ਤੇਜ਼ਧਾਰ ਹਥਿਆਰ ਨਾਲ ਹਮਲਾ ਕਰਨ ਤੇ ਦਾੜ੍ਹੀ ਪੁੱਟਣ ਦੇ ਦੋਸ਼ ਹੇਠ ਭਰਜਾਈ ਸਣੇ ਚਾਰ ਨਾਮਜ਼ਦ

ਨਿੱਜੀ ਪੱਤਰ ਪ੍ਰੇਰਕ
ਜਗਰਾਉਂ, 28 ਸਤੰਬਰ
ਨੇੜਲੇ ਪਿੰਡ ਰਸੂਲਪੁਰ ‘ਚ ਪਰਿਵਾਰ ‘ਚ ਮਾਮੂਲੀ ਗੱਲ ਤੋਂ ਬਾਅਦ ਹੋਈ ਤਕਰਾਰ ਅਤੇ ਬਾਅਦ ’ਚ ਕਰਦ ਨਾਲ ਕੀਤੇ ਹਮਲੇ ਦੇ ਦੋਸ਼ ‘ਚ ਸ਼ਿਕਾਇਤਕਰਤਾ ਦੀ ਭਰਜਾਈ ਸਣੇ ਚਾਰ ਜਣਿਆਂ ਨੂੰ ਨਾਮਜ਼ਦ ਕੀਤਾ ਗਿਆ ਹੈ। ਥਾਣਾ ਹਠੂਰ ਦੇ ਐੱਸਆਈ ਜਗਜੀਤ ਸਿੰਘ ਮੁਤਾਬਕ ਗੁਰਪ੍ਰੀਤ ਸਿੰਘ ਦੇ ਬਿਆਨਾਂ ‘ਤੇ ਉਸ ਦੀ ਭਰਜਾਈ ਵੀਰਪਾਲ ਕੌਰ, ਉਸ ਦੀ ਮਾਂ, ਮੇਜਰ ਸਿੰਘ ਅਤੇ ਫੌਜੀ ਭਤੀਜੇ ਖ਼ਿਲਾਫ਼ ਧਾਰਾ 323, 34 ਤੋਂ ਇਲਾਵਾ 295 ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ। ਪੁਲੀਸ ਨੂੰ ਦਿੱਤੇ ਬਿਆਨਾਂ ‘ਚ ਸ਼ਿਕਾਇਤਕਰਤਾ ਨੇ ਕਿਹਾ ਹੈ ਕਿ ਉਸ ਦੀ ਪਤਨੀ ਬਲਜੀਤ ਕੌਰ ਤੇ ਭਰਜਾਈ ਵੀਰਪਾਲ ਕੌਰ ਦਰਖਤਾਂ ਦਾ ਬਾਲਣ ਸਾਂਝੇ ਸ਼ੈੱਡ ‘ਚ ਰੱਖ ਰਹੀਆਂ ਸਨ ਤਾਂ ਦੋਹਾਂ ‘ਚ ਬਹਿਸ ਹੋ ਗਈ। ਬਾਅਦ ‘ਚ ਘਰੇ ਦੋਹਾਂ ਨੂੰ ਸਮਝਾਇਆ ਗਿਆ ਪਰ ਵੀਰਪਾਲ ਕੌਰ ਨੇ ਫੋਨ ਕਰਕੇ ਆਪਣੇ ਪੇਕੇ ਪਿੰਡ ਨਿਹਾਲੂਵਾਲਾ (ਬਰਨਾਲਾ) ਤੋਂ ਆਪਣੀ ਮਾਂ, ਪਿਤਾ ਮੇਜਰ ਸਿੰਘ ਤੇ ਭਤੀਜਾ ਆ ਗਏ ਅਤੇ ਖਿੱਚਧੂਹ ਸ਼ੁਰੂ ਕਰ ਦਿੱਤੀ। ਭਰਜਾਈ ਦੀ ਮਾਤਾ ਨੇ ਕਰਦ ਨਾਲ ਉਂਗਲ ਤੇ ਚੀਚੀ ‘ਤੇ ਵਾਰ ਕੀਤਾ। ਬਾਅਦ ‘ਚ ਮੁਲਜ਼ਮਾਂ ਨੇ ਉਸ ਦੀ ਦਾਹੜੀ ਪੁੱਟ ਦਿੱਤੀ ਤੇ ਮੇਜਰ ਸਿੰਘ ਸ਼ਿਕਾਇਤਕਰਤਾ ਦਾ ਗਾਤਰਾ ਵੀ ਖਿੱਚ ਲਿਆ ਅਤੇ ਸਾਰਿਆਂ ਨੇ ਮਿਲ ਕੇ ਉਸ ਦੀ ਕੁੱਟਮਾਰ ਕੀਤੀ।