ਸੜਕ ਨਾਲ ਕੰਧ ਦੀ ਉਸਾਰੀ ਖ਼ਿਲਾਫ਼ ਕਿਸਾਨਾਂ ਵੱਲੋਂ ਥਾਣੇ ਮੂਹਰੇ ਧਰਨਾ

ਖੇਤਰੀ ਪ੍ਰਤੀਨਿਧ
ਪਟਿਆਲਾ, 4 ਅਪਰੈਲ
ਇਥੇ 70 ਏਕੜ ਵਿੱਚ ਬਣ ਰਹੀ ਐੱਮਡੀਬੀ ਕੈਲੀਫੋਰਨੀਆ ਕਲੋਨੀ ਦੇ ਬਿਲਡਰ ਨੇ ਮੁੱਖ ਸੜਕ ਨਾਲ ਦੀਵਾਰ ਬਣਾ ਦਿੱਤੀ ਹੈ ਜਿਸ ਦਾ ਵਿਰੋਧ ਕਰਦਿਆਂ ਇਲਾਕੇ ਦੇ ਲੋਕਾਂ ਅਤੇ ਕਿਸਾਨਾਂ ਨੇ ਤਰਕ ਦਿੱਤਾ ਕਿ ਇਸ ਨਾਲ਼ ਬਰਸਾਤੀ ਪਾਣੀ ਨੂੰ ਡਾਫ ਲੱਗੇਗੀ ਜਿਸ ਦਾ ਅਸਰ ਪਿੰਡ ਲਚਕਾਣੀ, ਬਖਸ਼ੀਵਾਲ ਤੇ ਜੱਸੋਵਾਲ ਆਦਿ ਵਿੱਚ ਵੀ ਪਵੇਗਾ। ਇਸ ਦੇ ਵਿਰੋਧ ’ਚ ਬੀਕੇਯੂ ਡਕੌਂਦਾ ਨੇ ਮਹਿਲਾ ਮੈਂਬਰਾਂ ਸਮੇਤ ਅੱਜ ਥਾਣਾ ਬਖਸ਼ੀਵਾਲ਼ਾ ਵਿੱਚ ਧਰਨਾ ਮਾਰ ਦਿੱਤਾ। ਇਸ ਮੌਕੇ ਇਸ ਮੌਕੇ ਸੁਰਜੀਤ ਸਿੰਘ ਲਚਕਾਣੀ ਬਲਾਕ ਪ੍ਰਧਾਨ ਸਮੇਤ ਹੋਰਨਾ ਨੇ ਮੰਗ ਕੀਤੀ ਕਿ ਸਾਈਫਨਾਂ ਤੋਂ ਪਾਣੀ ਦੀ ਨਿਕਾਸੀ ਨੇੜਲੇ ਚੋਆ/ਸੀਜ਼ਨਲ ਡਰੇਨ ਵਿੱਚ ਕਰਨ ਦਾ ਪ੍ਰਬੰਧ ਕੀਤਾ ਜਾਵੇ।
ਇਸ ਤਰ੍ਹਾਂ ਗੁਲਸ਼ਨ ਕੁਮਾਰ ਜੇ.ਈ ਰਿਪੇਅਰ ਕਮ ਮਾਈਨਿੰਗ ਨੇ ਧਰਨੇ ਵਾਲੀ ਥਾਂ ’ਤੇ ਪਹੁੰਚ ਕੇ ਪ੍ਰਦਰਸ਼ਨਕਾਰੀਆਂ ਨੂੰ ਭਰੋਸਾ ਦਿਵਾਇਆ ਕਿ ਜਦੋਂ ਤੱਕ ਉਹ ਪਾਣੀ ਦੀ ਨਿਕਾਸੀ ਦਾ ਢੁਕਵਾਂ ਪ੍ਰਬੰਧ ਨਹੀਂ ਕਰਦੇ, ਉਦੋਂ ਤੱਕ ਕੰਪਨੀ ਆਪਣਾ ਕੰਮ ਸ਼ੁਰੂ ਨਹੀਂ ਕਰੇਗੀ। ਜਿਸ ’ਤੇ ਪ੍ਰਦਰਸ਼ਨਕਾਰੀਆਂ ਨੇ ਧਰਨਾ ਸਮਾਪਤ ਕਰ ਦਿੱਤਾ।