ਸੜਕ ਹਾਦਸੇ ’ਚ ਪਿਉ-ਪੁੱਤ ਹਲਾਕ

ਫਿਰੋਜ਼ਪੁਰ (ਸੰਜੀਵ ਹਾਂਡਾ):

ਪਿੰਡ ਸਤੀਏ ਵਾਲਾ ਨਜ਼ਦੀਕ ਸੜਕ ਹਾਦਸੇ ਵਿਚ ਕਾਰ ਸਵਾਰ ਪਿਉ-ਪੁੱਤ ਦੀ ਮੌਤ ਹੋ ਗਈ। ਮ੍ਰਿਤਕਾਂ ਦੀ ਪਛਾਣ ਰਾਕੇਸ਼ ਕੁਮਾਰ (39) ਅਤੇ ਉਸ ਦੇ ਪਿਤਾ ਸੁਰਿੰਦਰ ਕੁਮਾਰ (60) ਵਾਸੀ ਨਿਊ ਡਿਫ਼ੈਂਸ ਕਲੋਨੀ ਪਿੰਡ ਸਤੀਏ ਵਾਲਾ ਵਜੋਂ ਹੋਈ ਹੈ। ਘਟਨਾ ਵੇਲੇ ਰਾਕੇਸ਼ ਕੁਮਾਰ ਦੀ ਪਤਨੀ ਰੌਸ਼ਨੀ ਵੀ ਕਾਰ ਵਿਚ ਮੌਜੂਦ ਸੀ, ਜੋ ਗੰਭੀਰ ਜ਼ਖ਼ਮੀ ਹੋ ਗਈ। ਰੌਸ਼ਨੀ ਨੇ ਦੱਸਿਆ ਕਿ ਉਹ ਤਿੰਨੋਂ ਜਣੇ ਕਾਰ ਵਿਚ ਆਪਣੇ ਪਿੰਡ ਫ਼ਿਰੋਜਸ਼ਾਹ ਜਾ ਰਹੇ ਸਨ, ਜਦੋਂ ਉਹ ਗੋਬਿੰਦ ਐਨਕਲੇਵ ਨਜ਼ਦੀਕ ਪੁੱਜੇ ਤਾਂ ਤੇਜ਼ ਰਫ਼ਤਾਰ ਆ ਰਹੀ ਸਵਿਫ਼ਟ ਕਾਰ ਉਨ੍ਹਾਂ ਦੀ ਗੱਡੀ ਨਾਲ ਟਕਰਾਅ ਗਈ, ਜਿਸ ਕਾਰਨ ਉਸ ਦੇ ਪਤੀ ਤੇ ਸਹੁਰੇ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਥਾਣਾ ਕੁਲਗੜੀ ਪੁਲੀਸ ਨੇ ਕਾਰ ਚਾਲਕ ਰਣਜੀਤ ਸਿੰਘ ਵਾਸੀ ਪਿੰਡ ਸਤੀਏ ਵਾਲਾ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ।