ਨੇਮਾਂ ਦੀ ਉਲੰਘਣਾ ਦੇ ਦੋਸ਼ ਹੇਠ ਚਾਰ ਪ੍ਰਾਈਵੇਟ ਬੱਸਾਂ ਜ਼ਬਤ

ਪੀ.ਪੀ. ਵਰਮਾ
ਪੰਚਕੂਲਾ, 3 ਮਈ
ਸੀਆਈਡੀ ਨੇ ਮੁੱਖ ਮੰਤਰੀ ਫਲਾਇੰਗ ਸਕੁਐਡ ਨਾਲ ਮਿਲ ਕੇ ਨਿਯਮਾਂ ਦੀ ਉਲੰਘਣਾ ਕਰ ਕੇ ਉੱਤਰ ਪ੍ਰਦੇਸ਼ ਜਾਣ ਵਾਲੀਆਂ ਚਾਰ ਨਿੱਜੀ ਬੱਸਾਂ ਨੂੰ ਜ਼ਬਤ ਕਰ ਕੇ ਕਰੀਬ 2.20 ਲੱਖ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। ਉੱਤਰ ਪ੍ਰਦੇਸ਼ ਨੰਬਰ ਦੀਆਂ ਸਾਰੀਆਂ ਬੱਸਾਂ ਪੰਚਕੂਲਾ ਦੇ ਬੱਸ ਸਟੈਂਡ ’ਤੇ ਲਿਆਂਦੀਆਂ ਗਈਆਂ ਅਤੇ ਸਾਰੀਆਂ ਸਵਾਰੀਆਂ ਨੂੰ ਉਤਾਰ ਦਿੱਤਾ ਗਿਆ।
ਸੀਐੱਮ ਫਲਾਇੰਗ ਤੋਂ ਪ੍ਰਵੀਨ ਆਰੀਆ, ਸਬ ਇੰਸਪੈਕਟਰ ਰਾਜੇਸ਼, ਜੈ ਕੁਮਾਰ, ਏਐੱਸਆਈ ਸੁਸ਼ੀਲ, ਸੰਜੇ, ਗੁਰਮੀਤ ਦੇ ਨਾਲ ਏਐੱਸਆਈ ਸੁਰਿੰਦਰ ਕੁਮਾਰ, ਸੀਆਈਡੀ ਪੰਚਕੂਲਾ ਤੋਂ ਹਿਤੇਸ਼ ਕੁਮਾਰ ਮੌਕੇ ’ਤੇ ਪੁੱਜੇ। ਐੱਸਆਈ ਰਾਜੇਸ਼ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਵੱਲੋਂ ਚਾਰ ਬੱਸਾਂ ਰੋਕ ਕੇ ਚੈਕਿੰਗ ਕੀਤੀ ਗਈ ਤਾਂ ਸਵਾਰੀਆਂ ਨੇ ਉਨ੍ਹਾਂ ਨੂੰ ਦੱਸਿਆ ਕਿ ਉਨ੍ਹਾਂ ਕੋਲੋਂ ਪੈਸੇ ਤਾਂ ਲਏ ਗਏ ਹਨ, ਪਰ ਟਿਕਟਾਂ ਨਹੀਂ ਦਿੱਤੀਆਂ ਗਈਆਂ। ਇਹ ਬੱਸਾਂ ਯੂਪੀ ਨੰਬਰ ਦੀਆਂ ਹਨ ਅਤੇ ਉੱਤਰ ਪ੍ਰਦੇਸ਼ ਦੇ ਬਦਾਯੂੰ ਸ਼ਹਿਰ ਸਮੇਤ ਹੋਰ ਜ਼ਿਲ੍ਹਿਆਂ ਨੂੰ ਜਾ ਰਹੀਆਂ ਹਨ। ਮੁੱਖ ਮੰਤਰੀ ਫਲਾਇੰਗ ਸਕੁਐਡ ਨੇ ਰੋਕੀਆਂ ਬੱਸਾਂ ਨੂੰ ਸਵਾਰੀਆਂ ਸਮੇਤ ਆਰਟੀਏ ਦਫ਼ਤਰ ਪੰਚਕੂਲਾ ਵਿੱਚ ਨਿਯਮਾਂ ਅਨੁਸਾਰ ਕਾਰਵਾਈ ਕਰਨ ਲਈ ਲਿਆਂਦਾ ਅਤੇ ਚਾਰੋਂ ਬੱਸਾਂ ਦੇ ਦਸਤਾਵੇਜ਼ਾਂ ਵਿੱਚ ਬੇਨਿਯਮੀਆਂ ਪਾਏ ਜਾਣ ਤੋਂ ਬਾਅਦ ਚਾਰੋਂ ਬੱਸਾਂ ਨੂੰ ਜ਼ਬਤ ਕਰ ਲਿਆ ਗਿਆ।