ਪਿੰਡ ਭਬਿਆਣਾ ’ਚ ਛੇ ਨਕਾਬਪੋਸ਼ਾਂ ਵਲੋਂ ਫਾਇਰਿੰਗ, ਪੰਜ ਜ਼ਖ਼ਮੀ

ਫਗਵਾੜਾ (ਜਸਬੀਰ ਸਿੰਘ ਚਾਨਾ): ਇਥੇ ਫਗਵਾੜਾ-ਹੁਸ਼ਿਆਰਪੁਰ ਰੋਡ ’ਤੇ ਪਿੰਡ ਭਬਿਆਣਾ ’ਚ ਅੱਜ ਰਾਤ ਮੋਟਰਸਾਈਕਲ ਸਵਾਰ ਕਰੀਬ ਅੱਧਾ ਦਰਜਨ ਨਕਾਬਪੋਸ਼ਾਂ ਨੇ ਧਾਰਮਿਕ ਥਾਂ ਨੇੜੇ ਬੈਠੇ ਲੋਕਾਂ ’ਤੇ ਅੰਨ੍ਹੇਵਾਹ ਗੋਲੀਆਂ ਚਲਾ ਦਿੱਤੀਆਂ, ਜਿਸ ਕਾਰਨ ਚਾਰ ਵਿਅਕਤੀ ਗੰਭੀਰ ਜ਼ਖ਼ਮੀ ਹੋ ਗਏ। ਹਮਲਾਵਰਾਂ ਨੇ ਇੱਕ ਰਾਹੀਗਰ ਨੂੰ ਵੀ ਜ਼ਖ਼ਮੀ ਕਰ ਦਿੱਤਾ ਜਿਸ ਦੀ ਪਛਾਣ ਤੇਜਵੀਰ ਸਿੰਘ ਵਾਸੀ ਪਿੰਡ ਡੁਮੇਲੀ ਵਜੋਂ ਹੋਈ ਹੈ। ਜ਼ਖ਼ਮੀਆਂ ਨੂੰ ਸਿਵਲ ਹਸਪਤਾਲ ਲਿਆਂਦਾ ਗਿਆ, ਜਿਥੇ ਦੋ ਦੀ ਗੰਭੀਰ ਹਾਲਤ ਨੂੰ ਦੇਖਦਿਆਂ ਜਲੰਧਰ ਰੈਫ਼ਰ ਕਰ ਦਿੱਤਾ ਗਿਆ ਹੈ। ਜ਼ਖ਼ਮੀਆਂ ਦੀ ਪਛਾਣ ਬਿੱਟੂ (42) ਪੁੱਤਰ ਬਲਬੀਰ ਚੰਦ, ਜਸ਼ਨਪ੍ਰੀਤ ਸਿੰਘ (19) ਪੁੱਤਰ ਹਰਜੀਤ ਸਿੰਘ, ਬੂਟਾ ਰਾਮ (55) ਪੁੱਤਰ ਗਿੰਦੀ ਰਾਮ ਅਤੇ ਸ਼ਿੰਦਾ (45) ਪੁੱਤਰ ਮਿੰਦਾ ਰਾਮ ਵਜੋਂ ਹੋਈ ਹੈ। ਪਿੰਡ ਦੇ ਪੰਚ ਅਮਰੀਕ ਸਿੰਘ ਅਤੇ ਜਗਜੀਵਨ ਰਾਮ ਨੇ ਦੱਸਿਆ ਕਿ ਹਮਲਾਵਰ ਦੋ ਮੋਟਰਸਾਈਕਲਾਂ ’ਤੇ ਆਏ ਸਨ। ਦੋ ਨੌਜਵਾਨ ਪਹਿਲਾਂ ਮੋਟਰਸਾਈਕਲ ’ਤੇ ਇਲਾਕੇ ਦਾ ਚੱਕਰ ਲਗਾ ਕੇ ਗਏ ਸਨ। ਪਿੰਡ ਵਾਸੀਆਂ ਨੇ ਖੁਦ ਹੀ ਜ਼ਖ਼ਮੀਆਂ ਨੂੰ ਸਿਵਲ ਹਸਪਤਾਲ ਪਹੁੰਚਾਇਆ। ਐੱਸਪੀ ਰੁਪਿੰਦਰ ਕੌਰ ਭੱਟੀ, ਕਾਂਗਰਸੀ ਵਿਧਾਇਕ ਬਲਵਿੰਦਰ ਸਿੰਘ ਧਾਲੀਵਾਲ, ‘ਆਪ’ ਆਗੂ ਹਰਜੀ ਮਾਨ ਸਿਵਲ ਹਸਪਤਾਲ ਪੁੱਜੇ ਅਤੇ ਉਨ੍ਹਾਂ ਜ਼ਖ਼ਮੀਆਂ ਦਾ ਹਾਲ-ਚਾਲ ਪੁੱਛਿਆ। ਐੱਸਪੀ ਨੇ ਦੱਸਿਆ ਕਿ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਜਲਦੀ ਦੋਸ਼ੀਆਂ ਨੂੰ ਕਾਬੂ ਕਰ ਲਿਆ ਜਾਵੇਗਾ।