‘ਦਸ ਜੂਨ ਕੀ ਰਾਤ’ ਸੀਰੀਜ਼ ਦਾ ਟ੍ਰੇਲਰ ਰਿਲੀਜ਼

ਮੁੰਬਈ: ਅਦਾਕਾਰ ਤੁਸ਼ਾਰ ਕਪੂਰ, ਕਾਮੇਡੀ ਥ੍ਰਿਲਰ ਸੀਰੀਜ਼ ‘ਦਸ ਜੂਨ ਕੀ ਰਾਤ’ ਵਿੱਚ ਪ੍ਰਿਯੰਕਾ ਚਾਹਰ ਚੌਧਰੀ ਨਾਲ ਨਜ਼ਰ ਆਉਣਗੇ। ਤਰਬੇਜ਼ ਖਾਨ ਵੱਲੋਂ ਨਿਰਦੇਸ਼ਿਤ ਇਸ ਸ਼ੋਅ ਦਾ ਟ੍ਰੇਲਰ ਰਿਲੀਜ਼ ਹੋ ਚੁੱਕਾ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਇਹ ਸ਼ੋਅ ‘ਪਨੌਤੀ ਭਾਗੇਸ਼’ ਦੀ ਜ਼ਿੰਦਗੀ ’ਤੇ ਆਧਾਰਿਤ ਹੈ, ਜਿਸ ਦੀ ਬਦਕਿਸਮਤੀ ਇੰਨੀ ਬਦਨਾਮ ਹੈ ਕਿ ਰਾਣੀਗੰਜ ਦੇ ਲੋਕ ਉਸ ਨਾਲ ਇੱਕ ਰਸਤੇ ’ਤੇ ਲੰਘਣ ਦੀ ਥਾਂ ਘਰ ਵਿੱਚ ਹੀ ਰਹਿੰਦੇ ਹਨ। ਉਸ ਦੇ ਜਨਮ ਮੌਕੇ ਹੀ ਉਸ ਦੇ ਪਿਤਾ ਦੀ ਮੌਤ ਹੋ ਗਈ ਸੀ। ‘ਪਨੌਤੀ’ ਦੀ ਬਦਕਿਸਮਤੀ ਕਾਰਨ ਉਸ ਦੇ ਪਿਤਾ ਦਾ ਥੀਏਟਰ ਬੰਦ ਹੋ ਗਿਆ। ਹੁਣ ‘ਪਨੌਤੀ’ ਦਾ ਆਖਰੀ ਸੁਫ਼ਨਾ ਹੈ ਕਿ ਉਸ ਨੇ ਆਪਣੇ ਪਿਤਾ ਦੇ ਥੀਏਟਰ ਨੂੰ ਦੁਬਾਰਾ ਖੋਲ੍ਹਣਾ ਤੇ ਪਿਤਾ ਦੀ ਵਿਰਾਸਤ ਨੂੰ ਬਹਾਲ ਕਰਨਾ ਹੈ। ਉਸ ਦਾ ਸਫਰ ਇੱਕ ਤੋਂ ਬਾਅਦ ਇੱਕ ਭਿਆਨਕ ਸਥਿਤੀਆਂ ’ਚ ਫਸਿਆ ਨਜ਼ਰ ਆਉਂਦਾ ਹੈ। ‘ਪਨੌਤੀ’ ਅਤੇ ਉਸ ਦਾ ਚਚੇਰਾ ਭਰਾ ਬਿੱਟੂ ਪਿਆਰ ਅਤੇ ਕਿਸਮਤ ਦੀ ਖੋਜ ਵਿੱਚ ਹਨ। ਤੁਸ਼ਾਰ ਕਪੂੁਰ ‘ਪਨੌਤੀ’ ਦੀ ਭੂਮਿਕਾ ਨਿਭਾਉਂਦਾ ਨਜ਼ਰ ਆਵੇਗਾ। ‘ਦਸ ਜੂਨ ਕੀ ਰਾਤ’ 4 ਅਗਸਤ ਨੂੰ ਜੀਓ ਸਿਨੇਮਾ ’ਤੇ ਰਿਲੀਜ਼ ਹੋਵੇਗੀ। -ਏਐੱਨਆਈ