ਸਰਪੰਚ ਦੇ ਵਾਹਨ ਦਾ ਜਾਅਲੀ ਬੀਮਾ, ਏਜੰਟ ਗ੍ਰਿਫ਼ਤਾਰ

ਪੱਤਰ ਪ੍ਰੇਰਕ

ਲਾਲੜੂ, 4 ਜੂਨ

ਇਲਾਕੇ ਦੇ ਇੱਕ ਮੌਜੂਦਾ ਸਰਪੰਚ ਦੇ ਵਾਹਨ ਦਾ ਜਾਅਲੀ ਬੀਮਾ ਬਣਾਉਣ ਕਾਰਨ ਪੁਲੀਸ ਨੇ ਇੱਕ ਏਜੰਟ ਖਿਲਾਫ਼ ਹੇਰਾ-ਫੇਰੀ ਕੀਤੇ ਜਾਣ ਦਾ ਮਾਮਲਾ ਦਰਜ ਕੀਤਾ ਹੈ। ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰਕੇ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ। ਪੁਲੀਸ ਨੂੰ ਇੱਕ ਦਿਨ ਦਾ ਰਿਮਾਂਡ ਮਿਲਿਆ ਹੈ। ਪ੍ਰਾਪਤ ਜਾਣਕਾਰੀ ਮੁਤਾਬਕ ਸਰਪੰਚ ਬੂਟਾ ਸਿੰਘ ਨਿਵਾਸੀ ਸਿਓਲੀ ਥਾਣਾ ਹੰਡੇਸਰਾ ਨੇ ਪੁਲੀਸ ਨੂੰ ਸ਼ਿਕਾਇਤ ਦਿੱਤੀ ਸੀ ਕੀ ਉਸਨੇ ਆਪਣੀ ਗੱਡੀ ਦਾ ਬੀਮਾ ਕਰਵਾਉਣ ਲਈ ਵਰਿੰਦਰ ਸਿੰਘ ਨਿਵਾਸੀ ਹੰਸਾਲਾ ਨਾਮਕ ਏਜੰਟ ਨੂੰ ਕਾਗਜ਼ ਪੱਤਰ ਅਤੇ 9200 ਰੁਪਏ ਦੀ ਰਕਮ ਦਿੱਤੀ ਸੀ। ਜਦੋਂ ਬੀਮਾ ਕੰਪਨੀ ਤੋਂ ਇੰਸ਼ੋਰੈਂਸ ਦੀ ਜਾਂਚ ਕਰਵਾਈ ਤਾਂ ਉਹ ਜਾਅਲੀ ਨਿਕਲਿਆ। ਇਸ ਸਬੰਧੀ ਸਰਪੰਚ ਬੂਟਾ ਸਿੰਘ ਨੇ ਏਜੰਟ ਵਰਿੰਦਰ ਸਿੰਘ ਖਿਲਾਫ਼ ਧੋਖਧੜੀ ਦਾ ਕੇਸ ਦਰਜ ਕਰਵਾ ਦਿੱਤਾ।