ਟਰੈਕਟਰ ’ਤੇ ਬਿਜਲੀ ਦੀ ਤਾਰ ਡਿੱਗੀ, ਨੌਜਵਾਨ ਦੀ ਮੌਤ

ਪੱਤਰ ਪ੍ਰੇਰਕ
ਦੋਦਾ, 11 ਨਵੰਬਰ
ਪਿੰਡ ਖੁੰਡੇ ਹਲਾਲ ’ਚ ਦੇਰ ਰਾਤ ਖੇਤਾਂ ’ਚੋਂ ਝੋਨੇ ਦੀ ਪਰਾਲੀ ਦਾ ਟਰਾਲਾ ਲੈ ਕੇ ਆ ਰਹੇ 3 ਨੌਜਵਾਨਾਂ ’ਤੇ ਬਿਜਲੀ ਦੀ ਤਾਰ ਡਿੱਗਣ ਕਾਰਨ ਉਨ੍ਹਾਂ ਨੂੰ ਕਰੰਟ ਲੱਗ ਗਿਆ। ਇਸ ਦੌਰਾਨ ਇਕ ਨੌਜਵਾਨ ਦੀ ਜ਼ੇਰੇ ਇਲਾਜ ਮੌਤ ਹੋ ਗਈ। ਜਾਣਕਾਰੀ ਅਨੁਸਾਰ ਖੇਤਾਂ ਵਿਚੋਂ ਪਰਾਲੀ ਦਾ ਟਰਾਲਾ ਸੜਕ ’ਤੇ ਚੜ੍ਹਾਉਣ ਮੌਕੇ ਬਿਜਲੀ ਦੀ ਤਾਰ ਟਰੈਕਟਰ ਉਤੇ ਡਿੱਗ ਗਈ। ਇਸ ਦੌਰਾਨ ਚਾਲਕ ਅਤੇ ਨਾਲ ਬੈਠੇ ਹੋਰ ਦੋ ਵਿਅਕਤੀ ਕਰੰਟ ਦੀ ਲਪੇਟ ਵਿਚ ਆ ਗਏ। ਜਿਨ੍ਹਾਂ ਨੂੰ ਇਲਾਜ ਲਈ ਮੁਕਤਸਰ ਵਿਖੇ ਲਿਆਂਦਾ ਗਿਆ। ਉਨ੍ਹਾਂ ਤਿੰਨਾਂ ’ਚੋਂ ਨੌਜਵਾਨ ਮਜ਼ਦੂਰ ਅਕਾਸ਼ਦੀਪ ਸਿੰਘ (21) ਦੀ ਇੱਕ ਨਿੱਜੀ ਹਸਪਤਾਲ ਵਿਚ ਇਲਾਜ ਦੌਰਾਨ ਮੌਤ ਹੋ ਗਈ ਅਤੇ ਦੂਜਿਆਂ ਦਾ ਬਚਾਅ ਹੋ ਗਿਆ।