ਦਿਲਜੀਤ ਦੋੋੋਸਾਂਝ ਦੇ ਆਪਣੇ ਸ਼ਹਿਰ ਲੁਧਿਆਣਾ ’ਚ ਸ਼ੋਅ ਲਈ ਫੈਨਜ਼ ਪੱਬਾਂ ਭਾਰ

ਗਗਨਦੀਪ ਅਰੋੜਾ
ਲੁਧਿਆਣਾ, 31 ਦਸੰਬਰ
ਆਲਮੀ ਸਟਾਰ ਬਣ ਚੁੱਕੇ ਪੰਜਾਬੀ ਅਦਾਕਾਰ ਤੇ ਗਾਇਕ ਦਿਲਜੀਤ ਦੋਸਾਂਝ ਦੇ ਪੰਜਾਬ ਵਿੱਚ ਹੋ ਰਹੇ ਪਹਿਲੇ ਤੇ ਇਸ ਸਾਲ ਦੇ ਆਖਰੀ ਸ਼ੋਅ ਲਈ ਦਿਲਜੀਤ ਦੇ ਪ੍ਰਸ਼ੰਸਕ ਪੱਬਾਂ ਭਾਰ ਹਨ। ਦਿਲ-ਲੂਮਿਨਾਟੀ ਦਾ ਇਹ ਗਰੈਂਡ ਫਿਨਾਲੇ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ (ਪੀਏਯੂ) ਦੇ ਫੁਟਬਾਲ ਗਰਾਊਂਡ ਵਿੱਚ ਹੋ ਰਿਹਾ ਹੈ, ਜਿੱਥੇ 40 ਤੋਂ 50 ਹਜ਼ਾਰ ਲੋਕਾਂ ਦੇ ਪੁੱਜਣ ਦੀ ਉਮੀਦ ਹੈ। ਦਿਲਜੀਤ ਇਸ ਥਾਂ ਤੋਂ ਹੀ 2024 ਨੂੰ ਅਲਵਿਦਾ ਆਖਣਗੇ ਤੇ 2025 ਨਵੇਂ ਸਾਲ ਦਾ ਸਵਾਗਤ ਕਰਨਗੇ। ਨਵੇਂ ਸਾਲ ਦੇ ਇਸ ਸ਼ੋਅ ਲਈ ਦਿਲਜੀਤ ਦੀ ਟੀਮ ਨੇ ਵੀ ਖਾਸੇ ਪ੍ਰਬੰਧ ਕੀਤੇ ਹੋਏ ਹਨ।

ਦਿਲਜੀਤ ਅੱਜ ਸਵੇਰੇ ਹੀ ਲੁਧਿਆਣਾ ਪੁੱਜੇ ਹਨ। ਪਹਿਲਾਂ ਉਹ ਗੁਰਦੁਆਰਾ ਨਾਨਕਸਰ ਮੱਥਾ ਟੇਕਣ ਪੁੱਜੇ ਤੇ ਫਿਰ ਮੁੱਲਾਂਪੁਰ ਸਥਿਤ ਮਨੁੱਖਤਾ ਦੀ ਸੇਵਾ ਦੇ ਆਸ਼ਰਮ ਵਿੱਚ ਲੋਕਾਂ ਨੂੰ ਮਿਲਣ ਪੁੱਜੇ। ਇਸ ਥਾਂ ’ਤੇ ਉਨ੍ਹਾਂ ਨੇ ਲੋਕਾਂ ਨਾਲ ਮੁਲਾਕਾਤ ਕੀਤੀ। ਇਸ ਤੋਂ ਬਾਅਦ ਦਿਲਜੀਤ ਸਿੱਧਾ ਪੀਏਯੂ ਵਿੱਚ ਸਟੇਜ ’ਤੇ ਚੈਕਿੰਗ ਕਰਨ ਪੁੱਜੇ।

ਦਿਲਜੀਤ ਦੇ ਸ਼ੋਅ ਵਿੱਚ ਜਾਣ ਲਈ ਲੋਕ ਵੱਡੀ ਗਿਣਤੀ ਵਿੱਚ ਸ਼ਾਮ ਚਾਰ ਵਜੇ ਹੀ ਲੁਧਿਆਣਾ ਦੇ ਪੀਏਯੂ ਦੇ ਗੇਟ ਬਾਹਰ ਪੁੱਜ ਗਏ ਸਨ। ਪੁਲੀਸ ਨੇ ਸ਼ਾਮ 5 ਵਜੇ ਸਾਰੇ ਚੈਕਿੰਗ ਪ੍ਰਬੰਧ ਪੂਰੇ ਕਰਕੇ ਲੋਕਾਂ ਨੂੰ ਅੰਦਰ ਦਾਖਲ ਹੋਣ ਦਿੱਤਾ। ਲੋਕਾਂ ਵਿੱਚ ਵੀ ਦਿਲਜੀਤ ਦਾ ਖਾਸਾ ਕਰੇਜ਼ ਦੇਖਣ ਨੂੰ ਮਿਲਿਆ। ਦਿਲਜੀਤ ਨੂੰ ਸੁਣਨ ਦੇ ਲਈ ਲੋਕ ਹਰਿਆਣਾ, ਹਿਮਾਚਲ ਤੇ ਛੱਤੀਸਗੜ੍ਹ ਤੋਂ ਲੁਧਿਆਣਾ ਪੁੱਜੇ। ਇਸ ਤੋਂ ਇਲਾਵਾ ਕੈਨੇਡਾ ਦੇ ਸਰੀ ਤੋਂ ਵੀ ਇੱਕ ਪਰਿਵਾਰ ਖਾਸ ਤੌਰ ’ਤੇ ਦਿਲਜੀਤ ਨੂੰ ਸੁਣਨ ਲਈ ਪੁੱਜਿਆ। ਰਾਤ 8 ਵਜੇ ਤੱਕ ਦਿਲਜੀਤ ਦੇ ਪ੍ਰਸ਼ੰਸਕਾਂ ਦੀਆਂ ਪੀਏਯੂ ਦੇ ਅੰਦਰ ਬਾਹਰ ਲਾਈਨਾਂ ਲੱਗੀਆਂ ਹੋਈਆਂ ਸਨ।