ਪੂਰਬੀ ਰੇਲਵੇ ਨੇ ਕ੍ਰਿਕਟ ਚੈਂਪੀਅਨਸ਼ਿਪ ਜਿੱਤੀ

ਗੁਰਨਾਮ ਸਿੰਘ ਅਕੀਦਾ
ਪਟਿਆਲਾ, 20 ਅਪਰੈਲ
ਪੂਰਬੀ ਰੇਲਵੇ ਨੇ ਦੱਖਣੀ-ਪੱਛਮੀ ਰੇਲਵੇ ਨੂੰ 81 ਦੌੜਾਂ ਨਾਲ ਹਰਾ ਕੇ 67ਵੀਂ ਆਲ ਇੰਡੀਆ ਰੇਲਵੇ ਕ੍ਰਿਕਟ ਚੈਂਪੀਅਨਸ਼ਿਪ ਜਿੱਤ ਲਈ ਹੈ। ਇਹ ਨਾਕਆਊਟ ਚੈਂਪੀਅਨਸ਼ਿਪ ਪਟਿਆਲਾ ਲੋਕੋਮੋਟਿਵ ਵਰਕਸ (ਪੀਐਲਡਬਲਿਊ) ਦੀ ਸਰਪ੍ਰਸਤੀ ਹੇਠ ਪੀਐੱਲਡਬਲਿਊ ਕ੍ਰਿਕਟ ਸਟੇਡੀਅਮ ਵਿੱਚ ਹੋਈ। ਟੂਰਨਾਮੈਂਟ ’ਚ ਉੱਤਰੀ ਰੇਲਵੇ ਦੀ ਟੀਮ ਤੀਜਾ ਸਥਾਨ ’ਤੇ ਰਹੀ। ਫਾਈਨਲ ’ਚ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਪੂਰਬੀ ਰੇਲਵੇ ਨੇ 39.5 ਓਵਰਾਂ ’ਚ ਸਾਰੀਆਂ ਵਿਕਟਾਂ ਗੁਆ ਕੇ 247 ਦੌੜਾਂ ਬਣਾਈਆਂ। ਜਿੱਤ ਲਈ 248 ਦੌੜਾਂ ਦਾ ਟੀਚਾ ਹਾਸਲ ਕਰਨ ਆਈ ਦੱਖਣੀ-ਪੱਛਮੀ ਰੇਲਵੇ ਦੀ ਟੀਮ 30.3 ਓਵਰਾਂ ’ਚ ਸਿਰਫ਼ 166 ਦੌੜਾਂ ਹੀ ਬਣਾ ਸਕੀ। ਜੇਤੂ ਟੀਮ ਤੇ ਉਪਜੇਤੂ ਟੀਮ ਨੂੰ ਟਰਾਫ਼ੀਆਂ ਤੇ ਸਰਟੀਫਿਕੇਟ ਦਿੱਤੇ ਗਏ।