ਪਾਕਿਸਤਾਨ ’ਚੋਂ ਰਿਹਾਅ ਚਾਰ ਕੈਦੀ ਵਤਨ ਪਰਤੇ

ਪੱਤਰ ਪ੍ਰੇਰਕ
ਅਟਾਰੀ, 29 ਮਈ
ਭਾਰਤ-ਪਾਕਿਸਤਾਨ ਵਿਚਕਾਰ ਹੋਏ ਸਮਝੌਤੇ ਤਹਿਤ ਪਾਕਿਸਤਾਨ ਸਰਕਾਰ ਨੇ ਮਾਂ-ਪੁੱਤਰ ਸਮੇਤ 4 ਭਾਰਤੀ ਕੈਦੀਆਂ ਨੂੰ ਰਿਹਾਅ ਕੀਤਾ ਹੈ, ਜੋ ਅੱਜ ਅਟਾਰੀ-ਵਾਹਗਾ ਸਰਹੱਦ ਰਾਹੀਂ ਵਤਨ ਪਰਤ ਗਏ ਹਨ। ਜਾਣਕਾਰੀ ਅਨੁਸਾਰ ਇਹ ਲੰਮੇ ਸਮੇਂ ਤੋਂ ਪਾਕਿਸਤਾਨ ਦੀਆਂ ਵੱਖ-ਵੱਖ ਜੇਲ੍ਹਾਂ ਵਿੱਚ ਬੰਦ ਸਨ। ਪਾਕਿਸਤਾਨ ਤੋਂ ਰਿਹਾਅ ਹੋ ਕੇ ਵਤਨ ਪੁੱਜੇ ਭਾਰਤੀ ਕੈਦੀਆਂ ਵਿੱਚ ਇੱਕ ਔਰਤ ਵਾਹਿਦਾ ਬੇਗ਼ਮ ਤੇ ਉਸ ਦਾ ਪੁੱਤਰ ਫੈਜ਼ ਖਾਨ ਵਾਸੀ ਅਸਾਮ, ਕੋਇਟਾ ਸੈਂਟਰਲ ਜੇਲ੍ਹ ਪਾਕਿਸਤਾਨ, ਸੂਰਜਪਾਲ ਵਾਸੀ ਉੱਤਰ ਪ੍ਰਦੇਸ਼, ਕੋਟ ਲੱਖਪਤ ਜੇਲ੍ਹ ਲਾਹੌਰ ਅਤੇ ਸ਼ਾਬੀਰ ਅਹਿਮਦ ਵਾਸੀ ਅਸਾਮ, ਹੈਦਰਾਬਾਦ ਸੈਂਟਰਲ ਜੇਲ੍ਹ ਪਾਕਿਸਤਾਨ ’ਚੋਂ ਰਿਹਾਅ ਹੋਏ ਹਨ। ਇਨ੍ਹਾਂ ਭਾਰਤੀ ਸਿਵਲ ਕੈਦੀਆਂ ਨੂੰ ਅਟਾਰੀ-ਵਾਹਗਾ ਸਰਹੱਦ ’ਤੇ ਪਾਕਿਸਤਾਨ ਰੇਂਜਰਜ਼ ਅਧਿਕਾਰੀ ਕੈਪਟਨ ਮਨਸੂਰ ਨੇ ਸੀਮਾ ਸੁਰੱਖਿਆ ਬਲ ਦੇ ਅਧਿਕਾਰੀ ਦੇ ਹਵਾਲੇ ਕੀਤਾ।