ਨਾਜਾਇਜ਼ ਹਥਿਆਰਾਂ ਸਣੇ ਚਾਰ ਵਿਅਕਤੀ ਕਾਬੂ

ਪੱਤਰ ਪ੍ਰੇਰਕ
ਜਲੰਧਰ, 22 ਅਗਸਤ
ਪੁਲੀਸ ਵੱਲੋਂ ਵੱਖ-ਵੱਖ ਥਾਣਿਆਂ ਵਿਚ 3 ਮੁਕੱਦਮੇ ਦਰਜ ਕਰ ਕੇ ਚਾਰ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕਰਕੇ ਉਨ੍ਹਾਂ ਪਾਸੋਂ ਤਿੰਨ ਨਾਜਾਇਜ਼ ਪਿਸਤੌਲ ਸਮੇਤ 11 ਰੌਂਦ ਬਰਾਮਦ ਕੀਤੇ ਹਨ। ਜਲੰਧਰ ਪੁਲੀਸ ਦੀ ਸੀਆਈਏ ਸਟਾਫ ਦੀ ਇੱਕ ਟੀਮ ਨੇ ਨਹਿਰ ਪੁਲੀ ਬਸਤੀ ਬਾਵਾ ਖੇਲ ਜਲੰਧਰ ਤੋਂ ਮੁਖਬਰੀ ਦੇ ਆਧਾਰ ’ਤੇ ਗਗਨਦੀਪ ਵਾਸੀ ਕੱਚਾ ਕੋਟ ਤੇ ਹਰਜਿੰਦਰ ਸਿੰਘ ਵਾਸੀ ਪਿੰਡ ਸੰਘਰਾਣਾ ਜਿਲ੍ਹਾ ਕਪੂਰਥਲਾ ਨੂੰ 32 ਬੋਰ ਦੇ ਪਿਸਤੌਲ ਸਣੇ ਕਾਬੂ ਕੀਤਾ। ਇਸੇ ਤਰ੍ਹਾਂ ਸੀਆਈਏ ਸਟਾਫ ਨੇ ਜੋਤੀ ਚੌਂਕ ਜਲੰਧਰ ਨੇੜੇ ਗਸ਼ਤ ਦੌਰਾਨ ਰਾਹੁਲ ਦਾਦਰੀ ਉਰਫ ਇੰਦੀ ਵਾਸੀ ਅਲੀ ਮੁੱਹਲਾ ਜਲੰਧਰ ਨੂੰ ਕਾਬੂ ਕਰਕੇ ਉਸ ਪਾਸੋਂ 1 ਦੇਸੀ ਪਿਸਤੌਲ 12 ਬੋਰ ਸਮੇਤ 1 ਰੌਂਦ ਬ੍ਰਾਮਦ ਕੀਤਾ। ਇਸੇ ਤਰ੍ਹਾਂ ਸੀਆਈਏ ਟੀਮ ਨੇ ਹਰਨਾਮਦਾਸਪੁਰਾ ਜਲੰਧਰ ਤੋਂ ਕਮਲਜੀਤ ਸਿੰਘ ਉਰਫ ਅਮਨ ਵਾਸੀ ਪਿੰਡ ਕੀਰ ਜਿਲ੍ਹਾ ਜੰਮੂ ਨੂੰ ਇੱਕ ਨਾਜਾਇਜ ਦੇਸੀ ਪਿਸਤੌਲ ਸਮੇਤ ਕਾਬੂ ਕੀਤਾ।