਅਸੀਂ ਨੱਚੇ ਵੀ ਹਾਂ! ਭਾਵੇਂ ਮੇਰੀਆਂ ਲੱਤਾਂ ਇੱਕ ਵਾਰ ਡਗਮਗਾ ਰਹੀਆਂ ਸਨ ਪਰ ਬਸੰਤੀ ਨਹੀਂ ਰੁਕੀ!! ਤੁਸੀਂ ਆਪਣੇ ਆਲੇ-ਦੁਆਲੇ ਦੇ ਹਰ ਕਿਸੇ ਲਈ ਬਹੁਤ ਸਾਰੀਆਂ ਖੁਸ਼ੀਆਂ ਲਿਆਉਂਦੇ ਹੋ। ਤੁਹਾਡੇ ਵਰਗਾ ਕੋਈ ਨਹੀਂ ਹੈ।’