ਮੌਸਮ ਦੇ ਬਦਲੇ ਮਿਜ਼ਾਜ ਕਾਰਨ ਕਣਕ ਦੀ ਵਾਢੀ ਪਛੜਨ ਦੇ ਆਸਾਰ

ਨਿੱਜੀ ਪੱਤਰ ਪ੍ਰੇਰਕ
ਮਾਲੇਰਕੋਟਲਾ, 14 ਅਪਰੈਲ
ਦੋ ਦਿਨਾਂ ਤੋਂ ਹੋ ਰਹੀ ਕਿਣਮਿਣ ਤੇ ਬੱਦਲਵਾਈ ਤੋਂ ਖੇਤਰ ਦੇ ਕਿਸਾਨ ਚਿੰਤਤ ਹਨ। ਮੌਸਮ ਦੇ ਬਦਲੇ ਮਿਜ਼ਾਜ ਕਾਰਨ ਹਾੜੀ ਦੀ ਵਾਢੀ ਹੋਰ ਪਛੜਨ ਦੇ ਆਸਾਰ ਬਣ ਗਏ ਹਨ।
ਸ਼ਨਿਚਰਵਾਰ ਤੋਂ ਅਚਾਨਕ ਬਦਲੇ ਮੌਸਮ ਕਾਰਨ ਅਸਮਾਨ ਵਿੱਚ ਬੱਦਲਵਾਈ ਹੈ ਤੇ ਥੋੜ੍ਹੀ ਥੋੜ੍ਹੀ ਹਵਾ ਵੀ ਚੱਲ ਰਹੀ ਹੈ। ਬਦਲੇ ਮੌਸਮ ਕਾਰਨ ਤਾਪਮਾਨ ’ਚ ਗਿਰਾਵਟ ਆਈ ਹੈ। ਅੱਜ ਦਿਨ ਦਾ ਤਾਪਮਾਨ 31-32 ਡਿੱਗਰੀ ਸੈਲਸੀਅਸ ਰਿਹਾ। ਅਸਮਾਨ ਵਿੱਚ ਸੰਘਣੇ ਕਾਲੇ ਬੱਦਲ ਛਾਏ ਰਹੇ ਅਤੇ ਕੁਝ ਠੰਢ ਵੀ ਹੋਈ ਹੈ। ਕਿਸਾਨਾਂ ਨੂੰ ਤੌਖਲਾ ਵੱਢ ਵੱਢ ਖਾ ਰਿਹਾ ਹੈ ਕਿ ਜੇਕਰ ਕਿਣ-ਮਿਣ ਤੇਜ਼ ਬਰਸਾਤ ‘ਚ ਬਦਲ ਗਈ ਤੇ ਨਾਲ ਤੇਜ਼ ਹਵਾ ਵੀ ਚੱਲ ਪਈ ਤਾਂ ਉਨ੍ਹਾਂ ਦੀ ਵੱਢਣ ਲਈ ਤਿਆਰ ਕਣਕ ਖੇਤਾਂ ਵਿੱਚ ਹੀ ਖ਼ਰਾਬ ਹੋ ਜਾਵੇਗੀ।