ਕਰਿਆਨਾ ਸਟੋਰ ਵਿੱਚ ਅੱਗ ਕਾਰਨ ਸਾਮਾਨ ਸੜਿਆ

ਖਰੜ: ਇਥੇ ਪਿੰਡ ਤਿਊੜ ਵਿੱਚ ਦੀਵਾਲੀ ਵਾਲੀ ਰਾਤ ਨੂੰ ਅਚਾਨਕ ਇੱਕ ਕਰਿਆਨਾ ਸਟੋਰ ਵਿਚ ਅੱਗ ਲੱਗ ਗਈ, ਜਿਸ ਨਾਲ ਲੱਖਾਂ ਰੁਪਏ ਦਾ ਸਮਾਨ ਸੜ ਗਿਆ। ਇਸ ਸਬੰਧੀ ਪਿੰਡ ਦੇ ਵਸਨੀਕ ਸੁਖਵੀਰ ਸਿੰਘ ਨੇ ਦੱਸਿਆ ਕਿ ਪਿੰਡ ਤਿਊੜ ਵਿੱਚ ਉਸਦਾ ਕਰਿਆਨੇ ਦਾ ਸਟੋਰ ਹੈ ਅਤੇ ਦੀਵਾਲੀ ਵਾਲੀ ਰਾਤ ਸ਼ਾਰਟ ਸਰਕਟ ਕਾਰਨ ਅੱਗ ਲੱਗ ਗਈ। ਇਹ ਗੱਲ ਪੌਣੇ ਨੌ ਵਜੇ ਰਾਤ ਦੀ ਹੈ। ਮੌਕੇ ’ਤੇ ਦੋ ਦਰਜਨ ਦੇ ਕਰੀਬ ਪਿੰਡ ਦੇ ਵਸਨੀਕ ਇਕੱਠੇ ਹੋ ਗਏ ਜਿਨ੍ਹਾਂ ਨੇ ਰਲ ਕੇ ਅੱਗ ’ਤੇ ਕਾਬੂ ਪਾਇਆ। ਉਸ ਨੇ ਦੱਸਿਆ ਕਿ ਦੀਵਾਲੀ ਕਰ ਕੇ ਉਸ ਨੇ ਕਾਫੀ ਸਾਮਾਨ ਲਗਾਇਆ ਹੋਇਆ ਸੀ ਜੋ ਸੜ ਕੇ ਸੁਆਹ ਹੋ ਗਿਆ ਅਤੇ ਉਸਦਾ ਪੰਜ ਛੇ ਲੱਖ ਰੁਪਏ ਦਾ ਨੁਕਸਾਨ ਹੋ ਗਿਆ। -ਪੱਤਰ ਪ੍ਰੇਰਕ