ਪਹਿਲੀ ਵਾਰ ਸਲਮਾਨ ਦੀ ਫ਼ਿਲਮ ਲਈ ਗੀਤ ਗਾਏਗਾ ਅਰਿਜੀਤ

ਮੁੰਬਈ: ਬੌਲੀਵੁੱਡ ਦੇ ਪਿੱਠਵਰਤੀ ਫ਼ਨਕਾਰ ਅਰਿਜੀਤ ਵੱਲੋਂ ਸੁਪਰਸਟਾਰ ਸਲਮਾਨ ਖ਼ਾਨ ਦੀ ਫ਼ਿਲਮ ਲਈ ਗੀਤ ਗਾਉਣ ਲਈ ਰਜ਼ਾਮੰਦ ਹੋਣ ਤੋਂ ਜਾਪਦਾ ਹੈ ਕਿ ਇਨ੍ਹਾਂ ਦੋਵਾਂ ਵਿਚਾਲੇ ਚਲ ਰਹੀ ‘ਤਕਰਾਰ’ ਹੁਣ ਖ਼ਤਮ ਹੋ ਗਈ ਹੈ। ਯਸ਼ ਰਾਜ ਫ਼ਿਲਮਜ਼ (ਵਾਈਆਰਐੱਫ) ਦੇ ਮਾਲਕ ਆਦਿੱਤਿਆ ਚੋਪੜਾ ਨੇ ਆਪਣੀ ਆਉਣ ਵਾਲੀ ਫ਼ਿਲਮ ‘ਟਾਈਗਰ 3’ ਦੇ ਦੋ ਗਾਣਿਆਂ ਲਈ ਗਾਇਕ ਅਰਿਜੀਤ ਨੂੰ ਚੁਣਿਆ ਹੈ। ਅਰਿਜੀਤ ਦਾ ਪਹਿਲਾ ਗੀਤ ‘ਲੇ ਕੇ ਪ੍ਰਭੂ ਦਾ ਨਾਮ’ ਆਗਾਮੀ ਸੋਮਵਾਰ ਨੂੰ ਰਿਲੀਜ਼ ਹੋਵੇਗਾ। ਦੂਜਾ ਗਾਣਾ ਰੁਮਾਂਸ ਭਰਪੂਰ ਹੈ ਜਿਸ ਨੂੰ ਸਲਮਾਨ ਖਾਨ ਅਤੇ ਅਦਾਕਾਰਾ ਕੈਟਰੀਨਾ ਕੈਫ਼ ’ਤੇ ਫਿਲਮਾਇਆ ਜਾਵੇਗਾ। ਫ਼ਿਲਮ ਦੇ ਨਿਰਦੇਸ਼ਕ ਮਨੀਸ਼ ਸ਼ਰਮਾ ਨੇ ਕਿਹਾ, ‘ਅਸੀਂ ਗੀਤ ‘ਲੇ ਕੇ ਪ੍ਰਭੂ ਦਾ ਨਾਮ’ ਦੀ ਰਿਲੀਜ਼ ਲਈ ਹੋਰ ਇੰਤਜ਼ਾਰ ਨਹੀਂ ਕਰ ਸਕਦੇ..!’ ਸੰਗੀਤ ਨਿਰਦੇਸ਼ਕ ਪ੍ਰੀਤਮ ਨੇ ਕਿਹਾ ਕਿ ਸਲਮਾਨ ਖਾਨ ਬੌਲੀਵੁੱਡ ਦਾ ਸੁਪਰਸਟਾਰ ਹੈ ਅਤੇ ਅਰਿਜੀਤ ਸਿੰਘ ਨੌਜਵਾਨ ਪੀੜ੍ਹੀ ਦਾ ਸਭ ਤੋਂ ਵਧੀਆ ਗਾਇਕ ਹੈ। ਉਸ ਨੇ ਕਿਹਾ ਕਿ ਇਨ੍ਹਾਂ ਦੋਵਾਂ ਵੱਡੇ ਕਲਾਕਾਰਾਂ ਦੇ ਇਕੱਠੇ ਹੋਣ ਦਾ ਕਾਫ਼ੀ ਸਮੇਂ ਤੋਂ ਇੰਤਜ਼ਾਰ ਸੀ ਅਤੇ ਹੁਣ ਇਹ ਫ਼ਿਲਮ ‘ਟਾਈਗਰ 3’ ਵਿੱਚ ਇਕੱਠੇ ਹੋ ਰਹੇ ਹਨ। ਫ਼ਿਲਮ ‘ਟਾਈਗਰ 3’ ਇਸ ਸਾਲ 12 ਨਵੰਬਰ ਨੂੰ ਰਿਲੀਜ਼ ਹੋ ਰਹੀ ਹੈ। ਜ਼ਿਕਰਯੋਗ ਹੈ ਕਿ ਅਰਿਜੀਤ ਅਤੇ ਅਦਾਕਾਰ ਸਲਮਾਨ ਖ਼ਾਨ ਵਿਚਾਲੇ ਲਗਪਗ ਇੱਕ ਦਹਾਕਾ ਪਹਿਲਾਂ ਇੱਕ ਪੁਰਸਕਾਰ ਸਮਾਰੋਹ ਦੌਰਾਨ ਤਕਰਾਰ ਹੋ ਗਈ ਸੀ। ਇਸ ਸਮਾਰੋਹ ਦੀ ਮੇਜ਼ਬਾਨੀ ਸਲਮਾਨ ਖਾਨ ਕਰ ਰਿਹਾ ਸੀ। -ਆਈਏਐੱਨਐੱਸ