ਫਾਇਰ ਬ੍ਰਿਗੇਡ ਆਧੁਨਿਕ ਸਹੂਲਤਾਂ ਨਾਲ ਲੈਸ

ਮੁਕੇਸ਼ ਕੁਮਾਰ
ਚੰਡੀਗੜ੍ਹ, 28 ਅਪਰੈਲ
ਚੰਡੀਗੜ੍ਹ ਨਗਰ ਨਿਗਮ ਵੱਲੋਂ ਸ਼ਹਿਰ ਵਿੱਚ ਅੱਗ ਦੀਆਂ ਘਟਨਾਵਾਂ ’ਤੇ ਕਾਬੂ ਪਾਉਣ ਲਈ ਅੱਗ ਬੁਝਾਊ ਪ੍ਰਬੰਧ ਨੂੰ ਆਧੁਨਿਕ ਉਪਕਰਨਾਂ ਨਾਲ ਲੈਸ ਕੀਤਾ ਜਾ ਰਿਹਾ ਹੈ। ਨਗਰ ਨਿਗਮ ਨੇ ਚੰਡੀਗੜ੍ਹ ਦੇ ਫਾਇਰ ਐਂਡ ਰੈਸਕਿਊ ਸਰਵਿਸਿਜ਼ ਦੇ ਅੱਗ ਬੁਝਾਊ ਦਸਤਿਆਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਅਤੇ ਵੱਖ-ਵੱਖ ਬਾਇਓਕੈਮੀਕਲ ਖਤਰਿਆਂ ਨੂੰ ਧਿਆਨ ਵਿੱਚ ਰੱਖਦਿਆਂ ਪਾਈਰੋਲੀਨ/ਸਪਲੈਸ਼ ਟਾਈਟ ਸੂਟ ਅਤੇ ਕੈਮੀਕਲ/ਗੈਸ ਟਾਈਟ ਸੂਟ ਖ਼ਰੀਦੇ ਹਨ। ਇਹ ਪਹਿਲਾ ਮੌਕਾ ਹੈ ਜਦੋਂ ਨਗਰ ਨਿਗਮ ਦੇ ਐਮਰਜੈਂਸੀ ਰਿਸਪਾਂਸ ਵਿਭਾਗ ਨੇ ਫਾਇਰ ਕਰਮੀਆਂ ਦੀ ਜਾਨ ਬਚਾਉਣ ਲਈ ਇਸ ਤਰ੍ਹਾਂ ਦਾ ਸਾਮਾਨ ਖ਼ਰੀਦਿਆ ਹੈ। ਨਗਰ ਨਿਗਮ ਨੇ ਹਾਲ ਹੀ ਵਿੱਚ ਤੰਗ ਗਲੀਆਂ ਵਿੱਚ ਅੱਗ ਬੁਝਾਉਣ ਲਈ ਵਿਸ਼ੇਸ਼ ਤੌਰ ’ਤੇ ਸੱਤ ਬੁੱਲੇਟ ਮੋਟਰਸਾਈਕਲ ਅਤੇ 14 ਵਾਟਰ ਮਿਸਟ ਸ਼ਾਮਲ ਕੀਤੇ ਹਨ। ਇਸ ਤੋਂ ਇਲਾਵਾ ਨਗਰ ਨਿਗਮ ਨੇ ਤੰਗ ਲੇਨਾਂ ਵਿੱਚ ਅੱਗ ਬੁਝਾਉਣ ਅਤੇ ਵੀਵੀਆਈਪੀ ਡਿਊਟੀਆਂ ਲਈ ਮਿਨੀ ਵਾਟਰ ਟੈਂਡਰ ਨਾਲ ਬਣੀ ਟਾਟਾ 407 ਅਤੇ ਅੱਗ ਬੁਝਾਊ ਡਿਊਟੀਆਂ ਲਈ ਵਾਟਰ ਟੈਂਡਰ ਦੇ ਨਾਲ ਇੱਕ ਟਾਟਾ 1613 ਤਿਆਰ ਕੀਤੀ ਹੈ। ਇਸ ਤੋਂ ਇਲਾਵਾ ਤੰਗ ਗਲੀਆਂ ਵਿੱਚ ਅੱਗ ਬੁਝਾਉਣ ਲਈ ਵਾਟਰ ਮਿਸਟ ਟੈਕਨਾਲੋਜੀ ’ਤੇ ਆਧਾਰਿਤ ਮਿਨੀ ਵਾਟਰ ਟੈਂਡਰ ਨਾਲ ਚਾਰ ਟਾਟਾ ਜ਼ੈਨਨ ਵਾਹਨ ਤਿਆਰ ਕੀਤੇ ਗਏ ਹਨ। ਇਸ ਤੋਂ ਇਲਾਵਾ ਨਗਰ ਨਿਗਮ ਨੇ ਅੱਗ ਬੁਝਾਊ ਪ੍ਰਣਾਲੀ ਨੂੰ ਮਜ਼ਬੂਤ ਕਰਨ ਲਈ ਇਨਫਲੇਟੇਬਲ ਐਮਰਜੈਂਸੀ ਲਾਈਟਿੰਗ ਟਾਵਰ ਵੀ ਖ਼ਰੀਦਿਆ ਹੈ। ਇਨਫਲੇਟੇਬਲ ਐਮਰਜੈਂਸੀ ਲਾਈਟਿੰਗ ਟਾਵਰ ਦੀ ਵਰਤੋਂ ਵੱਡੀਆਂ ਆਫ਼ਤਾਂ ਜਿਵੇਂ ਕਿ ਇਮਾਰਤ ਡਿੱਗਣ, ਅੱਗ ਲੱਗਣ ਦੀਆਂ ਘਟਨਾਵਾਂ ਅਤੇ ਰਾਤ ਨੂੰ ਬਚਾਅ ਕਾਰਜਾਂ ਵਿੱਚ ਕੀਤੀ ਜਾਂਦੀ ਹੈ। ਇਸ ਤੋਂ ਇਲਾਵਾ ਪੰਜ ਥਰਮਲ ਇਮੇਜਿੰਗ ਡਿਟੈਕਟਰ ਵੀ ਘੱਟ ਦਿੱਖ ਵਾਲੇ ਧੂੰਏਂ/ਧੂੰਏਂ ਵਾਲੇ ਖੇਤਰਾਂ ਵਿੱਚ ਖੋਜ ਲਈ ਖ਼ਰੀਦੇ ਗਏ ਹਨ। ਇਸਤੋਂ ਇਲਾਵਾ ਵਿਭਾਗ ਨੂੰ ਮਜ਼ਬੂਤ ਕਰਨ ਲਈ ਨਗਰ ਨਿਗਮ ਨੇ ਸਾਲ 2022 ਵਿੱਚ ਰੈਗੂਲਰ ਭਰਤੀ ਰਾਹੀਂ 245 ਫਾਇਰਮੈਨ ਅਤੇ 35 ਡਰਾਈਵਰ ਨਿਯੁਕਤ ਕੀਤੇ ਹਨ।