ਕਾਰ ਖੱਡ ਵਿੱਚ ਡਿੱਗਣ ਕਾਰਨ ਪੰਜ ਨੌਜਵਾਨ ਜ਼ਖ਼ਮੀ

ਪੱਤਰ ਪ੍ਰੇਰਕ
ਪਠਾਨਕੋਟ, 13 ਮਾਰਚ
ਇੱਥੇ ਲੰਘੀ ਰਾਤ ਸ਼ਾਹਪੁਰਕੰਡੀ ਵਿੱਚ ਤਵੀ ਕਾਲਜ ਕੋਲ ਕਾਂਸ਼ੀ ਮੋੜ ’ਤੇ ਧਾਰ ਕਲਾਂ ਵੱਲੋਂ ਆਉਂਦੀ ਇਕ ਕਾਰ ਸੰਤੁਲਨ ਵਿਗੜਨ ਕਾਰਨ 100 ਫੁੱਟ ਡੂੰਘੀ ਖੱਡ ਵਿੱਚ ਜਾ ਡਿੱਗੀ। ਇਸ ਦੌਰਾਨ ਕਾਰ ਵਿੱਚ ਸਵਾਰ 5 ਨੌਜਵਾਨ ਜ਼ਖ਼ਮੀ ਹੋ ਗਏ। ਜਾਣਕਾਰੀ ਅਨੁਸਾਰ ਦੇਰ ਸ਼ਾਮ ਨੂੰ 5 ਨੌਜਵਾਨ ਚਮਰੋੜ ਪੱਤਣ ਵਿੱਚ ਮਿਨੀ ਗੋਆ ਤੋਂ ਪਠਾਨਕੋਟ ਵੱਲ ਹੁੰਡੇਈ ਕਾਰ ਵਿੱਚ ਆ ਰਹੇ ਸਨ। ਜਦੋਂ ਉਹ ਤਵੀ ਕਾਲਜ ਦੇ ਕਾਂਸ਼ੀ ਮੋੜ ’ਤੇ ਪੁੱਜੇ ਤਾਂ ਕਾਰ ਅੱਗੇ ਪਸ਼ੂ ਆ ਜਾਣ ਕਰਕੇ ਕਾਰ ਦਾ ਸੰਤੁਲਨ ਵਿਗੜ ਗਿਆ। ਇਸ ਦੌਰਾਨ ਕਾਰ ਲਗਪਗ 100 ਫੁੱਟ ਡੂੰਘੀ ਖੱਡ ਵਿੱਚ ਜਾ ਡਿੱਗੀ ਤੇ ਪਲਟ ਗਈ। ਕਾਰ ਵਿੱਚ ਸਵਾਰ ਨੌਜਵਾਨਾਂ ਦੇ ਸੱਟਾਂ ਵੱਜੀਆਂ। ਨੌਜਵਾਨਾਂ ਨੂੰ ਡੈਮ ਦੇ ਹਸਪਤਾਲ ਵਿੱਚ ਮੁੱਢਲੀ ਸਹਾਇਤਾ ਦੇ ਕੇ ਭੇਜ ਦਿੱਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਹਾਦਸੇ ਦੌਰਾਨ ਕਾਰ ਦੇ ਏਅਰਬੈਗ ਖੁੱਲ੍ਹਣ ਨਾਲ ਸਾਰੇ ਨੌਜਵਾਨਾਂ ਦਾ ਬਚਾਅ ਹੋ ਗਿਆ।