ਖਾਰਕੀਵ ’ਚ ਰੂਸੀ ਡਰੋਨ ਹਮਲੇ ਵਿੱਚ ਚਾਰ ਹਲਾਕ, 12 ਜ਼ਖ਼ਮੀ

ਕੀਵ, 4 ਅਪਰੈਲ
ਰੂਸੀ ਫੌਜਾਂ ਨੇ ਬੀਤੀ ਰਾਤ ਯੂਕਰੇਨ ਦੇ ਸ਼ਹਿਰ ਖਾਰਕੀਵ ਵਿੱਚ ਕਈ ਡਰੋਨ ਹਮਲੇ ਕੀਤੇ ਜਿਸ ਵਿੱਚ ਚਾਰ ਲੋਕਾਂ ਦੀ ਮੌਤ ਹੋ ਗਈ, ਜਦੋਂਕਿ 12 ਹੋਰ ਜ਼ਖ਼ਮੀ ਹੋ ਗਏ। ਖੇਤਰੀ ਗਵਰਨਰ ਓਲੇਹ ਸਿਨੀਹੂਬੋਵ ਨੇ ਇਹ ਜਾਣਕਾਰੀ ਦਿੱਤੀ। ਰੂਸ ਨੇ ਯੂਕਰੇਨ ਦੇ ਦੂਜੇ ਸਭ ਤੋਂ ਵੱਡੇ ਸ਼ਹਿਰ ’ਤੇ ਘੱਟੋ-ਘੱਟ 15 ਡਰੋਨ ਹਮਲੇ ਕੀਤੇ। ਹਾਲਾਂਕਿ, ਇਨ੍ਹਾਂ ਵਿੱਚੋਂ ਕਈਆਂ ਨੂੰ ਯੂਕਰੇਨੀ ਹਵਾਈ ਫੌਜ ਨੇ ਫੁੰਡ ਦਿੱਤਾ ਹੈ।
ਇਸ ਤੋਂ ਪਹਿਲਾਂ ਹਵਾਈ ਹਮਲੇ ਰਾਹੀਂ ਇੱਕ ਉੱਚੀ ਇਮਾਰਤ ਨੂੰ ਨਿਸ਼ਾਨਾ ਬਣਾਇਆ ਗਿਆ ਜਿਸ ਵਿੱਚ ਤਿੰਨ ਬਚਾਅ ਕਰਮੀ ਮਾਰੇ ਗਏ, ਜਦੋਂਕਿ ਛੇ ਹੋਰ ਜ਼ਖ਼ਮੀ ਹੋ ਗਏ। ਇਸ ਦੌਰਾਨ ਇੱਕ ਡਰੋਨ 14 ਮੰਜ਼ਿਲਾ ਇਮਾਰਤ ’ਤੇ ਡਿਗਿਆ ਜਿਸ ਵਿੱਚ 69 ਸਾਲਾ ਔਰਤ ਦੀ ਮੌਤ ਹੋ ਗਈ। ਰੂਸੀ ਫੌਜਾਂ ਦੇ ਹਾਲ ਹੀ ਦੇ ਹਫ਼ਤਿਆਂ ਦੌਰਾਨ ਖਾਰਕੀਵ ਵਿੱਚ ਹਵਾਈ ਹਮਲੇ ਵਧੇ ਹਨ। ਇਹ ਪੂਰਬੀ ਸ਼ਹਿਰ ਰੂਸ ਦੀ ਸਰਹੱਦ ਦੇ ਕਰੀਬ ਪੈਂਦਾ ਹੈ ਅਤੇ ਇਸ ’ਤੇ ਬੈਲਿਸਟਿਕ ਮਿਜ਼ਾਈਲਾਂ ਅਤੇ ਡਰੋਨਾਂ ਦੋਹਾਂ ਨਾਲ ਹਮਲੇ ਕੀਤੇ ਜਾ ਰਹੇ ਹਨ। -ਏਪੀ